Filemon 1 - Vengo (Babungo)

Shɔꞌtə Pɔɔl tɨ́ Filemon

¹ Lùu mə, Pɔɔl, wuu ŋii mfiŋ buꞌ yizii Yeso Kristo, nə weenshu ŋwaa-nsiŋ Timoti, faŋ yia tɔ̀ŋ ŋwaꞌlə ŋwə̀ tɨ́ ghɔ, Filemon, wə faŋ yia kàw. A baa lùu wuu faꞌ Yeso Kristo sheꞌ yaa yia nɨzi.

² Yia tɔŋ ŋwaꞌlə ŋwə̀ tɨ́ ghɔ, nə tɨ́ Afia, weenshu ŋwaa-nsiŋ, nə tɨ́ Arkipɔs faŋ ŋwə twèꞌ maa nu Kristo yuu nsiŋ, nə tɨ́ vɨɨ Kristo mbɨə faŋ vəŋ baytə taa ŋii ghɔ.

³ Nwi, tii ŋwaa-nsiŋ, ghɔ tɨta Yeso Kristo tu mənɔŋ-bwaŋnə tɔ viŋ, kɔ̀ viŋ nə məduꞌ-nyɔŋ!

Pɔɔl shɔꞌtə Nwi tɔ Filemon

⁴ Mə bwaŋ Nwi ŋwaa ghee nshə faŋ mə lumə ghɔ vɨsɨ Nwi taa məshɔꞌtə ŋwaa.

⁵ Mə bwaŋ Nwi buꞌ laa mə zɔ laa a nùŋ fwi yə maa tɨta Yeso, baa kaw ŋwə, ndɔ kaw vɨɨ ley Nwi vənshə.

⁶ Mə buꞌ ghɔ tɨ́ Nwi laa məbiŋ wə, faŋ nsiŋ faynə nùŋ fwi saŋ-nsiŋ maa Yeso Kristo nə, yɨsə a kɨɨ maa məyɨ vənu vəjəəvə vənshə faŋ mbə lùu taa ŋwaa nsiŋ buꞌ Yeso Kristo.

⁷ Weenshu ŋwaa, mə ŋàytə dɨdɨꞌ, baa zwisə fwi nyaa dɨdɨꞌ, buꞌ laa a kàw vaŋ-nshwi vaŋ-nsiŋ. A yɨsə fwisə vɨɨ ley Nwi zutə.

Pɔɔl buꞌ ghɔ tɨ́ Filemon tɔ Onesimɔs

⁸ Nɨniŋ, mə kəə bitə nu tɨ́ ghɔ. Faŋ wutə kɔlə lùu ghɔ mə buꞌ yizii Yeso Kristo maa mənaysə nu ŋkɨə faŋ ŋkə kùꞌnə tɨ́ ghɔ, mə kee dɨdɔɔ me.

⁹ Mə bee kii buꞌ ghɔ tɨ́ ghɔ, buꞌ laa mə kàw ghɔ. Mə buꞌ ghɔ tɨ́ ghɔ yaa wuu taa, yuu mə luu wuu taa nə. Mə baa luu wə taa ŋii mfiŋ buꞌ nu Yeso Kristo maa yighee ndwə.

¹⁰ Nɨniŋ, mə buꞌ ghɔ tɨ́ ghɔ tɔ ŋwiŋ ŋwaa, faŋ mə bì ŋwə yaa wuu Kristo sheꞌ maa yighee ndwə, faŋ mə lùu taa ŋii mfiŋ nə. Ŋwiŋ ŋwaa ghɔ́ luu Onesimɔs.

¹¹ Yighee vɨsɨ ŋwə nə kee lùu wuu faꞌ jəə tɨ́ ghɔ me. Lùu ndwə, ŋwə kùꞌnə maa faꞌ wə nə ŋwaanə ŋkee jəə.

¹² Mə bəŋsə tɔ̀ŋ ŋwə tɨ́ ghɔ ndwə, faŋ luu ŋkee fwi nyaa faŋ mə tɔ̀ŋ tɨ́ ghɔ nə.

¹³ Mə nəə kəə jia ŋwə, yia ŋwə duꞌ mɔ́ꞌ, ŋwə kɨ faꞌ shee tɔ ghɔ, yuu mə luu mfiŋ buꞌ nu ntɔŋ yijəə Nwi nə.

¹⁴ Luu nə, mə nəə kee kəə yɨ̀ nu, maa laa a bɨ yibiŋ me, laa nu jəə ŋkɨə faŋ a yɨsə, kee kiasə gù nu faŋ vɨ dɨdɔɔ me. Bàw laa luu nu faŋ kàw fwi yə.

¹⁵ Nu mɔ́ꞌ lùu laa yighee mɔ́ꞌ Nwi nə biŋ laa viŋ ŋwə gaasə maa kuŋtə yighee, tɨ́ kaꞌ a ndɔ baa ye ŋwə, gòꞌsə viŋ ŋwə yighee muꞌ.

¹⁶ Nɨniŋ, ŋwə kee baa luu sheꞌ buꞌ wə me; ŋwə gù fa faŋ ŋkə shɔ̀ɔ buꞌ, gù lùu weenshu wə, faŋ a kàw ŋwə. Maa ŋwə luu ŋkee weenshu ŋwaa faŋ mə kàw ŋwə. Nɨniŋ, ŋwə ndɔ baa luu weenshu wə shɔ̀ɔ nɨniŋ, fɔnə a kìi ŋwə fɨ taa mənshi yaa buꞌ wə, baa kìi ŋwə yaa weenshu wə fɨ yiba Kristo nə.

¹⁷ Nɨniŋ, a kɨ luu biŋ laa nsoo lùu fa kəmuꞌ, buu a ndì ŋwə yaa a ndì nshɨ-tɔ ŋwaa.

¹⁸ Kɨ luu laa ŋwə nə yɨ̀ nu bwə maa ghɔ, tɨꞌnə me laa yikɔɔ yə lùu ghɔ ŋwə, buu mə taa ndɔꞌ yikɔɔ yɔ́.

¹⁹ Mə Pɔɔl nyɔ̀ꞌ ŋkee nə ghɔ kaŋ, laa mə taa ndɔꞌ. Mə gì nɨniŋ faŋ nshɨ-tɔ wə kɔlə kɔꞌ kɨɨ laa kaꞌ mə gì laa yikɔɔ nyaa lùu ghɔ ghɔ maa kəŋ jɨɨ yimɔ́ꞌ nɨzi. Maa kaꞌ mə gì laa a kɔ ŋkee ŋwaa wə shee.

²⁰ Yinsəŋ, weenshu ŋwaa, mə kàw maa məkii ŋgaŋtə fɨ ghɔ ghɔ fɨ yiba tɨta Kristo. Bàw a yɨ nu ŋkɨə faŋ fwi nyaa kàw buꞌ Yeso Kristo.

²¹ Mə nyɔ̀ꞌ nu kɔ́ tɨ́ ghɔ buꞌ laa mə nùŋ fwi nyaa maa ghɔ laa a kɨ zɔnə mə. Mə bee kii kɨ̀ɨ laa a taa yɨsə nu faŋ ŋkə shɔ̀ɔ yiŋkii.

Pɔɔl kəə gə yɨ Filemon

²² Bàw a naysə shəŋ shi shee! Mbɨꞌtə nyaa lùu laa Nwi ndɔ bəŋsə mə tɨ́ viŋ, mə jwi yɨ viŋ, buꞌ faŋ viŋ bùꞌ ghɔ tɨ́ Nwi nə.

Məshɔꞌtə

²³ Epafras faŋ yia ŋwə lùu taa ŋii mfiŋ buꞌ nu Yeso Kristo mɔ́ꞌ nə, shɔꞌtə ghɔ.

²⁴ Mark nə Aristarkɔs nə Dimas, nə Lukas, faŋ yia vɨ vəŋ faꞌ mɔ́ꞌ nə, shɔꞌtə viŋ nɨzi.

²⁵ Tɨta Yeso Kristo tu mənɔŋ-bwaŋnə tɔ viŋ, gòꞌsə taa fwisə viŋ!