Hibru 1 - Vengo (Babungo)

Faŋ Yeso Kristo, Wee Nwi, kwàlə shɔ̀ɔ nshiisə-ŋiisə Nwi

¹ Ŋkee fɨshi Nwi nə gì yigi tɨ́ vɨɨ ywaŋ-vɨsɨ ghee yaŋ maa jɨɨsə nɨŋkwiŋ nɨŋkwiŋ. Maa yighee yɔ́, Nwi nəə gisə vənu, mbə shɔɔ fɨ ghɔ nshiisə-ŋii sɔghɔ.

² Maa yighee ndwə, faŋ lùu yighee yiba, ŋwə gi yigi tɨ́ nsiŋ, nyə shɔɔ fɨ ghɔ ŋwiŋ wi. Nə luu ghɔ ŋwiŋ wi ghɔ́ faŋ Nwi nə bɔ̀ŋ mbi. Nwi nə baa shòꞌ ŋwə laa kìi ŋwə kìi vətɔ vənshə.

³ Wee Nwi ghɔ́ lùu məley Nwi; wutə Nwi taa ŋwaa ŋwə. Ŋkɨꞌnə yi lùu yaa njyə Nwi. Kìi ŋwə kìi wutə maa mbi yinshə sheꞌ fɨ maa yigisə yi. Ŋwə lòotə jɨɨ, sɔ̀ yibɨsə vɨɨ laa vəŋ ley. Ŋwə baa luu koꞌ gə̀ yizɔ, dùꞌ maa kwiŋ maꞌnə Nwi, faŋ ŋwə sɔ̀ꞌ vətɔ vənshə.

⁴ Nɨniŋ, Nwi nə yɨ̀ laa ŋwiŋ wi ghɔ́ kwàlə shɔ̀ɔ nshiisə-ŋiisə Nwi. Yizii yi faŋ Nwi nə shù maa ŋwə, shɔ̀ɔ təzii tənshə.

⁵ Nwi nə gì tɨ́ ŋwə laa, «A lùu ŋwiŋ ŋwaa. Nshɨ-tɔ ŋwaa nə bì ghɔ ndee.» Nwi nə baa luu gì tɨ́ ŋwə laa, «A lùu ŋwiŋ ŋwaa, mə luu tii wə.» Nshiiŋii Nwi kee lùu shɔ, faŋ Nwi nə gì kəŋ nu ghɔ́ tɨ́ ŋwə me. Nwi nə gì nɨniŋ sheꞌ tɨ́ ŋwiŋ wi Yeso Kristo.

⁶ Ŋwə nə baa gì kɔ̀ŋ yighee njyə faŋ Nwi ndɔ baa yɨsə ŋwiŋ wi ŋii mbi laa, «Nshiisə-ŋiisə Nwi sənshə gwenə ŋwə.»

⁷ Gə̀ fɨ maa nshiisə-ŋiisə Nwi, Nwi nə gì laa, «Nwi nàysə nshiisə-ŋii si, laa vəŋ lùu yaa vəfɨɨ, baa bɔ̀ŋ vɨɨ faꞌ vi laa vəŋ lùu yaa wisə biinə.»

⁸ Gə̀ fɨ maa ŋwiŋ wi, Nwi nə gì tɨ́ ŋwə laa, «Ghɔ Nwi, yifwàŋ yə ndɔ goꞌsə yighee muꞌ, a sɔꞌ yifwàŋ yə nə yinsəŋ.

⁹ Lùu vənu və yinsəŋ faŋ mbə yɨsə a ŋaytə, a bee vənu mbɨə faŋ mbə bɨsə ntɨsə Nwi. Lùu ŋiꞌ nu ŋkɨə faŋ Nwi, faŋ lùu Nwi wə, shoꞌ ghɔ laa a kii məkwalə nə məŋaytə shɔ̀ɔ vaŋ-nshwi və.»

¹⁰ Ŋwə nə baa gì laa, «Tɨta, nə luu ghɔ faŋ ghɔ nə bɔ̀ŋ mbi ŋkee fɨshi maa vənzi. A nə baa bɔ̀ŋ vətɔ fɨ yizɔ nə ghɔ ghə.

¹¹ Vətɔ vɔ́ vənshə faŋ a nə bɔŋ nə, ndɔ ndi, nshɨ-tɔ wə goꞌsə yighee muꞌ. Vətɔ vɔ́ ndɔ ta dwàŋ, yaa njwisə yaa kɨ dwaŋ nə.

¹² A buꞌ nə vətɔ vɔ́ yaa njwi yimɔ́ꞌ faŋ nyə dwàŋ, mbə ndɔ kwiinə yaa njwi yaa kɨ kwiinə nə. Luu nə, gə̀ fɨ maa ghɔ, a goꞌsə yighee muꞌ, ŋuꞌsə sə kee kìi vəndwə me.»

¹³ Nwi nə gì tɨ́ ŋwiŋ wi laa, «Duꞌ maa kwiŋ maꞌnə ŋwaa, zìꞌ maa yighee njyə faŋ mə taa ghɔꞌ vɨɨ mbeenə və, ndɨ̀ vəŋ, nùŋsə ghuu ghɔ yaa fa faŋ kaꞌ a tə̀ ghuu ghə shɔ.» Nshiiŋii Nwi kee lùu shɔ faŋ Nwi nə gì kəŋ nu ghɔ́ tɨ́ ŋwə me.

¹⁴ Nshiisə-ŋiisə Nwi sənshə luu sheꞌ vəzwitə faŋ vəŋ faꞌ tɨ́ Nwi, faŋ ŋwə tɔ̀ŋ vəŋ laa vəŋ gə gàŋtə vɨɨ mbɨə faŋ Nwi taa bweysə vəŋ nə.