Filipi 2 - Vengo (Babungo)

Faŋ bàw viŋ luu nə nu kəmuꞌ

¹ Kristo nə kɔ̀ viŋ nə yigi, tɨ́ kaꞌ viŋ tɨ̀sə yiŋwaa yiŋ, viŋ viŋ, baa gaŋtə yiŋwaa yiŋ, viŋ viŋ, fɨ taa ŋkawnə. Viŋ faynə lùu fa kəmuꞌ, viŋ vɨ Zwitə Ley Nwi, baa kee gəŋ siŋ, viŋ viŋ.

² Nɨniŋ, viŋ ye laa mbɨꞌtə yiŋ lùu yimuꞌ. Viŋ kɨ kawnə yiŋwaa yiŋ, fàynə nùŋ fwi siŋ maa nu kəmuꞌ. Viŋ yɨ nɨniŋ, buu mə kìi məŋaytə yaŋ.

³ Kɨ viŋ kɨ ŋwiŋ me, tɨꞌnə me, koꞌsə yiŋwaa me! Viŋ bee kɨ kii sùꞌsə yiŋwaa yiŋ nsi, ndeynə wə tɨ̀ me wə laa ŋwə shɔ̀ɔ viŋ.

⁴ Kɨ viŋ kɨ ywiitə sheꞌ vənu mbɨə faŋ mbə bàw tɨ́ nshɨ-tɔ wiŋ me. Bàw viŋ kɨ ywiitə vənu mbɨə faŋ mbə bàw tɨ́ vɨɨ day.

Faŋ bàw viŋ kii mbɨꞌtə yiŋ yaa njyə Kristo

⁵ Bàw mbɨꞌtə yiŋ fɨ taa fwisə viŋ lùu yaa njyə Yeso Kristo:

⁶ Faŋ ŋwə nə kɔlə kìi ŋkɨꞌnə yi ghɔ Nwi mɔ́ꞌ nə, ŋwə nə kee jìa nu kɔ́ nə wutə me, laa ghɔ Nwi gòꞌ nɨndɨŋ me.

⁷ Ŋwə nə bee kii mèꞌtə vənu vənshə, kii gù luu buꞌ, vɨ bi ŋwə faŋ vɨ yaa kɨ bi wə, ŋwə ta, toꞌ sheꞌ yaa wə.

⁸ Yighee njyə faŋ ŋwə nə luu wə nə, ŋwə baa sùꞌsə ŋwaa wi nsi, bìŋ yiku, ŋkee yiku vɨɨ bwənə, faŋ vɨ nə bèy ŋwə fuu fəŋkɔꞌ fə ŋkɨꞌsə.

⁹ Ŋwə nə yɨ̀ nɨniŋ, buu Nwi kɔ yikwalə tɨ́ ŋwə faŋ nyə shɔ̀ɔ ki, baa shù yizii maa ŋwə faŋ nyə kwàlə shɔ̀ɔ təzii tənshə.

¹⁰ Nɨniŋ laa vɨɨ vənshə guŋnə nsi vɨsɨ ŋwə, bə̀ŋsə ŋwə. Vəzwitə fɨ taa yizɔ, nə vɨɨ fɨ shɨ nsi, nə vəŋku və nsisə fɨ ŋiꞌ nsi ndɔ guŋnə nsi, bə̀ŋsə yizii yi.

¹¹ Vəŋ vənshə ndɔ biŋ ntee laa Yeso Kristo lùu wuu məsɔꞌ mbi. Nɨniŋ, vəŋ kɔ feenə tɨ́ tɨta Nwi.

Faŋ bàw viŋ kɨ toꞌ maa nu Nwi nə wutə

¹² Vaŋ-nshwi vaŋ faŋ mə kàw, viŋ yaa zɔnə yigisə Nwi ghee nshə, faŋ nsiŋ nə luu mɔ́ꞌ nə. Bàw viŋ baa zɔnə shɨshɔɔ, faŋ nsiŋ kee baa lùu mɔ́ꞌ nə me. Viŋ kɨ toꞌ maa nu Nwi nə wutə, fee Nwi, kɨ lɔꞌ, tɨ́ kaꞌ Nwi ndɔ bweysə viŋ.

¹³ Viŋ toꞌ nɨniŋ, buu lùu nshɨ-tɔ Nwi faŋ ŋwə faꞌ taa ŋwaa viŋ, yɨsə laa viŋ kaw maa mətoꞌ nɨniŋ. Ŋwə baa luu kɔ wutə tɨ́ viŋ maa mətoꞌ nɨniŋ. Too Nwi bàw maa məfaꞌ nɨniŋ taa ŋwaa vɨɨ.

¹⁴ Faꞌ tɨ̀ me faꞌ faŋ viŋ faꞌ, viŋ faꞌ jəə, kee kɨ lulə me, kee kɨ tay me.

¹⁵ Nɨniŋ laa viŋ ndɔ baw shɨlə, tuu wee-ndoꞌ kee lùu maa viŋ me, viŋ luu vaŋ Nwi yinsəŋ, faŋ vəŋ kee kìi nu bwə taa fwisə vəŋ me. Viŋ lùu vaŋ ley Nwi taa ŋwaa vɨɨ, faŋ fwisə vəŋ lùu sətwiŋkə, vəŋ baa lùu vɨɨ vənu vəbwəvə. Viŋ luu taa ŋwaa vəŋ yaa məjwiŋ faŋ mbə bee fɨ taa yizɔ nə.

¹⁶ Viŋ nuŋsə yigisə Nwi taa fwisə viŋ, yigi njyə faŋ nyə də jɨɨ məbwey vəlwaŋ tɨ́ vɨɨ. Viŋ kɨ luu kɨ yɨ nɨniŋ, buu vɨ ndɔ biŋ mə maa shi ŋkɨə faŋ Kristo ndɔ bəŋ jwi, laa yitoꞌ nyaa faŋ mə nəə toꞌ buꞌ nu Nwi, nə faꞌ ŋgwə faŋ mə nəə faꞌ shɔ nə, kee fùu dayday me.

¹⁷ Məbiŋ wiŋ faŋ viŋ biŋ Kristo nə, lùu yaa ndey faŋ viŋ fèꞌ tɨ́ Nwi. Kɨ yighee mɔ́ꞌ məbwey ŋwaa ndɔ ndi, buu lùu yaa fa faŋ vɨ ndi, kùꞌsə maa ndey yɔ́. Ŋkə taa luu nɨniŋ, buu mə taa kii məŋaytə taa fwi mə; nsiŋ baa faynə yiŋwaa, kɨ ŋaytə.

¹⁸ Ŋkə bàw laa viŋ nɨzi kɨ ŋaytə, tɨ́ kaꞌ nsiŋ faynə yiŋwaa, kɨ ŋaytə.

Faŋ Pɔɔl nəə kəə tɔŋ Timoti tɨ́ vɨɨ Kristo fɨ ntɨꞌ Filipi

¹⁹ Tɨta Yeso taa biŋ, buu fɨkɨꞌ nee, mə tɔŋ Timoti, ŋwə jwi yɨ viŋ, baa bə̀ŋ jwì nàysə faŋ viŋ dùꞌ tɨ́ mə, tɨ́ kaꞌ fwi nyaa zutə.

²⁰ Mə kee baa kìi wə mɔ́ꞌ, tɨ̀ lɨꞌ Timoti, faŋ ŋwə bɨꞌtə vənu yaa mə me, ŋwə kɨsə gaŋtə viŋ nə fwi yijəə.

²¹ Bətə vɨɨ bɨꞌtə sheꞌ vənu vəvəŋ; vəŋ kee bɨꞌtə vənu və Yeso Kristo me.

²² Gə fɨ maa Timoti, viŋ kɔꞌ kɨɨ nə nshinə yi, laa nyə lùu yijəə, baa nə laa ŋwə nəə beꞌsə mə maa faꞌ Nwi, sheꞌ faŋ wee yaa kɨ bèꞌsə tii wi. Yia ŋwə fàꞌ faꞌ Nwi mɔ́ꞌ, fɨꞌtə ntɔŋ yijəə Nwi tɨ́ vɨɨ.

²³ Lùu ŋwə, faŋ mə kəə tɔ̀ŋ tɨ́ viŋ. Yighee njyə faŋ mə taa kɨɨ faŋ vənu vaŋ dùꞌ, mə kɨ nii tɔ̀ŋ ŋwə yighee muꞌ.

²⁴ Gə fɨ maa mə, mə nùŋ fwi nyaa maa tɨta Yeso laa fɨkɨꞌ nee, mə jwi yɨ viŋ nɨzi.

Faŋ Pɔɔl nə tɔ̀ŋ Epafroditɔs, ŋwə bəŋ gə̀ Filipi

²⁵ Gə fɨ maa Epafroditɔs, weenshu ŋwaa-nsiŋ, faŋ yia ŋwə nəə faꞌ mɔ́ꞌ nə, ŋɨɨlə buꞌ nu Nwi mɔ́ꞌ nə. Ŋwə baa lùu wuu ntɔŋ wiŋ, faŋ ŋwə nə jwì ndèynə mə, gàŋtə mə. Luu nə, ŋkə bàw laa mə baa tɔŋ ŋwə, ŋwə bəŋ jwi yɨ viŋ.

²⁶ Ŋwə dùꞌ kɨ kəə sheꞌ laa yi baa ye viŋ, fwi yi nə za buꞌ faŋ ŋwə nə zɔ laa, viŋ zɔ̀ laa ŋwə zɨzasə.

²⁷ Lùu yinsəŋ laa ŋwə nəə zɨzasə, goꞌ sheꞌ tɨtiꞌ ŋwə ku. Luu nə, Nwi nə kèe gəŋsə, yɨ̀sə ŋwə bwaŋnə. Ŋkə də̀ laa ŋwə kèe gəŋsə maa mə nɨzi, laa kɨ nu mɔ́ꞌ baa jia mə me, maa yighee njyə faŋ vənu və ŋɨꞌ bàytə kìa mə nə.

²⁸ Nɨniŋ, ŋkə luu sheꞌ laa, mə taa tɔŋ ŋwə, ŋwə jwi yɨ viŋ yighee muꞌ, tɨ́ kaꞌ viŋ baa kɨ ŋaytə faŋ viŋ taa baa ye ŋwə. Nɨniŋ, məluŋ ŋwaa baa fasə.

²⁹ Faŋ ŋwə taa jwi, viŋ kɔ bwaŋnə tɨ́ ŋwə maa yizii tɨta Nwi. Viŋ ŋaytə maa ŋwə. Bàw viŋ kɨ kɔ bəŋsə tɨ́ kəŋ vɨɨ vɔ́.

³⁰ Viŋ kɔꞌ kɨɨ laa nu ŋkɨə faŋ ŋkə yɨ̀ faŋ ŋwə yaa zasə, kɨ kəə ku nə, luu buꞌ faꞌ ŋgwə faŋ ŋwə faꞌ tɨ́ Kristo nə. Viŋ nə tɔ̀ŋ ŋwə shee, laa ŋwə metə faꞌ wiŋ shee. Ŋwə nə biŋ jwi faŋ nə kɔlə luu ntɔŋ tɨ́ kaꞌ ŋwə gə shɔ ku nə.