Filipi 1 - Vengo (Babungo)

Faŋ Pɔɔl nə shɔ̀ꞌtə vɨɨ Nwi fɨ ntɨꞌ Filipi

¹ Lùu mə, Pɔɔl, nə Timoti, faŋ yia lùu vɨɨ faꞌ Yeso Kristo nə, faŋ yia tɔ̀ŋ ŋwaꞌlə ŋwə̀ tɨ́ vɨɨ ley Nwi fɨ ntɨꞌ Filipi. Yia shɔꞌtə vɨɨ taa fɨ taa ŋwaa viŋ, nə vɨɨ mbɨə faŋ vəŋ lùu vətɔ viŋ, baa shɔꞌtə viŋ vənshə, faŋ viŋ lùu vɨɨ ley Nwi buꞌ Yeso Kristo.

² Nwi, tii ŋwaa-nsiŋ, ghɔ tɨta Yeso Kristo tu mənɔŋ-bwaŋnə tɔ viŋ, kɔ viŋ nə məduꞌ-nyɔŋ.

Faŋ Pɔɔl nə shɔ̀ꞌtə Nwi tɔ vɨɨ Filipi

³ Yighee tɨ̀ me yighee faŋ mə lùmə viŋ, mə bwaŋ Nwi ŋwaa buꞌ viŋ.

⁴ Ghee nshə faŋ mə shɔꞌtə Nwi tɔ viŋ, mə shɔꞌtə ŋwə tɔ viŋ vənshə nə məŋaytə,

⁵ buꞌ laa viŋ nəə beꞌsə mə maa faꞌ yigisə Nwi, shù fɨ́ maa yighee njyə faŋ viŋ nə fɔŋ zɔ ntɔŋ yijəə Nwi, jwi kɔ tɔ və-ndee.

⁶ Mə kɔꞌ kɨɨ ŋkee maa yinsəŋ laa Nwi, faŋ ŋwə duꞌtə ŋwə tey kɨ faꞌ faꞌ wi taa fwisə viŋ, ndɔ kɨ faꞌ taa fwisə viŋ, gə kɔ tɨ́ shi ŋkɨə faŋ Yeso Kristo ndɔ bəŋ jwi.

⁷ Ŋkə lùu kəloomə laa mə kìi kəŋ məlumə ŋwə̀ kɔ̀ŋ viŋ vənshə, buꞌ laa mə kaw viŋ fɨ taa fwi mə. Mənɔŋ-bwaŋnə ŋgwə faŋ Nwi nə kɔ shee nə, ŋwə kɔ tɨ́ viŋ nɨzi, faŋ mə kɔlə lùu taa ŋii mfiŋ, tɨꞌnə me, tɨ̀ŋnə taa ŋii nsɔꞌ, fɨꞌtə nu kɔ̀ŋ yigisə Nwi, baa də laa yigisə Nwi lùu yigisə yinsəŋ.

⁸ Nwi kɔꞌ kɨɨ yinsəŋ laa ŋkawnə njyə faŋ mə kìi nyə maa viŋ vənshə, ndɔ̀ fɨ ghɔ Yeso Kristo.

⁹ Nɨniŋ, mə shɔꞌtə Nwi tɔ viŋ laa viŋ kɨ kaw yiŋwaa yiŋ, viŋ viŋ, gə vɨsɨ vɨsɨ, kɨɨ nə Nwi nə nu jəə.

¹⁰ Mə shɔꞌtə Nwi tɔ viŋ nɨniŋ, tɨ́ kaꞌ viŋ shòꞌ nu ŋkɨə faŋ luu nu jəə fɨ maa vənu vənshə. Nɨniŋ, viŋ ndɔ luu ŋkee vɨɨ ley faŋ vənu vəvəŋ lùu vəloomə maa shi ŋkɨə faŋ Kristo ndɔ baa bəŋ jwi taa mbi nə.

¹¹ Vənu vəjəəvə ndɔ lwaŋ taa ŋwaa viŋ, viŋ kii nshinə yijəə faŋ nyə ndɔ̀ fɨ ghɔ Yeso Kristo. Nɨniŋ, vɨɨ ye yikwalə Nwi fɨ fuŋ, bəŋsə ŋwə.

Faŋ Pɔɔl nə fɨ̀ꞌtə vənu vi faŋ ŋwə ŋìi taa ŋii mfiŋ buꞌ nu Kristo, luu nə, kìi məŋaytə

¹² Vaŋ-nshwi vaŋ, bàw viŋ kɨɨ nə vənu mbɨə faŋ mbə nə gày maa mə feenə. Vɨ kwàŋ mə taa ŋii mfiŋ, luu nə, nu kɔ́ yɨsə sheꞌ laa nu Nwi saynə taa ŋwaa vɨɨ.

¹³ Vəsogeꞌ və fwàŋ Rom baa nə vɨɨ mɔ́ꞌ kɔꞌ kɨɨ ndwə laa luu buꞌ nu Kristo, faŋ mə ŋìi mfiŋ nə.

¹⁴ Nu mɔ́ꞌ baa lùu laa, vaŋ-nshwi vaŋ-nsiŋ vəyaŋ, faŋ vəŋ ye laa mə lùu taa ŋii mfiŋ buꞌ Kristo nə, vəŋ tey kɨ yɨꞌtə maa Yeso ŋkee dɨdɨꞌ, baa kìi fwi yiweꞌ maa məbaa fɨꞌtə nu Nwi tɨ́ vɨɨ, gə vɨsɨ vɨsɨ, kee baa fɨfee me.

¹⁵ Vɨɨ mɔ́ꞌ taa ŋwaa vəŋ fɨꞌtə nu Kristo nə fwi yifəŋ, kəə nsɔꞌsə. Luu nə, vɨɨ mɔ́ꞌ yɨsə nə fwi yijəə,

¹⁶ fɨꞌtə nu Nwi buꞌ laa vəŋ kaw mə, kɨɨ laa vɨ kwàŋ mə taa nsɔꞌ buꞌ nu Kristo, laa mə twelə taa ŋii nsɔꞌsə laa ntɔŋ yijəə Nwi lùu nu yinsəŋ.

¹⁷ Luu nə, vɨɨ mbii-wə kəə sheꞌ laa vəŋ kwàlə shɔ̀ɔ mə, faŋ vəŋ fɨꞌtə nu Kristo nə. Vəŋ kee yɨ nə fwi yijəə me. Vəŋ kəə baa metə kwaŋ ŋɨꞌ maa mə, faŋ mə lùu feenə taa ŋii mfiŋ nə.

¹⁸ Luu nə, mə kee shə̀ŋ shɔ me. Vəŋ kɔlə yɨsə nə mbɨꞌtə yikə, kɨ vəŋ fɨꞌtə nu Kristo nə fwi yijəə, tɨꞌnə me nə fwi yifəŋ, fwi nyaa lùu nə məŋaytə buꞌ faŋ vɨ fɨꞌtə nu Kristo tɨ́ vɨɨ. Yinsəŋ məŋaytə ŋwaa taa kɨ gə nə vɨsɨ,

¹⁹ buꞌ laa mə kɔꞌ kɨɨ laa məshɔꞌtə wiŋ, faŋ viŋ shɔꞌtə Nwi tɔ mə nə, baa nə ŋgaŋtə njyə faŋ Zwitə Yeso Kristo kɔ shee, taa yɨ laa nsɔꞌ nyaa fuu sheꞌ yijəə tɨ́ mə.

²⁰ Mə tə sɨ, kɨ kɨꞌ laa tɔ kaŋ kee ndɔ dɨɨ me, baa nə laa Nwi ndɔ yɨsə laa vɨɨ bəŋsə Kristo buꞌ mə, sheꞌ faŋ ŋwə yuu kɨ yɨsə ghee nshə. Vɨ ndɔ bəŋsə Kristo buꞌ mə, faŋ mə kɔlə kɨku, tɨꞌnə me bɨbwey.

²¹ Gə fɨ maa mə, kɨ luu mə kee mè me, buu mə bwèy lùu tɨ́ Kristo; kɨ luu mə ku, buu mə taa sey fɨ fuŋ.

²² Mə kɨ luu duꞌ yinyay taa ŋwaa mə taa mbi, buu kaꞌ mə kɨ faꞌ faꞌ tɨ́ Nwi. Nwi yɨsə nu jəə fuu fɨ fuŋ. Kɨ luu vɨ gi laa mə shoꞌ nu jəə fɨ maa vənu vɔ́ vəbɔɔ nə, buu mə kee taa kɨɨ nə ŋkɨə mə shoꞌ me.

²³ Vənu vɔ́ gàasə mə vəway vəbɔɔ. Nu ŋkɨə faŋ kaꞌ ŋkə bàw shee, lùu laa mə ku, gə̀ yɨ Kristo, buꞌ laa lùu nu faŋ ŋkə bàw shɔ̀ɔ vənu vənshə.

²⁴ Gə fɨ maa kwiŋ mɔ́ꞌ, ŋkə bàw laa mə goꞌ taa mbi buꞌ viŋ.

²⁵ Nɨniŋ, mə kɔꞌ kɨɨ yinsəŋ laa ŋkə lùu nɨniŋ, laa mə taa goꞌ feenə, nsiŋ taa goꞌ, tɨ́ kaꞌ mə gaŋtə viŋ vənshə, viŋ nùŋ fwi siŋ maa Kristo, tɨ̀ŋnə weꞌ, gə̀ nə vɨsɨ, baa kìi məŋaytə yaŋ buꞌ nu Kristo.

²⁶ Nɨniŋ laa, faŋ nsiŋ ndɔ baa luu mɔ́ꞌ, buu viŋ taa kii ŋkee nu kwalə mɔ́ꞌ maa məbəŋsə Yeso Kristo shɔ, maa nu ŋkɨə faŋ ŋwə yɨ maa mə nə.

Viŋ toꞌ nə nshinə faŋ nyə kùꞌnə tɨ́ vɨɨ Kristo

²⁷ Nu ŋkɨə faŋ ŋkə lùu kəkwalə, lùu laa məshəŋtə wiŋ kɨ toꞌ nə nshinə njyə faŋ nyə kùꞌnə tɨ́ vɨɨ məbiŋ nu Kristo. Nɨniŋ laa mə ndɔ jwi ye viŋ, tɨꞌnə me, mə kee kɔlə jwi me, buu mə taa zɔ laa viŋ tɨ̀ŋnə weꞌ, kìi zwitə kəmuꞌ, baa kìi mbɨꞌtə yiŋ yimuꞌ, faŋ viŋ ŋɨɨlə maa məyɨ laa ntɔŋ yijəə Nwi gə nə vɨsɨ.

²⁸ Mə taa baa kaw maa məye, tɨꞌnə me maa məzɔ laa viŋ kee fèe vɨɨ mbeenə viŋ me, maa vənu vənshə me. Yiŋkii taa də tɨ́ vəŋ laa vɨ ndɔ ndisə vəŋ. Gə fɨ maa viŋ, viŋ ndɔ kɨɨ fɨ fuŋ laa Nwi ndɔ bweysə viŋ.

²⁹ Lùu nɨniŋ buꞌ laa Nwi key viŋ nə jɨɨ maa mənuŋ fwi siŋ maa Kristo, key viŋ nə nu məye ŋɨꞌ buꞌ nu Kristo nɨzi.

³⁰ Nɨniŋ, nsiŋ nywenə sheꞌ nywaŋ yimuꞌ. Viŋ nə duꞌtə viŋ ye nywaŋ njyə faŋ mə nə nywenə nə, baa zɔ̀ ndwə laa mə kɨ bii nywenə nywaŋ yɔ́.