3 Jɔn 1 - Vengo (Babungo)

Faŋ Jɔn nə shɔ̀ꞌtə Gayɔs, baa ŋaytə maa vənu vəjəəvə vi

¹ Lùu mə, wuu taa fɨ taa məshəŋtə vɨɨ Kristo, faŋ mə nyɔ̀ꞌ ŋwaꞌlə ŋwə̀ tɨ́ ghɔ, Gayɔs, faŋ mə kàw ghɔ yinsəŋ.

² Wuumba ŋwaa, mə buꞌ ghɔ tɨ́ Nwi laa, a duꞌ nə mənɔŋ-bwaŋnə fɨ taa vənu vənshə, nə məduꞌ taa, yuu mə kɨɨ laa fwi yə dùꞌ jəə taa Zwitə Ley Nwi.

³ Mə yaa ŋaytə ŋkee dɨdɨꞌ faŋ vaŋ-nshwi vaŋ-nsiŋ vəmɔ́ꞌ nə jwì, gì laa a luu ŋkee wuu jəə, toꞌ yitoꞌ yə fɨ maa nu ŋkɨə faŋ lùu nu yinsəŋ.

⁴ Nu məŋaytə kee lùu shɔ faŋ ŋkə shɔ̀ɔ yiŋkii me, laa mə zɔ laa vaŋ vaŋ toꞌ yitoꞌ yivəŋ fɨ yiba nu ŋkɨə faŋ ŋkə lùu nu yinsəŋ.

⁵ Wuumba ŋwaa, vənu mbɨə faŋ a yɨsə maa vaŋ-nshwi vaŋ-nsiŋ, baa nə ŋkee vaŋ-nshwi vaŋ-nsiŋ vəndɔ, lùu nu jəə yinsəŋ.

⁶ Vəŋ nàysə tɨ́ nshəŋtə yia ntee laa a lùu wuu məkaw vɨɨ. A taa kɨ gaŋtə vəŋ maa nu yitoꞌ vəŋ, yuu ŋkə kuꞌnə tɨ́ Nwi, buu a yɨ̀ luu nu jəə,

⁷ buꞌ laa vɨɨ vɔ́ nə fùu maa nu Yeso Kristo, kee kaw fi fa fɨ ghɔ wə faŋ kee lùu wuu Kristo me.

⁸ Nɨniŋ, ŋkaŋ-nsiŋ lùu laa nsiŋ kɨ nuŋ kəŋ vɨɨ vɔ́ taa ndɔꞌ nsiŋ, laa nsiŋ luu vaŋ-nshwi vəŋ fɨ taa faꞌ ŋgwə faŋ lùu nu Nwi yinsəŋ.

Faŋ Jɔn fɨꞌ nu Diotrefes baa nə nu Dimitriɔs tɨ́ Gayɔs

⁹ Mə yaa nyɔꞌ ŋwaꞌlə mɔ́ꞌ, tɔ̀ŋ tɨ́ nshəŋtə yiŋ. Luu nə, Diotrefes, faŋ ŋwə kəə tɨŋ tɔ fɨ taa nshəŋtə vɨɨ Kristo, kee biŋ maa məzɔnə yia me.

¹⁰ Yighee njyə faŋ mə ndɔ jwi yɨ viŋ, mə taa naysə vənu mbɨə faŋ ŋwə yɨsə ntee, laa ŋwə sɨ̀ɨ təba tɔ yia. Nshɨ-tɔ wi kee bìŋ vɨɨ Kristo faŋ lùu vəndɔ ŋii taa ŋii ŋwə me. Nu kɔ́ kee ta yikuꞌnə tɨ́ ŋwə me, ŋwə baa twey tɨ́ vaŋ-nshwi fɨ taa nshəŋtə vɨɨ Kristo laa, kɨ vəŋ kɨ biŋ vɨɨ Kristo vɔ́ ŋii taa ndɔꞌ vəŋ me, bee kɨ nii jɔŋ vaŋ-nshwi vɔ́ fɨ taa nshəŋtə vɨɨ Kristo.

¹¹ Wuumba ŋwaa, kɨ ghɔ kɨ fiꞌsə vənu vəbwəvə me, kɨ fiꞌsə luu nu jəə. Wə ntɨə faŋ ŋwə yɨ nu jəə, ndɔ̀ fɨ ghɔ Nwi. Wə ntɨə faŋ ŋwə yɨ nu bwə, kee bee yè Nwi me.

¹² Gə fɨ maa Dimitriɔs, vɨɨ vənshə biŋ ŋwə ntee laa ŋwə lùu wuu jəə. Vənu vəjəəvə vi baa də̀ laa ŋwə lùu wuu jəə maa vənu mbɨə faŋ ŋwə yɨsə. Nshɨ-tɔ wia bìŋ ŋwə nɨzi. A kɔꞌ kɨɨ laa yigisə yia lùu yinsəŋ.

Faŋ Jɔn nə kɔ̀ꞌnə maa məgə ye Gayɔs

¹³ Vənu ghɔ mə vəyaŋ maa mənaysə tɨ́ ghɔ. Luu nə, mə kee kaw nyɔ̀ꞌ sheꞌ taa ŋwaꞌlə me.

¹⁴ Mbɨꞌtə nyaa lùu laa, fɨkɨꞌ mə taa jwi ye ghɔ, sɨ gi vənu vɔ́ nə shuu.

¹⁵ Mənɔŋ-bwaŋnə tɔ ghɔ! Vɨɨmba vaŋ-nsoo shɔꞌtə ghɔ. Shɔꞌtə vɨɨmba vaŋ tɔ tɔ.