Hibru 10 - Vengo (Babungo)

Faŋ ndeysə vɨɨ Jus kee yikuꞌnə me. Kii sheꞌ ndey Kristo faŋ ŋwə nə kù tɔ nsiŋ nə, kìi wutə

¹ Ntɨsə vɨɨ Jus fɨ̀nə vənu vəjəəvə mbɨə faŋ mbə ndɔ jwi nə. Luu nə, nsə kee bee luu ŋkee vənu vɔ́ me. Maa vɨɨ məfeꞌ Nwi gə kɔ Nwi ŋuꞌ nə ŋuꞌ. Sii kaꞌ wə yɨsə vɨɨ faŋ vəŋ kəə shəŋtə yɨ Nwi, lùu vəley buꞌ ndeysə kɨkə? Jɨɨ kee lùu shɔ me.

² Ŋkə nəə toꞌ lùu nɨniŋ, buu vɨɨ kee baa kɨ feꞌ ndeysə me. Ndeysə sɔ́ nəə toꞌ yɨsə vəŋ ley yighee muꞌ, buu fwisə vəŋ ley, vəŋ kee baa kìi nu maa məbaa kɨ feꞌ ndey yimɔ́ꞌ me.

³ Luu nə, ndeysə sɔ́ faŋ vɨ feꞌ ŋuꞌ nə ŋuꞌ nə, yɨsə vɨɨ lumə nu bwə vəŋ faŋ vəŋ yɨ̀sə nə ghee ghee.

⁴ Maa kɨ kaꞌ mənshi mə nyaa, tɨꞌnə me, mənshi mə bi kee kìi wutə maa məsɔ yibɨsə vɨɨ me.

⁵ Lùu faŋ vɨ nyɔ̀ꞌ taa ŋwaꞌlə Nwi laa, yighee njyə faŋ Kristo nəə kəə jwi shɨ nsi, ŋwə nə gì tɨ́ Nwi laa, «A kee kàw ndey faŋ vɨ fèꞌ nə mənshi mə nyaa nə me. Luu nə, a bɔ̀ŋ ŋwaa ŋwaa shee.

⁶ A nə kee kàw faŋ vɨɨ nə ndì vətɔ yaa nyaasə, twàŋ, kɔ̀ tɨ́ ghɔ me, tɨꞌnə me faŋ vəŋ feꞌ ndeysə laa vəŋ sɔ yibɨsə vəŋ shɔ nə me.

⁷ Nɨniŋ, mə gì laa, ye mə nə, mɔɔ Nwi, mə jwì laa mə jwi yɨ̀sə nu ŋkɨə faŋ a kəə laa mə kɨ yɨ, faŋ vɨ nyɔ̀ꞌ kɔ̀ŋ mə taa ŋwaꞌlə Nwi.»

⁸ Faŋ ŋwə nə gì nɨniŋ, mfɔŋ nu yi faŋ ŋwə nə gì, lùu laa Nwi kee kəə laa vɨɨ ndi nyaasə nə vətɔ vəmɔ́ꞌ, fèꞌ ndeysə shɔ tɨ́ Nwi me, tɨꞌnə me twàŋ nyaasə tɨ́ Nwi me, tɨꞌnə me fèꞌ ndey laa vəŋ sɔ yibɨsə vəŋ me. Kəŋ vənu vɔ́ kee yɨsə fwi Nwi baw me. Ŋwə nə gì nɨniŋ, faŋ vɨɨ nəə kɔlə feꞌ ndeysə sɔ́ buꞌ ntɨsə Nwi nə.

⁹ Ŋwə baa gì laa, yi jwì maa məyɨ nu ŋkɨə faŋ Nwi kəə laa yi yɨsə. Nɨniŋ, ŋwə baꞌsə vənu vəmwavə, nùŋsə vəfivə.

¹⁰ Lùu nu ŋkɨə faŋ ŋkə yɨ̀sə laa nsiŋ ley vɨsɨ Nwi. Nsiŋ lùu vəley buꞌ laa Yeso Kristo nə yɨ̀sə nu ŋkɨə faŋ Nwi kəə laa ŋwə yɨ. Ŋwə nə kɔ̀ ŋwaa wi yaa ndey tɨ́ Nwi, kù tɔ nsiŋ yighee muꞌ.

¹¹ Gə fɨ maa kwiŋ vɨɨ məfeꞌ Nwi vɨɨ Jus, vəŋ vənshə tɨ̀ŋnə maa shəŋ məkɔ Nwi shi shi, faꞌ faꞌ vəŋ tɨ́ Nwi shɔ. Vəŋ ndi nyaasə, feꞌ sheꞌ kəŋ ndey yimuꞌ shɔ ghee nshə, faŋ kəŋ ndeysə sɔ́ kee bee kìi wutə maa məbaꞌsə nu bwə faŋ vɨɨ yɨ̀sə nə me.

¹² Gə fɨ maa Yeso Kristo, ŋwə nə fèꞌ ndey sheꞌ yimuꞌ faŋ nyə kìi wutə maa məbaꞌsə yibɨsə vɨɨ yighee muꞌ. Ŋwə kɨ nii gə̀ dùꞌ fuu ŋkaw kwi maa kwiŋ Nwi maꞌnə.

¹³ Lùu shəŋ ŋkɨə faŋ ŋwə lùu shɔ, kɨꞌ vɨɨ mbeenə vi laa Nwi kɔ vəŋ, ŋwə tə ghuu ghi tɔ vəŋ.

¹⁴ Nɨniŋ, Kristo nə fèꞌ ndey yimuꞌ, yɨ̀sə laa vɨɨ mbɨə faŋ vəŋ lùu vəley buꞌ ŋwə nə, ndɔ zɨ məbwey vəlwaŋ nɨzi, faŋ ŋwə gòꞌsə yighee muꞌ.

¹⁵ Zwitə Ley Nwi dəsə tɨ́ nsiŋ laa vənu vɔ́ lùu yinsəŋ, buꞌ laa ŋkə luu sheꞌ faŋ vɨ nyɔ̀ꞌ taa ŋwaꞌlə Nwi laa,

¹⁶ Nwi nə gì laa, «Lùu məkee nə, faŋ yia vɨ vəŋ ndɔ gwia faŋ yighee ndɔ kuꞌ.» Ŋwə baa kɨ nii gì laa, «Mə ndɔ yɨsə vəŋ kɨɨ nə ntɨ saŋ, nùŋ fwisə vəŋ shɔ.

¹⁷ Mə kee ndɔ baa lumə vənu vəbwəvə, faŋ vəŋ nə yɨ̀sə nə me, baa nə jɨɨ njyə faŋ vəŋ bɨ̀sə ntɨ saŋ me.»

¹⁸ Faŋ Nwi duꞌtə Nwi ndenə nu bwə vɨɨ nə, kee baa bàw laa vɨɨ baa kɨ feꞌ ndeysə laa nsə sɔ yibɨsə vəŋ me.

Faŋ bàw laa nsiŋ tɨŋnə weꞌ taa nu Nwi

¹⁹ Vaŋ-nshwi vaŋ, buꞌ mənshi mbɨə faŋ Yeso nə tùtə, faŋ ŋwə nə kù nə, vɨ ŋàꞌsə jɨɨ laa nsiŋ shɔɔ gə̀ maa shəŋ ŋkɨə faŋ Nwi lùu shɔ nə. Nsiŋ kɔꞌ kɨɨ laa fa kee fə̀ŋ nsiŋ shɔ me.

²⁰ Yeso nə ŋàꞌsə jɨɨ yifi yɔ́ nə mənshi mi. Nshɨ-tɔ Yeso lùu jɨɨ tɨ́ nsiŋ, faŋ kaꞌ nsiŋ shɔ̀ɔ fɨ fuŋ, gə̀ shəŋ ŋkɨə faŋ Nwi lùu shɔ. Ŋwə lùu yaa njwi shuufɔ faŋ nyə yaa kɨ shitə shəŋ ley Nwi taa vəbee və Nwi nə; kaꞌ wə kee gə yɨ Nwi, tɨ̀ lɨꞌ ŋwə shɔ̀ɔ fɨ yifi me.

²¹ Kaꞌ nsiŋ gə yɨ Nwi, buꞌ laa nsiŋ kìi wuu kwalə məfeꞌ Nwi, faŋ lùu Yeso, faŋ ŋwə ndeynə vɨɨ Nwi.

²² Nɨniŋ, bàw nsiŋ nuŋ fwi saŋ-nsiŋ maa Yeso, jwì yɨ Nwi nə fwi yiley, buꞌ laa mənshi mə Yeso yɨsə fwi saŋ-nsiŋ ley. Nsiŋ lùu vɨɨ faŋ vəŋ sɔ̀ yiŋwaa yivəŋ ŋkee taa muu məleymə, faŋ nsiŋ nə fì muu mə Nwi nə.

²³ Bàw nsiŋ tɨŋnə weꞌ, kɨ kɨꞌ məbwey vəlwaŋ, faŋ nsiŋ tə̀ sɨ shɔ nə. Bàw nsiŋ baa bìŋ vənu vɔ́ ntee, buꞌ laa Nwi, faŋ ŋwə nə kɔ̀ꞌnə nu kɔ́ tɨ́ nsiŋ nə, luu wuu yinsəŋ.

²⁴ Bàw nsiŋ kɨ sɨɨnə nə vənu vaŋ-nsiŋ, nsiŋ nsiŋ, tɨ́ kaꞌ nsiŋ kɨ gaŋtə yiŋwaa nyaa-nsiŋ, nsiŋ nsiŋ, maa məkaw vɨɨ, baa nə maa məyɨ vənu vəjəəvə.

²⁵ Kɨ nsiŋ goꞌ fɨ maa nshəŋtə nyaa-nsiŋ me, faŋ vɨɨ mɔ́ꞌ yaa kɨ goꞌ nə. Nsiŋ bee kɨ kii kwaŋ wutə maa yiŋwaa nyaa-nsiŋ, nsiŋ nsiŋ, ŋkee maa yighee njyə faŋ nsiŋ kɔꞌ kɨɨ laa shi ŋkɨə faŋ Tɨta ŋwaa-nsiŋ ndɔ bəŋ jwi shɔ nə, lùu nshənə.

Faŋ nsɔꞌ Nwi yiweꞌ ndɔ luu tɔ wə ntɨə faŋ ŋwə mèꞌtə jɨɨ yinsəŋ Nwi

²⁶ Viŋ kɔꞌ kɨɨ laa, nsiŋ kɨ luu kɨ̀ɨ nə jɨɨ yinsəŋ Nwi, baa mèꞌtə jɨɨ yɔ́, kɨ toꞌ fɨ taa nu bwə, faŋ nsiŋ kɨɨ laa lùu nu bwə nə, buu ndey kee baa lùu shɔ, tɨ́ kaꞌ nsiŋ fèꞌ me, faŋ nyə taa yɨsə laa vənu vəbwəvə vaŋ-nsiŋ me me.

²⁷ Kəŋ wə ghɔ́ faŋ ŋwə yɨ̀ nɨniŋ, ŋwə duꞌ nə məfee, kɨ kɨꞌ, nsɔꞌ Nwi yiweꞌ ndɔ luu tɔ ŋwə, wisə faŋ ŋwə kɨɨ, ndɔ twaŋ ŋwə ghɔ vɨ vɨɨ mbeenə Nwi vənshə.

²⁸ Viŋ lumə nu ntɨsə Mose. Wə kɨ luu kɨ bɨsə ntɨsə sɔ́, buu vɨ taa yɨ wə ghɔ́ ku, faŋ vɨɨ vəbɔɔ, tɨꞌnə me vətia, ye laa wə ghɔ́ yɨ nu bwə.

²⁹ Faŋ ŋkə lùu nɨniŋ nə, viŋ kɔꞌ kɨɨ laa nsɔꞌ wə ntɨə faŋ ŋwə ndasə ŋkee wee Nwi, weꞌ shɔ̀ɔ. Kəŋ wə ghɔ́ ndì yiku Yeso, faŋ Nwi nə gwìa məkee shɔ tɨ́ nsiŋ nə, yaa nu dayday, baa shiasə Zwitə Nwi faŋ ŋkə jwi nə mənɔŋ-bwaŋnə nə. Nsɔꞌ kəŋ wə ghɔ́ weꞌ shɔ̀ɔ.

³⁰ Nsiŋ kɔꞌ kɨɨ laa Nwi nə gì laa, «Nu məndɔꞌ ntwi lùu nu kaŋ. Lùu mə faŋ mə ndɔ shia nsɔꞌ tɔ wə.» Shəŋ kəmɔ́ꞌ taa ŋwaꞌlə Nwi gì laa, «Tɨta Nwi ndɔ sɔꞌ nsɔꞌsə vɨɨ vi.»

³¹ Lùu nu ŋwaa nyɔɔtə tɨ́ wə ntɨə faŋ ŋwə ŋìi nsɔꞌ Nwi, faŋ lùu Nwi bwey.

³² Viŋ lumə yighee njyə faŋ viŋ nə fɔŋ bìŋ nu Kristo nə. Maa yighee yɔ́ viŋ nə ye ŋɨꞌ buꞌ nu Kristo dɨdɨꞌ. Luu nə, viŋ nə kà fwi yiŋ, tɨ̀ŋnə weꞌ.

³³ Vɨɨ mɔ́ꞌ fɨ taa ŋwaa viŋ nə yè ŋɨꞌ dɨdɨꞌ, buꞌ faŋ vɨ nə ndasə vəŋ jɨɨsə jɨɨsə, yɨsə vənu vəbwəvə maa vəŋ ntee. Vɨɨ mɔ́ꞌ shɔ faŋ vəŋ nə kee ŋii ŋkee taa ŋɨꞌ yɔ́ me, luu nə, gàŋtə vɨɨ mbɨə faŋ vəŋ nə yè ŋɨꞌ nə.

³⁴ Viŋ nəə ye ŋɨꞌ, viŋ vɨ vɨɨ ŋii mfiŋ, faŋ vɨ nə kwàŋ vəŋ mfiŋ buꞌ nu Nwi nə. Viŋ nə jìa fwi nə məŋaytə faŋ vɨɨ sa vətɔ viŋ, buꞌ laa viŋ lùu vɨɨ Nwi nə. Viŋ nə yɨ̀ nɨniŋ, buꞌ faŋ viŋ nəə kɔꞌ kɨɨ laa viŋ kìi vətɔ faŋ mbə shɔ̀ɔ yimbii, faŋ mbə ndɔ goꞌsə yighee muꞌ.

³⁵ Nɨniŋ, kɨ fwi yiŋ bwa me, buꞌ laa vɨɨ mbɨə faŋ vəŋ nùŋ fwi vəŋ maa Nwi, gə ziꞌ maa vəndwə, ndɔ kii vəkeynə vəkwalə.

³⁶ Nu ŋkɨə faŋ ŋkə bàw tɨ́ viŋ, lùu laa viŋ goꞌsə viŋ vɨ Kristo, kee bwa me, tɨ́ kaꞌ viŋ kɨ yɨsə nu ŋkɨə faŋ too Nwi kàw, buu viŋ taa fi məbwey vəlwaŋ faŋ Nwi nə kɔꞌnə tɨ́ viŋ nə.

³⁷ Vɨ nyɔ̀ꞌ taa ŋwaꞌlə Nwi laa, «Fɨkɨꞌ nee, wə ntɨə faŋ ŋwə taa jwi nə, ŋwə taa jwi ziꞌ, ŋwə kee taa betə me,»

³⁸ baa nə laa, «Wuu loomə ŋwaa ndɔ zɨ məbwey vəlwaŋ, buꞌ laa ŋwə nùŋ fwi yi maa mə,» baa nə laa, «Wə kɨ luu kɨ bəŋ yiba, buu fwi Nwi kee taa ley maa ŋwə me.»

³⁹ Gə fɨ maa nsiŋ, nsiŋ kee lùu kəŋ vɨɨ vɔ́ faŋ vəŋ taa bəŋ suꞌtə ghuu vəŋ nə, kɨ nii yindi me. Nsiŋ bee kɨ kii biŋ nu Kristo, buu ndɔ zɨ məbwey vəlwaŋ.