Hibru 12 - Vengo (Babungo)

Faŋ bàw nsiŋ nuŋ fwi saŋ-nsiŋ maa Nwi yaa vɨɨ vɔ́

¹ Gə fɨ maa nsiŋ, faŋ nsiŋ yè nwaa vɨɨ vɔ́ faŋ vəŋ nə nùŋ fwisə vəŋ maa Nwi, də̀ jɨɨ tɨ́ nsiŋ nə, bàw nsiŋ meꞌ vənu mbɨə faŋ kaꞌ mbə fə̀ŋ jɨɨ nyaa-nsiŋ, nə vənu vəbwəvə faŋ mbə jia nsiŋ nə wutə nə. Nsiŋ ka fwi, kɨ gə vɨsɨ, nyɨŋ ghuu ŋgɨə faŋ ŋgə lùu vɨsɨ nsiŋ nə.

² Bàw nsiŋ tə sɨ sheꞌ maa Yeso faŋ ŋwə nə ŋaꞌsə jɨɨ tɨ́ nsiŋ, tɨ́ kaꞌ nsiŋ nùŋ fwi saŋ-nsiŋ maa ŋwə. Ŋwə baa luu gaŋtə nsiŋ, tɨ́ kaꞌ nsiŋ kɨ gə nə vɨsɨ, kɨ bɨbiŋ nu ki, zìꞌ maa vəndwə. Ŋwə nə bìŋ maa məku ŋkee yiku tɔ dɨɨ fuu fəŋkɔꞌ fə ŋkɨꞌsə, kee shə̀ŋ maa nu tɔ dɨɨ kɔ́ me. Ŋwə nə tə̀ sɨ laa yi ndɔ kii məŋaytə ŋgwə faŋ Nwi nùŋsə tɨ́ ŋwə nə. Nɨniŋ, ŋwə dùꞌ fuu ŋkaw yifwàŋ maa kwiŋ maꞌnə Nwi ndwə.

³ Bàw viŋ lumə nu Yeso kɔ́, faŋ ŋwə nə bìŋ maa məye ŋɨꞌ, yè ŋɨꞌ fɨ ghɔ vɨɨ bwənə faŋ vəŋ nə bee ŋwə nə. Viŋ lumə ŋwə, tɨ́ kaꞌ viŋ kee bwa me, fwi siŋ kee bwa nɨzi me.

Faŋ bàw viŋ tweꞌ maa nu Nwi faŋ vɨ kɔlə kwaŋ ŋɨꞌ maa viŋ

⁴ Yighaw njyə faŋ viŋ vɨ nu bwə tuŋ, nyə kee ta ziꞌ maa nu fənshi me.

⁵ Kɨ viŋ ndenə yigisə Nwi njyə faŋ nyə kwaŋ wutə maa viŋ me. Nwi nə tìi viŋ nə vaŋ vi, gì tɨ́ viŋ laa, «Ŋwiŋ ŋwaa, yighee njyə faŋ Nwi kwaŋ ŋɨꞌ maa ghɔ, ghɨsə ŋwaa wə. Yighee njyə faŋ Nwi saŋ ghɔ, kaa yɨsə fwi yə bwa me.

⁶ Kɨ lumə laa, wə ntɨə faŋ Nwi kaw, lùu wə ntɨə faŋ Nwi yaa kɨ kwaŋ ŋwə taa ŋɨꞌ. Lùu wə ntɨə faŋ Nwi ndì ŋwə yaa ŋwiŋ wi, faŋ ŋwə yaa kɨ saŋ ŋwə.»

⁷ Nɨniŋ, viŋ ka fwi siŋ taa ŋɨꞌ, buꞌ laa lùu ŋɨꞌ faŋ tɨɨ wee yaa kɨ kɔ tɨ́ wee maa məlesə ŋwə. Ŋɨꞌ yɔ́ də laa Nwi ndì viŋ yaa mbii vaŋ. Maa wee kee lùu shɔ faŋ tii wi kee ta sàŋ ŋwə me.

⁸ Nwi nəə toꞌ kee kɨ yɨsə laa viŋ ye ŋɨꞌ me, faŋ vaŋ vi vənshə ye ŋɨꞌ nə, buu ŋkə lùu laa viŋ kee lùu ŋkee vaŋ vi me, buu viŋ luu sheꞌ vəndɔ.

⁹ Nu mɔ́ꞌ lùu laa, vətɨɨ vaŋ-nsiŋ fɨ shɨ nsi feenə yaa kɨ kwaŋ ŋɨꞌ maa nsiŋ, nsiŋ biŋ ŋɨꞌ yɔ́, fee vəŋ. Nɨniŋ, ŋkə bàw laa nsiŋ kɨ zɔnə Tii ŋwaa-nsiŋ faŋ ŋwə lùu yizɔ, shɔ̀ɔ ki, laa nsiŋ ndɔ fi məbwey vəlwaŋ fɨ ghɔ ŋwə.

¹⁰ Vətɨɨ vaŋ-nsiŋ vɔ́ fɨ shɨ nsi nyə̀ nə, vəŋ nə kìi nsiŋ sheꞌ maa wee-fɨ-yighee, kwàŋ nsiŋ taa ŋɨꞌ faŋ vəŋ nəə bɨꞌtə laa ŋkə taa gaŋtə nsiŋ. Gə fɨ maa Nwi, ŋwə kwaŋ nsiŋ taa ŋɨꞌ faŋ kaꞌ ŋɨꞌ yɔ́ bweysə nsiŋ, laa nsiŋ ndɔ luu vɨɨ leynə yaa ŋwə.

¹¹ Luu nə, maa yighee njyə faŋ nsiŋ ye ŋɨꞌ, nsiŋ bɨꞌtə laa lùu nu məluŋ, kee lùu nu məŋaytə me. Lùu nɨniŋ maa ŋɨꞌ tɨ̀ me ŋɨꞌ. Luu nə, ŋɨꞌ yɔ́ taa mè, nsiŋ ye laa vɨɨ mbɨə faŋ vəŋ nə kà fwi maa yighee ŋɨꞌ yɔ́, zwètə maa məduꞌ nə məduꞌ-nyɔŋ, yɨsə vənu vəjəəvə.

Faŋ ŋkə bàw laa viŋ ndɨɨnə laa kɨ wə fɨ viŋ ndi jɨɨ Nwi me

¹² Nɨniŋ, viŋ yɨsə kwiŋ ghiŋ baa weꞌ. Vətɔ vəyəə viŋ faŋ mbə bɨbwa, baa weꞌ nɨzi, tɨ́ kaꞌ viŋ kɨ toꞌ maa jɨɨ Nwi.

¹³ Viŋ kɨ gə nə vɨsɨ, yɨsə fɔꞌ wiŋ luu ley, tɨ́ kaꞌ vɨɨ mbɨə faŋ vəŋ nəə kɨkweꞌ, tɨꞌnə me dɨdəə, kee gù vəndwey me, yuu ndì jɨɨ Nwi me; vəŋ bee kii bɨbwaŋnə.

¹⁴ Viŋ kəə jɨɨsə maa məduꞌ nyɔŋ viŋ vɨ vɨɨ vənshə. Viŋ kɨ faꞌ nə wutə, tɨ́ kaꞌ viŋ kɨ shi nshinə faŋ lùu nshinə yiley vɨsɨ Nwi. Viŋ kɔꞌ kɨɨ laa kaꞌ wə kee ndɔ gə yè Nwi, maa kɨ shi nshinə yɔ́ me.

¹⁵ Viŋ kɨ ndɨɨnə laa kɨ wə fɨ wiŋ ndi jɨɨ Nwi, mànə gəŋsə Nwi me. Kɨ wə gu yaa mbiŋ faŋ ŋkə bɨbiŋ me, faŋ ŋkə jwi nə məbiŋ wi, yɨsə vətɔ vəmɔ́ꞌ biŋ me. Kəŋ vɨɨ vɔ́ yaa kɨ jwi nə vənu vəbwəvə, bɨsə nshinə vɨɨ vəyaŋ.

¹⁶ Viŋ kɨ ndɨɨnə laa kɨ wə yɨ nu bwə me, tɨꞌnə me, ndì nu Nwi nsi me, yaa Esaw nə yɨ yighee vɨsɨ buꞌ dɨꞌ fazɨ nə. Ŋwə nə fìŋ yita yi tɨ́ tuŋnə yiba jɨŋ ki.

¹⁷ Viŋ kɔꞌ kɨɨ laa, nə luu maa yighee yiba, Esaw nəə kəə laa tii wi tu mənɔŋ-bwaŋnə tɔ yi, luu nə, vɨ twey tɨ́ ŋwə. Jɨɨ nə kee baa lùu shɔ, tɨ́ kaꞌ ŋwə kwìinə nu ŋkɨə faŋ ŋwə nə yɨ̀sə nə me, faŋ ŋwə nə kɔlə gwia, mənsɨ fuu nə.

Faŋ nsiŋ ndɔ ŋii shɨ Nwi yizɔ

¹⁸ Viŋ lumə shəŋ ŋkɨə faŋ viŋ tɨ̀ŋ shɔ nə. Viŋ kee lùu yaa vɨɨ Isirayl mbə ywaŋ-vɨsɨ me. Vəŋ nə tɨ̀ŋ yɨ baŋ Sinai, faŋ lùu fa faŋ kaꞌ vɨ kɔ̀ŋ nə ghɔ taa mbi nyə̀. Wisə nə bii fɨ fuu baŋ yɔ́. Fu fəŋ laa shiŋ. Fɨɨ shɔɔ fɨ fuŋ kəweꞌ.

¹⁹ Vɨɨ vɔ́ nə zɔ̀ faŋ vɨ taw yisaw, gɨ Nwi gi tɨ́ vəŋ yaa yibay. Vəŋ fee ŋkee dɨdɨꞌ, buꞌ ghɔ laa kɨ gɨ yɔ́ baa fuu me.

²⁰ Sɔꞌ ŋgwə faŋ gɨ yɔ́ nə kɔ nə, shɔɔ wutə vəŋ. Ntɨ yimɔ́ꞌ nə fùu laa, «Kɨ fa fənshi kɔŋ baŋ yɔ́ me. Kɨ luu laa fa kɔŋ baŋ yɔ́, faŋ ŋkə kɔlə luu sheꞌ nyaa, vɨ tumə nyə nə ŋoꞌsə, nyə ku.»

²¹ Vətɔ mbɨə faŋ vəŋ nə yè maa shəŋ kɔ́, nə luu ŋkee vənyɔɔtə. Nshɨ-tɔ Mose nə gì laa, fwi yi lɔꞌ, yi fee.

²² Gə fɨ maa viŋ, shəŋ ŋkɨə faŋ viŋ jwì tɨ̀ŋ shɔ, luu ŋkee nɨŋkwiŋ. Viŋ tɨ̀ŋ luu yɨ baŋ njyə faŋ vɨ tii nə baŋ Zayon. Viŋ jwì luu shɨ Nwi, faŋ lùu Nwi bwey. Lùu shəŋ ŋkɨə faŋ Nwi lùu shɔ yizɔ. Vɨ tii shəŋ kɔ́ nə Jerusalem fɨ yizɔ. Nshiisə-ŋiisə Nwi faŋ kaꞌ wə kee say me, bàytə yifi, kɨ ŋaytə.

²³ Viŋ lùu fɨ maa mfɔŋsə vaŋ Nwi taa mfaynə yɔ́, faŋ Nwi nə nyɔ̀ꞌ təzii təvəŋ taa ŋwaꞌlə yizɔ. Viŋ ndɔ tɨŋ vɨsɨ Nwi faŋ ŋwə sɔꞌ vɨɨ vənshə. Viŋ ndɔ faynə viŋ vɨ vɨɨ vɔ́ fɨ ywaŋ-vɨsɨ, faŋ Nwi nə ndì vəŋ yaa vɨɨ loomə nə.

²⁴ Viŋ baa luu jwì yɨ Yeso faŋ Nwi nə gwìa məkee məfimə buꞌ ŋwə nə. Viŋ ndɔ ŋii maa shəŋ kɔ́ buꞌ mənshi mə Yeso, faŋ ŋwə nə kù tɔ nsiŋ nə. Nu mənshi mə Yeso bàw shɔ̀ɔ nu ŋkɨə faŋ mənshi mə Abel nə də̀ nə.

Faŋ ŋkə bàw laa kɨ viŋ manə yigisə Nwi me

²⁵ Nɨniŋ, viŋ kɨ ndɨɨnə laa kɨ viŋ twey Nwi faŋ ŋwə gì tɨ́ viŋ nə me. Viŋ lumə vɨɨ Isirayl fɨ ywaŋ-vɨsɨ, vəŋ nə twèy Nwi faŋ vəŋ nə zɔ̀ yigisə Nwi fɨ shuu wə taa mbi nyə̀. Luu nə, nsɔꞌ Nwi jia vəŋ, vəŋ kee kìi jɨɨ mənyɨŋ me. Gə fɨ maa nsiŋ, nsiŋ zɔ yigisə Nwi fɨ shuu wə faŋ ŋwə nə ndɔ̀ fɨ yizɔ. Nsiŋ kɨ luu kɨ twey yigisə yi, buu kaꞌ nsiŋ taa nyɨŋ kɨkə, faŋ vɨɨ vɔ́ nə kee bee yinyɨŋ nə me.

²⁶ Maa yighee yɔ́ ywaŋ-vɨsɨ nə, gɨ Nwi nə yɨ̀sə mbi nəꞌnə. Gə fɨ maa ndwə, ŋwə lɨ̀ꞌtə gì laa, «Shi mɔ́ꞌ mə ndɔ baa nəꞌsə mbi, nə ŋkee yizɔ nɨzi.»

²⁷ Yigi yɔ́ faŋ ŋwə nə gì nə, nyə də laa shi mɔ́ꞌ Nwi taa kwiinə vətɔ mbɨə faŋ mbə nəꞌnə nə, faŋ lùu vətɔ mbɨə faŋ Nwi nə naysə̀ nə. Ŋwə ndɔ kwiinə mbə, nùŋ vətɔ faŋ kaꞌ mbə kee baa nə̀ꞌnə me.

²⁸ Nɨniŋ, bàw nsiŋ kɨ bwaŋ Nwi, buꞌ laa ŋwə bɔ̀ŋ yifwàŋ tɨ́ nsiŋ faŋ kaꞌ nyə kee nə̀ꞌnə me. Nsiŋ kɨ bwaŋ ŋwə maa yifwàŋ yi yɔ́, buu nsiŋ bəŋsə Nwi maa jɨɨ njyə faŋ nyə bàw too ŋwə. Nsiŋ baa luu kɔ feenə tɨ́ ŋwə, faꞌ tɨ́ ŋwə nə məfee,

²⁹ buꞌ laa Nwi ŋwaa-nsiŋ lùu yaa wisə, faŋ ŋwə twaŋ vətɔ vənshə.