Hibru 11 - Vengo (Babungo)

Faŋ ŋkə bàw laa nsiŋ zwetə fɨ ghɔ vɨɨ ywaŋ-vɨsɨ, faŋ vəŋ nə nùŋ fwisə vəŋ maa Nwi

¹ Nu məbiŋ Nwi sii lùu kɨkə? Ŋkə lùu laa wə nuŋ fwi yi maa nu ŋkɨə faŋ ŋwə kɨꞌ laa ŋkə ndɔ jwi, baa nə laa ŋwə kɔꞌ kɨɨ fɨ taa fwi ŋwə laa nu faŋ ŋwə kee ta yiye me, lùu shɔ maa yinsəŋ.

² Bàw nsiŋ zwetə fɨ ghɔ vɨɨ ywaŋ-vɨsɨ, faŋ vəŋ nə nùŋ fwisə vəŋ maa Nwi, buu Nwi biŋ vəŋ.

³ Lùu nu məbiŋ faŋ nsiŋ kɨɨ laa Nwi nə bɔ̀ŋ mbi sheꞌ nə yigisə yi. Ŋwə nə gì nu, vətɔ kɨ nii lùu shɔ. Nɨniŋ, vətɔ faŋ wə ye nə yisɨ taa mbi nyə̀, mbə nə fùu sheꞌ fɨ taa yigi, faŋ kaꞌ wə kee bee ye yigi yɔ́ me.

⁴ Abel, wee Adam, nə nùŋ fwi yi maa Nwi, buu vəkɔ vi baw tɨ́ Nwi, shɔ̀ɔ mbə Kayin, weenshu wi. Nwi nə ndi ŋwə yaa wuu loomə, buꞌ laa ŋwə nə nùŋ fwi yi maa Nwi. Nwi nə yɨsə laa ŋkə lùu kəley tɨ́ nsiŋ, buꞌ faŋ Nwi nə fì vətɔ mbɨə faŋ Abel nə kɔ nə. Luu sheꞌ buꞌ məbiŋ Abel, laa nsiŋ kɨ bii zɔ̀ yigisə yi, faŋ ŋwə kɔlə ku nə.

⁵ Gə fɨ maa Enok, ŋwə nə nùŋ fwi yi maa Nwi, buu Nwi shaꞌsə ŋwə, kòꞌ nə ŋwə yizɔ, tɨ́ kaꞌ ŋwə kee ku me. Maa yighee yɔ́ wə kee baa yè ŋwə me, buꞌ laa Nwi nə ndi ŋwə, kòꞌ nə ŋwə yizɔ. Vɨ nyɔ̀ꞌ taa ŋwaꞌlə Nwi buꞌ ŋwə laa, «Too Nwi nə bàw maa ŋwə maa yighee njyə faŋ ŋwə nə luu taa mbi, buu vɨ koꞌ nə ŋwə yizɔ.»

⁶ Kaꞌ wə kee bàwsə too Nwi, tɨ̀ lɨꞌ laa ŋwə nùŋ fwi yi maa Nwi me. Lùu nɨniŋ buꞌ laa wə kɨ luu kəə jwi yɨ Nwi, ŋwə fɔŋ biŋ laa Nwi lùu shɔ, baa nùŋ fwi yi maa Nwi laa Nwi taa kɨ yɨ jəə maa vɨɨ mbɨə faŋ vəŋ kəə Nwi.

⁷ Gə fɨ maa Noa, yighee njyə faŋ ŋwə nə zɔ̀ nu ŋkɨə faŋ Nwi nəə kəə yɨsə, ŋwə nuŋ fwi yi maa Nwi, faŋ ŋwə nə kee bee kɔlə yè nu kɔ́ nə yisɨ nə me. Ŋwə nə biŋ, zɔ̀nə Nwi, kɔŋ ŋkee bay kwalə, tɨ́ kaꞌ ŋwə ndɔ ŋii tey yi ghɔ vɨ vɨɨ vi, bwèy fɨ ghɔ muu. Faŋ ŋwə nə yɨ̀ nɨniŋ nə, ŋwə də tɨ́ vɨɨ laa nsɔꞌ Nwi ndɔ luu tɔ vəŋ. Ŋwə baa luu gù wə faŋ Nwi nə ndi ŋwə yaa wuu loomə, buꞌ laa ŋwə nə nùŋ fwi yi maa Nwi.

⁸ Gə fɨ maa Abraham, ŋwə nə nùŋ fwi yi maa Nwi, maa yighee njyə faŋ Nwi nə tìi ŋwə, gì tɨ́ ŋwə laa ŋwə ndɔ fɨ nsi, gə̀ maa shəŋ ŋkɨə faŋ Nwi taa də tɨ́ ŋwə, buu ŋwə ndɔ kii shəŋ kɔ́ nə. Ŋwə nə biŋ, zɔ̀nə Nwi, ndɔ̀ fɨ nsi, mèꞌtə shəŋ ki, ndɔ̀, faŋ ŋwə nə kee kɔlə kɨ̀ɨ nə shəŋ ŋkɨə faŋ ŋwə gə shɔ nə me.

⁹ Ŋwə baa luu nùŋ fwi yi maa Nwi, faŋ ŋwə nə gə shì maa shəŋ ŋkɨə faŋ Nwi nə də̀ tɨ́ ŋwə nə, shì shɔ yaa ndɔ faŋ ŋkə ndɔ̀ fɨ shəŋ day, shì shɔ sheꞌ taa vəbee ghɔ ŋwiŋ wi Isak, nə Jeykob, wee Isak, faŋ Nwi nə kɔ́ꞌnə maa mətaa kɔ shəŋ kɔ́ tɨ́ vəŋ nə.

¹⁰ Abraham nəə kɨꞌ laa Nwi ndɔ kɔ shɨ weꞌ tɨ́ ŋwə faŋ fìanə nshɨ-tɔ Nwi tɨ́ ŋwə, faŋ ŋkə tɨ̀ŋnə weꞌ, tɨ́ kaꞌ ŋkə kee gù me.

¹¹ Sheꞌ nɨniŋ, zu wi Sara nə nùŋ fwi yi maa Nwi, buu Nwi kɔ wutə tɨ́ ŋwə laa ŋwə gɔ wee, bì wee, faŋ ŋwə nə shɔ̀ɔ maa məbi wee. Ŋkə nə gày buꞌ laa ŋwə nə nùŋ fwi yi maa Nwi laa Nwi tɨŋnə, wèꞌ maa nu faŋ Nwi kɔ̀ꞌnə.

¹² Nɨniŋ, Abraham nə bì wee maa yighee njyə faŋ ŋwə nə duꞌtə ŋwə dwàŋ, kɨ kɨꞌ yiku. Faŋ ŋwə nɨnɔŋ nə kɔlə ta sə̀mə nə, kɨ gu tɨɨ vɨɨ vəyaŋ, faŋ vəŋ lùu yaa məjwiŋ fɨ taa yizɔ, baa lùu yaa waꞌsə fɨ taa muu, faŋ kaꞌ vɨ kee say me.

¹³ Vɨɨ ywaŋ-vɨsɨ vɔ́ vənshə nə nùŋ fwisə vəŋ maa Nwi, gə ziꞌ maa shi yiku vəŋ. Vənu mbɨə faŋ Nwi nə kɔ̀ꞌnə maa məkɔ tɨ́ vəŋ, nə kee ziꞌ ghɔ vəŋ me. Vəŋ nə yè vənu vɔ́ sheꞌ fɨ ntaŋ, ŋàytə shɔ, biŋ ntee laa vəŋ luu sheꞌ vəndɔ shɨ nsi nyə̀.

¹⁴ Maa vɨɨ faŋ vəŋ gì laa vəŋ lùu vəndɔ shɨ nsi, də̀ tɨ́ vɨɨ ntee laa vəŋ kəə shəŋ mɔ́ꞌ faŋ lùu shɨ vəŋ.

¹⁵ Faŋ vəŋ nə gì nɨniŋ, vəŋ nə kee baa bɨ̀ꞌtə nu kɔ̀ŋ shəŋ ŋkɨə faŋ vəŋ nə ndɔ̀ fɨ fuŋ nə me. Ŋkə nəə toꞌ lùu laa vəŋ nə bɨꞌtə nɨniŋ, buu vəŋ yè jɨɨ maa məbəŋ gə̀ shɔ.

¹⁶ Luu nə, vəŋ nəə kəə shəŋ kəmɔ́ꞌ faŋ ŋkə lùu kəjəə shɔ̀ɔ shɨ vəŋ. Luu shəŋ ŋkɨə faŋ ŋkə lùu yɨ Nwi yizɔ. Nɨniŋ, tɔ Nwi kee dɨdɨɨ me, faŋ vəŋ tìi Nwi nə tɨɨ vəŋ, buꞌ laa Nwi duꞌtə Nwi naysə shəŋ tɨ́ vəŋ.

¹⁷ Abraham nə baa luu nùŋ fwi yi maa Nwi maa yighee njyə faŋ Nwi nə mɔŋ ŋwə, gì laa ŋwə taa ndi Isak, faŋ nə luu sheꞌ yigɨꞌ ŋwiŋ wi nə, kɔ̀ Nwi shɔ. Abraham biŋ, kɨ kəə kɔ, faŋ Nwi nə kɔlə kɔ̀ꞌnə ŋwə fɨshi laa,

¹⁸ ndɔ luu buꞌ Isak faŋ Abraham ndɔ kii ŋgwisə yi yiyaŋ nə.

¹⁹ Abraham nə biŋ, nùŋ fwi yi maa Nwi, laa kaꞌ Nwi ywèysə Isak fɨ shɨ yiku. Yinsəŋ, Isak nə luu yaa wə faŋ ŋwə ywèy fɨ ghɔ yiku, yè Abraham fi.

²⁰ Isak nə nùŋ fwi yi maa Nwi nɨzi, faŋ ŋwə nə tù mənɔŋ-bwaŋnə tɔ Jeykob ghɔ Esaw. Ŋwə nə gì nu kɔ̀ŋ mənɔŋ-bwaŋnə faŋ ŋwə ndɔ jwi ye vəŋ.

²¹ Nə luu sheꞌ nɨndɨŋ nə Jeykob. Ŋwə nə nùŋ fwi yi maa Nwi, buu tù mənɔŋ-bwaŋnə tɔ vaŋ Josef, maa yighee njyə faŋ ŋwə nəə kəə ku. Ŋwə nə shɔ̀ꞌtə Nwi, yɨ̀ꞌtə maa mbay yi.

²² Gə fɨ maa Josef, ŋwə nə nùŋ fwi yi maa Nwi nɨzi. Yighee njyə faŋ ŋwə nəə kəə ku, ŋwə nə gì nu kɔ̀ŋ məfuu faŋ vɨɨ Isirayl ndɔ fuu fɨ shɨ Ijip, baa nàysə nu ŋkɨə faŋ vɨ taa ndi ŋku ŋwaa ki, yɨ̀ shɔ.

²³ Gə fɨ maa Mose, vətɨɨ vi nə nùŋ fwi vəŋ maa Nwi, buu baꞌsə ŋwə, ndɨ̀ə taa ŋii maa yiŋuu yitia, faŋ vɨ nə bì ŋwə. Vəŋ nə yɨ̀ nɨniŋ, kee fèe sɔꞌ fwàŋ me, buꞌ faŋ vəŋ nə ye laa Mose nə luu wee jəə.

²⁴ Mose ta, baa luu nùŋ fwi yi maa Nwi, kee biŋ laa yi lùu wee wee fwàŋ Farao me, faŋ nə luu fwàŋ fɨ shɨ Ijip nə.

²⁵ Ŋwə nə gì laa bàw laa yi ye ŋɨꞌ ghɔ vɨ vɨɨ Isirayl, shɔ̀ɔ fɨ ghɔ yi kìi fwi yijəə ntoꞌ fwàŋ Farao, buꞌ laa məŋaytə faŋ ŋwə fùu fɨ taa nu bwə, kee tɨtay me.

²⁶ Ŋwə nə ndì yaa yinsəŋ laa, kɨ luu yi ye ŋɨꞌ buꞌ vɨɨ Nwi, buu ŋkə taa baw tɨ́ ŋwə, shɔ̀ɔ faŋ ŋwə kìi yifwàŋ yinshə fɨ shɨ Ijip, sheꞌ faŋ Kristo nə mèꞌtə məbaw wi yɨ Nwi, jwì yè ŋɨꞌ shɨ nsi, kù fuu fəŋkɔꞌ nə. Mose nə yɨ̀ nɨniŋ, buꞌ laa ŋwə nə tə̀ sɨ ghi sheꞌ maa vəkeynə mbɨə faŋ mbə ndɔ jwi fɨ ghɔ Nwi.

²⁷ Ŋwə nə baa luu nùŋ fwi yi maa Nwi, faŋ ŋwə nə fùu fɨ shɨ Ijip, kee fèe məshəsə fwàŋ Farao me. Ŋwə nə kà fwi yi yaa wə faŋ ŋwə ye Nwi, faŋ kaꞌ wə mənsaw kee yiye me.

²⁸ Nə baa luu buꞌ məbiŋ wi maa Nwi, laa ŋwə nə nàysə tɨ́ vɨɨ Isirayl laa vəŋ fɔꞌ mənshi maa təkwaa tə shuu ndɔꞌ vəŋ, tɨ́ kaꞌ nshiiŋii Nwi ŋgwə faŋ ŋwə nə jwi nə yiku nə, taa kɨ jwi shɔɔ, kee zwìlə mfɔŋsə vaŋ-vəndɔŋ vəŋ me. Lùu faŋ ŋwə nə zì nu yitianə njyə faŋ vɨ tii nə Pasa nə.

²⁹ Vɨɨ Isirayl nɨzi, nə nùŋ fwisə vəŋ maa Nwi, buu tɔŋ fɨ taa mamuu ŋgwə faŋ vɨ tii nə mamuu bay nə. Muu mbɔ́ shianə, vəŋ toꞌ luu fɨ nsi yiyɔŋ. Vɨɨ Ijip kɨ nii jwì, kɨ kəə jɔmə vəŋ, muu mbɔ́ bəŋ jwì, shìtə vəŋ, vəŋ nu muu kùkə vənshə.

³⁰ Nə baa luu buꞌ məbiŋ vɨɨ Isirayl, faŋ vəŋ nə nùŋ fwi vəŋ maa Nwi, laa ŋkɔꞌ ntɨꞌ Jeriko bɨꞌkə gù nsi. Nə luu ŋkɔꞌ yiweꞌ faŋ vɨ nə bɔ̀ŋ nə ŋoꞌsə, faŋ nyə nə kìa ntɨꞌ Jeriko kənshə. Yighee njyə faŋ vɨɨ Isirayl nə toꞌ kìa ŋkɔꞌ yɔ́ maa vəshi kwatia, Nwi yɨsə ŋkɔꞌ yɔ́ gu.

³¹ Gə fɨ maa Rahab, wəzwi sakə wì, faŋ ŋwə nə shi Jeriko nə, ŋwə nə nùŋ fwi yi maa Nwi, buu nyɨŋ fɨ ghɔ yiku, maa yighee njyə faŋ vɨ nə ndìsə vɨɨ vənshə faŋ vəŋ nə kee bìŋ Nwi me. Ŋwə nə kee yiku me, buꞌ laa ŋwə nə ndì ŋkisə vɨɨ Isirayl, nùŋ taa ŋii ŋwə nə fwi yijəə.

³² Nɨniŋ nə, kaꞌ mə kɨ gə nə vɨsɨ. Vənu kɨ bii vəyaŋ. Luu nə, yighee kee lùu shɔ, tɨ́ kaꞌ mə gì nu kɔ̀ŋ Gidiɔn me, tɨꞌnə me kɔ̀ŋ Barak nə Samsən nə Jefta nə Deyvid nə Samuel, baa nə vɨɨ vənshə faŋ vəŋ nəə fɨꞌtə yigisə shuu Nwi nə me.

³³ Vəŋ vənshə nə nùŋ fwisə vəŋ maa Nwi, faŋ vəŋ nə tùŋ yighaw ghɔ vɨ məshɨ məmɔ́ꞌ, ghɔꞌ vəŋ. Vəŋ nə sɔ̀ꞌ maa jɨɨ yijəə. Vətɔ faŋ Nwi nə kɔ̀ꞌnə maa məkɔ tɨ́ vəŋ, nə zìꞌ ghɔ vəŋ. Nwi nə yɨ̀ laa kɨ vəbikəə kwə vəŋ me.

³⁴ Vəŋ nə ŋìi taa wisə biinə, nu kee kɔ̀ŋ vəŋ me. Vəŋ nə baa nyɨ̀ŋkə fɨ ghɔ yighaw. Nwi nə kɔ̀ wutə tɨ́ vəŋ faŋ vəŋ nəə bɨbwa. Vəŋ nə gù vɨɨ yighaw weꞌnə, jɔ̀ŋ məshɨ mə tɔŋ məmɔ́ꞌ, vəŋ nyɨŋkə.

³⁵ Nwi nə baa luu yɨ̀sə vəki vəmɔ́ꞌ nə yè vɨɨ vəŋ, faŋ vəŋ nə kukə̀, faŋ vəŋ ywèy fɨ shɨ yiku. Vɨɨ mɔ́ꞌ nə yè ŋɨꞌ fɨ ghɔ vɨɨ mbeenə Nwi, kùkə . Vəŋ nə kee twey Nwi, tɨ́ la vɨ meꞌtə vəŋ me, buꞌ laa vəŋ nə nùŋ fwi vəŋ maa Nwi, laa vəŋ ndɔ ywey fɨ shɨ yiku, kìi məbwey jəə fɨ yizɔ.

³⁶ Vɨɨ mɔ́ꞌ nə ye ŋɨꞌ faŋ vɨɨ nə shɨꞌ vəŋ buꞌ nu Nwi, saŋ vəŋ nə vəmfa. Vɨ nə ka vəŋ nə vəsumə, mɔ̀ꞌ taa ŋii mfiŋ.

³⁷ Vɨɨ mɔ́ꞌ nə luu shɔ faŋ vɨ nəə tumə vəŋ nə ŋoꞌsə, vəŋ kukə. Vɨɨ mɔ́ꞌ nə luu shɔ faŋ vɨ nə shètə vəŋ vəkwi vəbɔɔ. Vɨɨ mɔ́ꞌ shɔ faŋ vɨ nə zwìlə vəŋ nə vəbaꞌ. Vɨɨ mɔ́ꞌ nə tòꞌ yaa mbəəsə, shuŋ sheꞌ gɔsə bisə, vɨ kɔ ŋɨꞌ tɨ́ vəŋ dɨdɨꞌ vəshəŋ vəshəŋ, jɨŋ baa zasə vəŋ.

³⁸ Vɨɨ vɔ́ vənshə nə baw shɔ̀ɔ. Vɨɨ fɨ taa mbi nyə̀ nə kee kùꞌnə maa məkii vəŋ me. Vəŋ nəə toꞌ fuŋ fɨ taa tətɔɔ nə taa təgay, shi taa təŋɔŋ taa baŋsə.

³⁹ Vɨɨ vɔ́ vənshə nə yɨsə fwi Nwi baw, buꞌ laa vəŋ nə nùŋ fwisə vəŋ maa Nwi. Luu nə, vəŋ nə kee ta yè nu ŋkɨə faŋ Nwi nə kɔ̀ꞌnə maa məkɔ tɨ́ vɨɨ nə me.

⁴⁰ Lùu nɨniŋ buꞌ laa Nwi nə bìa nu faŋ luu ŋkee nu jəə tɨ́ nsiŋ. Nwi nə bia laa ŋwə ndɔ ndi nsiŋ vɨ vəŋ, yɨ̀sə nsiŋ vənshə ndɔ zɨ məbwey vəlwaŋ shɨ Nwi.