2 Timoti 4 - Vengo (Babungo)

Faŋ bàw Timoti kɨ faꞌ faꞌ wi, ŋwə kuꞌnə tɨ́ Nwi

¹ Mə tɨsə ghɔ ŋkee nə wutə yikəꞌ Nwi nə Yeso Kristo, faŋ ŋwə ndɔ shoꞌtə vənu və vɨɨ bweynə nə vəŋku və nsisə, maa yighee njyə faŋ ŋwə ndɔ fuu taa mbi, lootə nu yifwàŋ ki,

² baa nə laa a kɨ fɨꞌtə nu Nwi, jiatə vɨɨ shɔ, faŋ ŋkə taa baw tɨ́ vəŋ, tɨꞌnə me kee baw me, kɨ ŋaꞌsə sɨ vəŋ maa ŋiꞌ nu vəŋ, naysə tɨ́ vəŋ faŋ Nwi ndɔ kwaŋ vəŋ taa nsɔꞌ. Bàw a tɨsə vəŋ, kɨ jia fwi yə, kee bwà maa mətɨsə vəŋ me. Twelə ŋiꞌ nu Nwi tɨ́ vəŋ kənshə.

³ A kɔꞌ kɨɨ laa yighee ndɔ kɨ jwi, faŋ nu yinsəŋ Nwi ndɔ bɨ tɨ́ vɨɨ, vəŋ twey maa məzɔ, gə̀ kɨ kəə vɨɨ mədeesə vəŋ, faŋ vəŋ gisə sheꞌ vənu faŋ mbə sɨꞌsə tɨ́ vəŋ.

⁴ Vəŋ taa kiasə yiŋwaa vəŋ fɨ maa məzɔ nu ŋkɨə faŋ lùu nu yinsəŋ, ndì fwisə vəŋ, nùŋ maa nu mətiitii təba.

⁵ Gə fɨ maa ghɔ, bàw a jia fwi yə, nyə ley maa vənu vənshə, kɨ biŋ ŋɨꞌ buꞌ nu Kristo, faꞌ faꞌ wuu məfɨꞌtə ntɔŋ yijəə Nwi, faꞌ faꞌ wə nshə yaa wuu faꞌ Nwi.

Faŋ Pɔɔl nə kɨ̀ɨ laa yiku yi lùu nshənə

⁶ Gə fɨ maa mə, yighee kùꞌ faŋ vɨ taa kɔ ŋwaa ŋwaa tɨ́ Mboo nyaa. Yighee məgə nyaa kùꞌnə.

⁷ Mə tùŋ yighaw yijəənə, ghuu yitoꞌ kaŋ ndwə̀. Mə kee bee mèꞌtə nu Kristo faŋ mə nùŋ fwi nyaa maa ŋwə nə me.

⁸ Nu ŋkɨə faŋ ŋkə gòꞌ, lùu laa, mə ndɔ fi shwaŋ nu jəə ŋkɨə faŋ Nwi ndɔ kɔ tɨ́ vɨɨ mbɨə faŋ vənu vəvəŋ lùu vəloomə. Tɨta Nwi faŋ ŋwə ndɔ sɔꞌ nsɔꞌsə vɨɨ, sɔꞌ shìa nyə yiloomə. Ŋwə ndɔ kɔ nu jəə kɔ́ shee maa shi vəndwə, kee kɨ kɔ luu sheꞌ tɨ́ mə me, ŋwə kɔ luu tɨ́ vɨɨ vənshə faŋ vəŋ kɨꞌ ŋwə nə ŋkawnə, tə̀ sɨ maa məjwi wi faŋ ŋwə ndɔ baa jwi mbi nə.

Faŋ Pɔɔl nə bùꞌ ghɔ tɨ́ Timoti laa ŋwə jwi yɨ yi

⁹ Ŋwiŋ ŋwaa, kɔꞌlə maa məyasə jwi yè mə titi,

¹⁰ buꞌ laa Dimas nyɨ̀ŋ fɨ yɨ mə, kaw maa məshi taa mbi nyə̀, ndɔ gə shɨ Tesalonika. Kresens gə̀ shɨ Galatia, Titɔs gə̀ shɨ Dalmatia.

¹¹ Goꞌ sheꞌ Lukas yɨ mə. Bàw a ndi Mark, viŋ ŋwə jwi, buꞌ laa kaꞌ ŋwə gaŋtə mə maa faꞌ.

¹² Mə nə tɔ̀ŋ Tikikɔs shɨ Efesɔs.

¹³ A taa kii jwi, a ndì kutə ŋwaa faŋ mə nə mèꞌtə shɨ Troas tɨ́ Karpɔs. Ndi vəŋwaꞌlə nɨzi, ŋkee mbɨə faŋ vɨ naysə fɨ maa gɔ nyaa nə.

¹⁴ Alesanda, wuu ndaa wì, nə yɨsə vənu vəbwəvə vəyaŋ maa mə. Tɨta Nwi ndɔ bəŋsə nu faŋ ŋkə kùꞌ maa nu bwə ki tɨ́ ŋwə.

¹⁵ Bàw laa nshɨ-tɔ wə kɨ tɔfə nə ŋwə, buꞌ laa ŋwə nə bɨ̀sə yigisə nyaa-nsiŋ ŋkee dɨdɨꞌ.

¹⁶ Faŋ vɨ nə fɔŋ sɔ̀ꞌ nsɔꞌ nyaa, tuu wə muꞌ nə kee gì nu maa məgaŋtə mə me. Vɨɨ vənshə meꞌtə mə. Mə buꞌ ghɔ tɨ́ Nwi laa ŋwə ndenə nu kɔ́ tɨ́ vəŋ.

¹⁷ Luu nə, tɨta Kristo nə tɨ̀ŋnə jɨŋ mə, kwàŋ wutə maa mə, laa mə naysə nu Nwi kənshə, vɨɨ tətɔŋ fu vənshə zɔ. Nɨniŋ, Nwi fuusə mə fɨ shuu bikəə.

¹⁸ Tɨta Yeso Kristo ndɔ baa kɨ fuusə mə fɨ taa vənu vəbwəvə vənshə faŋ vɨ kəə yɨsə maa mə, bwèysə mə, nùŋ mə maa nu yifwàŋ ki yizɔ. Bàw nsiŋ kɨ bəŋsə ŋwə ghee nshə, kee shia ki me. Ŋkə goꞌsə nɨniŋ.

Məshɔꞌtə Pɔɔl

¹⁹ Shɔꞌtə Prisila ghɔ Akwila, nə ŋiinə Onesifɔrɔs shee.

²⁰ Erastɔs nə gòꞌ shɨ Kɔrint. Gə fɨ maa Trofimɔs, mə yaa meꞌtə ŋwə shɨ Miletɔs nə za.

²¹ Yasə jwi buu yighee gwə kuꞌ. Eybulɔs nə Pudens nə Linɔs nə Klɔɔdia nə vaŋ-nshwi vaŋ-nsoo vənshə shɔꞌtə ghɔ.

²² Tɨta Yeso Kristo goꞌsə taa fwi ghɔ! Mənɔŋ-bwaŋnə Nwi luu taa ŋwaa viŋ!