2 Timoti 2 - Vengo (Babungo)

Kɨ tweꞌ maa nu Kristo

¹ Faŋ ŋkə lùu nɨniŋ, gə fɨ maa ghɔ, ŋwiŋ ŋwaa, kɨ weꞌ maa nu ŋkɨə faŋ Nwi gaŋtə ghɔ shɔ nə, fɨ yiba Yeso Kristo.

² Fi yigi njyə faŋ a nə zɔ̀ fɨ ghɔ mə, faŋ mə nəə fɨꞌtə nu Kristo vɨsɨ vɨɨ vəyaŋ nə, ndì nùŋsə tɨ́ vɨɨ yinsəŋ, faŋ vəŋ kùꞌnə tɨ́ kaꞌ vəŋ ndɔ baa kɨ deesə tɨ́ vɨɨ mɔ́ꞌ.

³ Biŋ ŋɨꞌ yaa sogeꞌ Yeso Kristo jəə.

⁴ Sogeꞌ faŋ ŋwə lùu shuu yighaw, kee yaa kɨ kii mba yiwiŋ me. Ŋwə nəə toꞌ gə kɨ kəə fazɨ, buu kaꞌ ŋwə kee bàw tɨ́ wə ntɨə faŋ ŋwə sɔꞌ vəsogeꞌ me.

⁵ Wuu mənyɨŋ ghuu kaꞌ ŋwə kee nyɨŋ zɨ me, maa laa ŋwə nyɨŋ sheꞌ faŋ nuŋsə mənyɨŋ ghɔ́ dùꞌ me, nɨniŋ buu kaꞌ ŋwə kee kii vəkeynə me.

⁶ Wuu məndɨɨ faŋ ŋwə faꞌ taa yindɨɨ ŋwə nə wutə, yaa kɨ fuꞌ mfɔŋsə fazɨ fɨ taa biisə ŋwə.

⁷ Ywiitə nu ŋkɨə faŋ mə gisə. Nwi taa kɔ tɔ ley tɨ́ ghɔ maa məkɨɨ nə vənu vənshə.

⁸ Kɨ lumə Yeso Kristo faŋ Nwi nə ywèysə ŋwə fɨ shɨ yiku, ŋwə faŋ ŋwə nə fùu fɨ ŋiꞌ ŋii fwàŋ Deyvid nə. Lùu faŋ mə yuu kɨ fɨꞌtə ntɔŋ yijəə tɨ́ vɨɨ nə.

⁹ Mə ye ŋɨꞌ, ŋii ŋkee mfiŋ yaa ŋkee yɨ-kəbwə, luu buꞌ ntɔŋ yijəə yɔ́. Luu nə, faŋ vɨ kɔlə kwàŋ mə mfiŋ nə, kaꞌ vɨ kee fə̀ŋ nu Nwi me.

¹⁰ Nɨniŋ, mə jìa fwi nyaa maa ŋɨꞌ yinshə buꞌ vɨɨ mbɨə faŋ Nwi nə shoꞌ vəŋ, laa lùu vɨɨ vi, tɨ́ kaꞌ vəŋ nɨzi ndɔ zɨ məbwey vəlwaŋ fɨ yiba Yeso Kristo. Məbwey ghɔ́ ndɔ baw shɔ̀ɔ, gòꞌsə yighee muꞌ.

¹¹ Luu ŋkee nu yinsəŋ, faŋ vɨ gisə laa, «Nsiŋ vɨ Kristo kù mɔ́ꞌ, buu nsiŋ vɨ vəŋ ndɔ bwey mɔ́ꞌ.

¹² Nsiŋ kɨ luu jìa fwi taa ŋɨꞌ, buu nsiŋ vɨ vəŋ ndɔ kɨ sɔꞌ mbi mɔ́ꞌ. Kɨ luu nsiŋ twey ŋwə, buu ŋwə ndɔ twey nsiŋ nɨzi.

¹³ Nsiŋ kɔlə kɨ luu kee bìisə ghuu maa nu ki me, buu ŋwə kɨ bii wuu yinsəŋ; kaꞌ ŋwə kee twèy nu ki me.»

Faŋ bàw Timoti twey nu vɨɨ məbuulə nu Nwi

¹⁴ Kɨ lumə tɨ́ vɨɨ, baa tɨsə vəŋ nə wutə yikəꞌ Nwi, laa kɨ vəŋ kɨ mɔꞌlə yigi me, buꞌ laa kaꞌ nyə kee gàŋtə wə nə nu me, bee kii ndisə nu Nwi fɨ taa fwisə vɨɨ faŋ vəŋ zɔ̀.

¹⁵ Kɨ tɔfə maa məduꞌ yikəꞌ Nwi yaa wə faŋ ŋwə kùꞌnə maa faꞌ wi. Faꞌ faꞌ Nwi tɨ́ kaꞌ tɔ kə kee ndɔ dɨɨ shɔ me. Kɨ fɨꞌtə nu yinsəŋ Nwi tɨ́ vɨɨ ŋkee ley ley.

¹⁶ Kɨ buꞌsə fɨ ghɔ vɨɨ mbɨə faŋ vəŋ gisə yigisə dayday faŋ nyə kee gàŋtə wə maa nu Nwi me, buꞌ laa vəŋ manə nu Nwi, twey nu Nwi, gə vɨsɨ vɨsɨ nə nu maa mətwey nu Nwi.

¹⁷ Yigisə vəŋ kwə vɨɨ yaa dɨꞌ yaa kɨ kwə fəŋ wə nə. Vɨɨ mɔ́ꞌ fɨ taa ŋwaa vɨɨ mədeesə vəbwəvə vɔ́ luu Hayminiɔs nə Filetɔs.

¹⁸ Vəŋ ndì jɨɨ yinsəŋ Nwi, kɨ gisə laa vəŋku vənsisə duꞌtə vəŋ ywey. Vəŋ kìasə nu Nwi nɨniŋ, ndìsə məbiŋ vɨɨ mɔ́ꞌ faŋ vəŋ nə nùŋ fwi vəŋ maa Kristo nə.

¹⁹ Luu nə, shɨ ŋii weꞌnə ŋkɨə faŋ Nwi nə bɔ̀ŋ, gòꞌsə yighee muꞌ. Shwenə ki lùu laa, «Nwi kɔꞌ kɨɨ nə vɨɨ mbɨə faŋ ŋwə nə shòꞌ,» baa nə laa, «Wə ntɨə faŋ ŋwə tii yizii Mɔꞌmbi, bàw ŋwə fuu fɨ taa vənu vəbwəvə.»

²⁰ Lumə nu ŋii yikwalə: vəkay faŋ mbə lùu taa tey yi, kee luu sheꞌ mbə shwaŋ ndɔŋnə, yaa mbə goolə nə mbə Siliva me. Mbə ŋkɔꞌ nə mbə shɔꞌ shɔ nɨzi. Vəmɔ́ꞌ lùu maa məkwaŋ vətɔ vəleyvə, vəmɔ́ꞌ lùu maa məkwaŋ vətɔ faŋ mbə kee lùu vəley me.

²¹ Kɨ luu wə yɨsə vənu vi nə ŋwaa wi ley fɨ maa vənu vəbwəvə, buu ŋwaa wi ghɔ́ taa luu maa məyɨ nu Nwi ley, kùꞌnə maa məfaꞌ vəfaꞌ tɨ́ tii wi.

Faŋ bàw Timoti kɨ toꞌ ghuu yitoꞌ ki, ŋkə kuꞌnə yaa wuu faꞌ Kristo

²² Kɨ nyɨŋ vənu vəbwəvə mbɨə faŋ zawə yaa kɨ kəə, beꞌsə luu fɨ yiba jɨŋ nu faŋ lùu nu loomə, baa nə maa mənuŋ fwi yə maa Kristo, baa nə maa məkaw vɨɨ, baa nə maa məduꞌ bwaŋnə viŋ vɨ vɨɨ vənshə faŋ vəŋ tii yizii tɨta Kristo nə fwi yiley.

²³ Buꞌsə fɨ ghɔ vɨɨ faŋ vəŋ sɔnə yigi maa nu vəmfaw, buꞌ laa a kɨɨ laa kəŋ vənu vɔ́ bi luu ntaysə.

²⁴ Bàw laa wuu faꞌ tɨta Kristo bwaŋnə tɨ́ vɨɨ vənshə, kee kɨ nywenə nywaŋsə me. Bàw ŋwə kɨɨ maa mədeesə nu Nwi jəə, jia fwi faŋ vɨ kɔ ŋɨꞌ tɨ́ ŋwə.

²⁵ Bàw ŋwə kɔ bəŋsə tɨ́ vɨɨ mətwey nu Kristo taa gɨ yibwaŋnə, laa kaꞌ yighee mɔ́ꞌ Nwi gaŋtə vəŋ, vəŋ kwiinə fwisə vəŋ, kɨ̀ɨ nə nu yinsəŋ,

²⁶ tɔ vəŋ baa ley, vəŋ nyɨŋ fɨ taa vənu və zwitə bwə faŋ ŋkə nə jia vəŋ maa məyɨ nu maa ŋkitə yi nə.