Filipi 3 - Vengo (Babungo)

Faŋ Pɔɔl nə kwìinə fwi yi

¹ Vaŋ-nshwi vaŋ, vəndwə və yigi vaŋ lùu laa, viŋ kɨ ŋaytə maa tɨta Kristo. Faŋ mə kɔlə nyɔ̀ꞌ vənu faŋ mə nə tèꞌsə nyɔ̀ꞌ nə, mə kee bee yibwa maa mənyɔꞌ vənu vɔ́ me. Yigi yɔ́ taa kɨ yɨsə viŋ weꞌ maa nu Nwi.

² Viŋ kɨ shiinə yiŋwaa yiŋ fɨ ghɔ busə sì. Viŋ kɨ shiinə fɨ ghɔ vɨɨ mbɨə faŋ vəŋ jwi kɨ deesə nu bwə taa ŋwaa viŋ, faŋ vəŋ nùŋ tɔ vəŋ sheꞌ maa nu məsɨɨtə vɨɨ nə.

³ Lùu nsiŋ lùu vɨɨ faŋ Nwi nə kɔ̀ shwenə ki tɨ́ nsiŋ. Shwenə Nwi yinsəŋ kee lùu nu məsɨɨtə wə me. Shwenə ki faŋ ŋwə kɔ̀ tɨ́ nsiŋ, lùu Zwitə Ley Nwi, faŋ ŋkə yɨsə laa nsiŋ bəŋsə Nwi, kɔ feenə tɨ́ Yeso Kristo. Nsiŋ kee nùŋsə fwi saŋ-nsiŋ maa vənu faŋ lùu vənu və shɨ nsi me.

⁴ Ŋkə yaa toꞌ lùu laa vənu və shɨ nsi luu ŋkee vənu, buu kaꞌ nshɨ-tɔ ŋwaa nùŋ fwi nyaa maa vənu vɔ́. Wə kɨ yɨ lùu shɔ faŋ ŋwə bɨꞌtə laa kaꞌ ŋwə nùŋ fwi yi maa vənu vɔ́, viŋ kɔꞌ kɨɨ laa kaꞌ mə shɔ̀ɔ ŋwə ŋkee maa vənu vɔ́.

⁵ Gə fɨ maa məbeꞌsə nshinə vɨɨ Jus, vɨ nə sɨ̀ɨtə mə ŋkee faŋ mə nə luu vəshi yifɔŋ. Mə luu ŋkee bi-gɔ fɨ shɨ Isirayl. Mə lùu fɨ maa ŋiꞌ ŋiinə Benyamin. Mə luu ŋkee wuu Hibru, faŋ bì vɨɨ Hibru. Gə fɨ maa nuŋsə vɨɨ Jus, mə luu wuu Farisii.

⁶ Mə nə luu wuu weꞌ maa nu vɨɨ Jus, kɔ ŋɨꞌ tɨ́ vɨɨ mbɨə faŋ vəŋ nəə beꞌsə Yeso. Mə nə kee bɨꞌ tuu ntɨ vɨɨ Jus yimuꞌ me. Nɨniŋ, mə nə luu ŋkee wuu ley maa vənu vɔ́.

⁷ Luu nə, faŋ mə nə kɔlə ndì vənu vɔ́ yaa sey, mə ndì yaa kəndi ndwə buꞌ Kristo.

⁸ Maa yinsəŋ, vənu vɔ́ vənshə luu kəndi shee, buꞌ laa nu məkɨɨ nə Yeso Kristo, tɨta ŋwaa, kwàlə shɔ̀ɔ vənu vənshə. Luu buꞌ ŋwə faŋ mə meꞌ vənu vɔ́ vənshə, sheꞌ laa mə bee kii kii Kristo. Vənu vɔ́ gù yaa vəbɨ shee.

⁹ Mə kəə sheꞌ laa mə goꞌsə yia ŋwə. Mə kee baa lùu wuu ley buꞌ vənu mbɨə faŋ nəə yɨsə mə me, faŋ mə nəə beꞌsə ntɨsə vɨɨ Jus nə me. Mə lùu wuu ley buꞌ laa mə nùŋ fwi nyaa maa Kristo. Nwi ndɨ̀ wə yaa wuu ley buꞌ faŋ ŋwə nùŋ fwi yi maa Kristo.

¹⁰ Nɨniŋ, nu ŋkɨə faŋ mə kəə ŋkə, luu sheꞌ laa mə kɨɨ nə Kristo, nə wutə ŋkɨə faŋ ŋkə jwi fɨ maa məywey wi fɨ shɨ yiku. Mə baa kəə laa kaꞌ mə baa luu yè fɨ maa ŋɨꞌ yi, faŋ ŋwə nə yè nə. Mə biŋ ŋkee maa məku, sheꞌ faŋ ŋwə nə biŋ yiku nə.

¹¹ Nɨniŋ laa kaꞌ mə ziꞌ maa məywey fɨ shɨ yiku yuu ŋwə nɨzi.

Faŋ ŋkə bàw laa nsiŋ kɨ toꞌ maa nu Nwi, gə nə vɨsɨ

¹² Kɨ mə kee gì laa mə duꞌtə mə kìi vətɔ mbɨə faŋ mə tə̀ sɨ shɔ nə me. Mə kee gì laa mə duꞌtə mə luu ŋkee wuu bɔŋsə me. Luu nə, mə gə nə vɨsɨ, ŋɨɨlə shɔ nəŋay, tɨ́ kaꞌ mə ndɔ kii vənu vɔ́ maa mə. Mə kəə kii vənu vɔ́, buꞌ laa Yeso Kristo, kìi mə taa ghɔ ŋwə.

¹³ Vaŋ-nshwi vaŋ, mə bɨꞌtə laa mə kee ta yiziꞌ yuu kii vənu vɔ́ me. Nu kəmuꞌ faŋ mə yɨ̀, lùu laa mə ndènə vənu vənshə faŋ mbə duꞌtə mbə shɔɔ, mə toꞌ nə wutə, gə vɨsɨ vɨsɨ, ndeynə vənu mbɨə faŋ mbə lùu vɨsɨ.

¹⁴ Mə taa kɔꞌ kɨ gɨgə vɨsɨ, luu ye ndwəsə shəŋ ŋkɨə faŋ mə tə̀ sɨ shɔ nə, tɨ́ kaꞌ mə ndɔ kii vəkeynə mbɨə faŋ Nwi nə tìi mə, laa mə ndɔ kii mbə taa nu yifwàŋ ki buꞌ Yeso Kristo.

¹⁵ Gə fɨ maa nsiŋ vənshə faŋ nsiŋ lùu vɨɨ taa taa nu Nwi nə, bàw nsiŋ kɨ kwaꞌtə nu kɔ́ fɨ taa fwisə nsiŋ. Mbɨꞌtə yiŋ kɨ yɨ lùu nɨŋkwiŋ maa nu mɔ́ꞌ, buu Nwi taa də tɨ́ viŋ yiley.

¹⁶ Luu nə, kɨ nsiŋ bəŋ yiba me; nsiŋ kɨ beꞌsə vənu mbɨə faŋ nsiŋ nə teꞌsə beꞌsə nə.

¹⁷ Vaŋ-nshwi vaŋ, viŋ vənshə kɨ toꞌ nə nshinə njyə faŋ viŋ yè maa mə nə. Viŋ kɨ ndeynə vɨɨ mbɨə faŋ vəŋ yɨ jəə maa jɨɨ yinjii. Yia lùu vəshwenə, tɨ́ kaꞌ viŋ kɨ beꞌsə.

¹⁸ Vɨɨ vəyaŋ lùu shɔ faŋ vəŋ kee tòꞌ nɨniŋ me. Mə duꞌtə mə gi tɨ́ viŋ kɔ̀ŋ vɨɨ vɔ́ ghee yaŋ. Mə baa naysə tɨ́ viŋ nə mənsɨ sɨ mə ndwə laa, jɨɨ njyə faŋ vɨɨ vɔ́ toꞌ fɨ fuŋ nə, lùu jɨɨ vɨɨ mbeenə nu fəŋkɔꞌ fə ŋkɨꞌsə fə Kristo.

¹⁹ Vəŋ ndɔ ŋii taa nsɔꞌ Nwi, ndì. Vəŋ kàw sheꞌ maa məzɨ shɨ. Nu kɔ́ lùu tɨ́ vəŋ yaa Nwi vəŋ. Vəŋ koꞌsə ŋwaa buꞌ vənu faŋ bee kii lùu vənu və tɔ dɨɨ. Vəŋ bɨꞌtə sheꞌ vənu və shɨ nsi.

²⁰ Gə fɨ maa nsiŋ, nsiŋ lùu vɨɨ faŋ fu ŋwaa-nsiŋ lùu yizɔ. Nsiŋ tə sɨ, kɨ kɨꞌ tɨta Yeso Kristo, faŋ lùu mbweysə nyaa-nsiŋ, faŋ ŋwə ndɔ fuu fɨ yizɔ, jwì yɨ nsiŋ.

²¹ Yighee njyə faŋ ŋwə ndɔ jwi, ŋwə ndɔ yɨsə laa yiŋku yiŋwaa nyaa-nsiŋ nyə̀ gù yaa ŋwaa wi faŋ ŋwə bàw shɨlə nə. Ŋwə ndɔ yɨ nu kɔ́ nə wutə ki kəkwalə, ŋkɨə faŋ ŋkə ndɔ yɨ vətɔ vənshə fɨ mbi zɔnə ŋwə.