2 Timoti 3 - Vengo (Babungo)

Faŋ vənu və vɨɨ ndɔ bɨ yighee yiba

¹ A kɔꞌ kɨɨ laa, ndɔ luu maa yighee shə, ŋkə ndɔ luu ŋkee yighee yiweꞌnə.

² Vɨɨ ndɔ kɨ kaw sheꞌ yiŋwaa yivəŋ, nə ka, baa nə nu məboꞌ ŋwaa, nə məkoꞌsə ŋwaa, baa nə məndasə Nwi, nə məshii tɨ́ vətɨɨ vəvəŋ, kee bwaŋ wə me, kee tii Nwi nə nu me,

³ kee kaw vɨɨ me, kee mètə nsɔꞌsə ghɔ vɨɨ me, bɨsə yizii vɨɨ, kee jia fwi me, jia vənu taa njyoꞌ, bee nu jəə,

⁴ sɨɨ təba tɔ vɨɨ, kee fee nu me, məmwa, kaw maa məzɨ vətɔ, kee kaw Nwi me.

⁵ Vəŋ boꞌ sɨ vɨɨ, fɨnə vɨɨ məbəŋsə Nwi, luu nə, kee biŋ laa wutə Nwi ŋii maa vəŋ me. Bàw a kɨ buꞌsə fɨ yɨ kəŋ vɨɨ vɔ́.

⁶ Vɨɨ mɔ́ꞌ fɨ taa ŋwaa vəŋ nyɔꞌtə ŋii taa ndɔꞌ vɨɨ, sùŋ vəmfaw və vəki, kwàŋ taa ŋwaa vəŋ. Lùu vəki mbɨə faŋ vənu vəbwəvə shùŋnə maa vəŋ, fwisə vəŋ ndɔ maa vənu vəyaŋ, ŋkə dɔŋsə vəŋ kwiŋ kwiŋ.

⁷ Vəŋ kəə zwetə vənu ghee nshə, luu nə, kee bee kɨ̀ɨ nə nu yinsəŋ tuu yighee muꞌ me.

⁸ Vɨɨ vɔ́ faŋ vəŋ bweꞌsə vəki nə, lùu yaa Janis nə Jambris, faŋ vəŋ nə twèy nu Mose fɨshi nə. Vəŋ twey nu yinsəŋ Nwi sheꞌ nɨniŋ, buꞌ faŋ vəŋ lùu vɨɨ faŋ yitɔ vəŋ ndì. Vəŋ kee kùꞌnə maa mənuŋ fwi vəŋ maa Kristo me.

⁹ Luu nə, kaꞌ vəŋ kee ndɔ gə nə vɨsɨ vɨsɨ nə nu vəŋ dɨdɨꞌ me, buꞌ laa nu vəŋkɔmə vəŋ ndɔ fuu yikəꞌ vɨɨ vənshə, yaa ŋkə vɨɨ vì fɨ ywaŋ-vɨsɨ nə fùu ntee nɨzi nə.

Faŋ Timoti nə ndì ghuu yitoꞌ Pɔɔl

¹⁰ Gə fɨ maa ghɔ, a nə ndì ghuu yitoꞌ kaŋ maa nu ŋkɨə faŋ mə nə dèesə nə, baa luu bèꞌsə mə fɨ maa nshinə nyaa, baa nə faŋ mə kəə jɨɨsə maa məgə vɨsɨ vɨsɨ, nùŋ fwi nyaa maa Kristo, jìa fwi, dùꞌ bwaŋnə, kàw vɨɨ, jia fwi nyaa faŋ vɨ kɔ ŋɨꞌ tɨ́ mə.

¹¹ Vɨɨ shoꞌ ghuu ŋaa, kwàŋ mə taa ŋɨꞌ faŋ ŋkə nə gày maa məshɨ mə Antiɔk, baa nə Ikoniɔn, baa nə Listra. Vɨ nə shòꞌ ghuu ŋaa nɨniŋ, mə jia fwi nyaa. Nɨniŋ, tɨta Nwi fuusə mə fɨ taa vənu vɔ́ vənshə.

¹² Sheꞌ nɨniŋ, vɨ taa kɨ shoꞌ ghuu vɨɨ vənshə faŋ vəŋ kəə kɨ toꞌ ghuu yitoꞌ vəŋ fɨ yiba Yeso Kristo, yuu ŋkə bàw tɨ́ Nwi.

¹³ Luu nə, vɨɨ bwənə nə vɨɨ məbuulə yitɔ yi vɨɨ gə vɨsɨ vɨsɨ nə nu bwə vəŋ, toꞌ bweꞌsə vɨɨ, vɨɨ bweꞌsə vəŋ nɨzi.

¹⁴ Gə fɨ maa ghɔ, bàw a goꞌ nə nu ŋkɨə faŋ a nə zwetə̀, kɨɨ laa lùu yinsəŋ, buꞌ laa a kɨ̀ɨ nə vɨɨ mbɨə faŋ a nə zwètə fɨ ghɔ vəŋ nə.

¹⁵ Shù fɨ faŋ a nə luu weembwa, a kɨ̀ɨ nə ŋwaꞌlə Nwi faŋ ŋkə kùꞌnə maa məkɔ yitɔfə tɨ́ ghɔ, laa a nuŋ fwi yə maa Yeso Kristo, ndɔ̀ zɨ̀ məbwey vəlwaŋ.

¹⁶ Vəŋwaꞌlə vənshə faŋ Nwi nə yɨ̀sə vɨɨ nyɔꞌ fɨ maa Zwitə ki bàw, baa gàŋtə vɨɨ, deesə nu Nwi tɨ́ vəŋ, ŋaꞌsə sɨ vəŋ maa ŋiꞌ nu vəŋ, tɨ́ kaꞌ vəŋ kwìinə fwisə vəŋ, mèꞌtə nu bwə vəŋ. Mbə baa bɔ̀ŋsə vəŋ maa yitɔfə vəŋ maa məkɨɨ nə nu ŋkɨə faŋ ŋkə lùu kəloomə.

¹⁷ Nɨniŋ laa wuu Nwi baw shɨlə, kùꞌnə maa məyɨsə vənu vəjəəvə vənshə.