Filipi 4 - Vengo (Babungo)

Faŋ ŋkə bàw laa viŋ kɨ toꞌ nə nshinə yiley nə məŋaytə

¹ Vaŋ-nshwi vaŋ, faŋ mə kàw viŋ, baa kaw maa məye viŋ, yaa kɨ yɨ viŋ laa fwi nyaa kɨ kii məŋaytə. Viŋ lùu vəkeynə vaŋ fɨ ghɔ Nwi. Vɨɨmba vaŋ, viŋ kɨ tɨŋnə weꞌ maa nu Nwi, sheꞌ faŋ mə duꞌtə mə naysə tɨ́ viŋ nə.

² Mə kìi nu maa mənaysə tɨ́ Yiodia nə Sintayki. Ŋkə lùu laa, mə gì tɨ́ viŋ ŋkee nəŋay laa, viŋ luu nə fa kəmuꞌ maa yizii tɨta Yeso.

³ Mə buꞌ ghɔ tɨ́ Sisigɔs, faŋ yia ŋwə nə fàꞌ mɔ́ꞌ nə, laa ŋwə gaŋtə vəki vɔ́, tɨ́ kaꞌ vəŋ baa kɨ duꞌ bwaŋnə, buꞌ laa yia vɨ vəŋ nə kɨ̀ɨtə mɔ́ꞌ yighee vɨsɨ buꞌ nu Nwi nə, sheꞌ yuu Klement nə vɨɨ mɔ́ꞌ faŋ vəŋ beꞌsə yia nə. Nwi nyɔ̀ꞌ təzii təvəŋ taa ŋwaꞌlə məbwey vəlwaŋ.

⁴ Viŋ zɔ, mə gì tɨ́ vɨɨ Kristo vənshə; viŋ kɨ ŋaytə ghee nshə, buꞌ faŋ viŋ lùu vɨɨ Kristo nə. Mə baa kɨ gi laa viŋ kɨ ŋaytə.

⁵ Viŋ kɨ yɨsə vənu maa jɨɨ yijəə, tɨ́ kaꞌ vɨɨ vənshə taa ye laa viŋ lùu vɨɨ bwaŋnə. Viŋ kɨ lumə laa tɨta Yeso luu nshənə.

⁶ Kɨ viŋ baa kɨ ghaysə ŋwaa kɔ̀ŋ vətɔ faŋ kaꞌ mbə taa bəə fɨ ghɔ viŋ me. Viŋ kɨ kii bee shɔꞌtə Nwi ghee nshə, kɨ naysə vətɔ mbɨə faŋ viŋ kəə tɨ́ Nwi. Faŋ viŋ ndwaŋ Nwi, bàw viŋ baa bwàŋ ŋwə nɨzi.

⁷ Viŋ yɨ nɨniŋ, buu Nwi taa kɔ məduꞌ-nyɔŋ tɨ́ viŋ, faŋ luu nu kwalə shɔ̀ɔ vənu vənshə faŋ kaꞌ wə bɨꞌtə fɨ tɔ ŋwə. Nu kɔ́ kɔ fwi yizutə tɨ́ viŋ, yɨ laa nu kee baa luu shɔ bùulə mbɨꞌtə yiŋ me, faŋ viŋ nùŋ fwi siŋ maa Yeso Kristo nə.

⁸ Vaŋ-nshwi vaŋ, vəndwə və yigi vaŋ lùu laa, viŋ nuŋsə mbɨꞌtə yiŋ sheꞌ maa nu ŋkɨə faŋ ŋkə lùu yinsəŋ, nə ŋkɨə faŋ ŋkə kùꞌnə tɨ́ vɨɨ Nwi, nə ŋkɨə faŋ ŋkə lùu kəloomə, baa lùu kəley, baa nə maa vənu mbɨə faŋ mbə kɔ məŋaytə tɨ́ vɨɨ, baa suŋtə vɨɨ. Vənu vəjəəvə vənshə, nə mbɨə faŋ mbə jwi nə məbəŋsə tɨ́ Nwi, lùu vənu mbɨə faŋ viŋ taa kɨ bɨꞌtə mbə.

⁹ Viŋ kɨ yɨsə vənu mbɨə faŋ mə nə dèesə viŋ shɔ, baa mèꞌtə taa ghɔ viŋ nə. Vənu mbɨə faŋ viŋ nə zɔ̀ fɨ ghɔ mə, baa yè faŋ mə yɨsə, lùu mbɨə faŋ viŋ taa yɨ nɨzi. Nɨniŋ nə, Nwi, faŋ ŋwə kɔ məduꞌ-nyɔŋ tɨ́ vɨɨ nə, taa goꞌsə viŋ vɨ vəŋ.

Faŋ Pɔɔl nə kɔ̀ bwaŋ-wee tɨ́ vɨɨ Nwi fɨ ntɨꞌ Filipi maa vətɔ faŋ vəŋ nə tɔ̀ŋ tɨ́ ŋwə

¹⁰ Mə ŋaytə ŋkee dɨdɨꞌ, baa bwaŋ tɨta Nwi, buꞌ laa viŋ baa tey kɨ kɨꞌ mə nə. Ŋkə gə̀ ŋkee ntaŋ, faŋ viŋ nə kɨ̀ꞌ mə nə. Nɨniŋ, mə kìi məŋaytə yaŋ ndwə. Mə kɔꞌ kɨɨ laa viŋ yaa lumə mə ghee nshə, luu nə, viŋ nə kee kìi jɨɨ kɨ gaŋtə mə me.

¹¹ Kɨ kee lùu laa mə bə̀ə fa buu gì nee me. Mə duꞌtə mə zwetə maa məduꞌ nə məŋaytə maa vənu vənshə faŋ mbə gay maa mə.

¹² Mə kɔꞌ kɨɨ maa məduꞌ taa ŋɨꞌ faŋ mə bəə vətɔ. Mə baa kɨɨ maa məduꞌ faŋ vətɔ lùu vəyaŋ. Mə duꞌtə mə ye kəŋ vənu vɔ́ vənshə, zwetə maa məjia fwi maa vənu vənshə. Mə kɨɨ nə yighee faŋ mə zɨ zwə, baa nə yighee faŋ jɨŋ zà mə. Mə kɨɨ nə yighee faŋ vətɔ yaŋ bə̀, nə yighee faŋ fa kee luu shɔ me.

¹³ Yaa kɨ weꞌsə Kristo weꞌsə mə. Ŋwə kɔ wutə shee, tɨ́ kaꞌ mə yɨ̀sə vənu vənshə.

¹⁴ Luu nə, viŋ yɨ̀ jəə faŋ viŋ gaŋtə mə maa yighee njyə faŋ mə lùu taa ŋɨꞌ nə.

¹⁵ Vɨɨ Nwi fɨ ntɨꞌ Filipi, viŋ kɔꞌ kɨɨ laa, shù fɨ faŋ mə nə bɨ tey kɨ fɨꞌtə nu Nwi tɨ́ vɨɨ fɨ shɨ Makedonia, nə gaŋtə sheꞌ viŋ gàŋtə mə. Məshəŋtə vɨɨ Nwi mɔ́ꞌ kee baa lùu shɔ, faŋ ŋwə nə fàynə ghɔ, yia vɨ vəŋ maa məshɔɔ nə vətɔ me.

¹⁶ Yighee njyə faŋ mə nə luu Tesalonika, viŋ nə tɔ̀ŋ vətɔ shee faŋ mə nəə bəə mbə nə. Viŋ nə kee yɨ̀sə nɨniŋ sheꞌ yighee muꞌ me.

¹⁷ Kɨ mə kee tə̀ sɨ maa vətɔ mbɨə faŋ viŋ tɔŋ shee nə mə. Nu ŋkɨə faŋ ŋkə lùu kəkwalə, lùu laa mə yè fɨ fuŋ laa viŋ nùŋ fwi siŋ maa nu Nwi, gə nə vɨsɨ. Lùu ŋiꞌ nu ŋkɨə faŋ mə kìi məŋaytə, buꞌ faŋ viŋ kuꞌsə vənu vəjəəvə viŋ, tɨ́ kaꞌ Nwi ndɔ key viŋ shɔ nə.

¹⁸ Mə ye vətɔ vənshə faŋ viŋ tɔ̀ŋ shee nə, mbə yaŋ shɔ̀ɔ faŋ mə kəə. Fa kee baa lùu shɔ faŋ mə bəə me, buꞌ vətɔ mbɨə faŋ viŋ tɔ̀ŋ shee, Epafroditɔs jwì nə mbə nə. Mbə lùu yaa vətɔ faŋ mbə kìi lumə jəə, baa lùu yaa ndey faŋ wə fèꞌ tɨ́ Nwi, Nwi ŋaytə shɔ.

¹⁹ Viŋ kɔꞌ kɨɨ laa Nwi ŋwaa taa kɔ vətɔ vənshə tɨ́ viŋ, faŋ viŋ bəə mbə. Nwi kìi vətɔ faŋ mbə shɔ̀ɔ ki. Ŋwə ndɔ kɔ tɨ́ viŋ ŋkee jəə buꞌ Yeso Kristo.

²⁰ Nɨniŋ, nsiŋ kɨ bəŋsə Nwi, tii ŋwaa-nsiŋ, ghee nshə. Ŋkə goꞌsə nɨniŋ.

Faŋ Pɔɔl nə shɔ̀ꞌtə vɨɨ Nwi fɨ ntɨꞌ Filipi

²¹ Shɔꞌtə vɨɨ Nwi vənshə faŋ Yeso Kristo shòꞌ vəŋ laa lùu mbii vɨɨ shee. Vaŋ-nshwi vaŋ-nsiŋ maa yizii Kristo, faŋ yia vɨ vəŋ lùu feenə, shɔꞌtə viŋ nɨzi.

²² Vɨɨ ley Nwi vənshə fɨ feenə shɔꞌtə viŋ. Ŋkee vɨɨ mbɨə faŋ vəŋ shi ntoꞌ fwàŋ Kaysa, faŋ lùu vɨɨ Kristo, shɔꞌtə viŋ nɨzi.

²³ Tɨta Yeso Kristo tu mənɔŋ-bwaŋnə tɔ viŋ.