2 Timoti 1 - Vengo (Babungo)

Shɔꞌtə Pɔɔl tɨ́ Timoti

¹ Lùu mə, Pɔɔl, wuu ntɔŋ Yeso Kristo, faŋ nshɨ-tɔ Nwi nə nùŋsə mə maa faꞌ ghɔ́, laa mə kɨ fɨꞌtə nu məbwey vəlwaŋ faŋ Nwi ndɔ kɔ tɨ́ vɨɨ buꞌ Yeso Kristo nə.

² Mə tɔŋ ŋwaꞌlə ŋwə̀ tɨ́ ghɔ, ŋwiŋ ŋwaa Timoti, faŋ mə kàw ghɔ. Tɨta Nwi ghɔ tii ŋwaa-nsiŋ Yeso Kristo tu mənɔŋ-bwaŋnə tɔ ghɔ, kèe gəŋ sə, kɔ̀ məduꞌ-nyɔŋ tɨ́ ghɔ!

Faŋ Pɔɔl nə bwàŋ Nwi tɔ Timoti, faŋ ŋwə nùŋ fwi yi maa Kristo, wèꞌ shɔ

³ Mə bwaŋ Nwi, faŋ mə faꞌ tɨ́ ŋwə shù fɨ ghɔ vətɨɨ vaŋ nə fwi yiley, baa lumə ghɔ ghee nshə faŋ mə shɔꞌtə Nwi vətuꞌ nə shɨshwi.

⁴ Jɨŋ maa məye ghɔ zasə mə, buꞌ laa mə lumə faŋ a nə gwia, mənsɨ shəŋkə fɨ sɨ ghɔ (faŋ sɨ nə gaasə). Nɨniŋ, mə kəə baa ye ghɔ, tɨ́ kaꞌ mə baa ŋàytə nə fwi nyaa yinshə.

⁵ Mə lumə faŋ a nùŋ fwi yə maa Kristo ŋkee maa yinsəŋ. Nshɨ nshu wə Lois nə nshu wə Yunis nə duꞌtə vəŋ nuŋ fwisə vəŋ maa Kristo, wèꞌ shɔ. Mə kɔꞌ kɨɨ laa məbiŋ wə lùu weꞌ nɨzi.

Bàw a kɨ tweꞌ maa nu Kristo, kɨ tɔ kə dɨɨ me!

⁶ Nɨniŋ, mə kəə lumə tɨ́ ghɔ laa, a kɨ ndeynə laa vəkɔ mbɨə faŋ Nwi nə kɔ̀ tɨ́ ghɔ maa yighee njyə faŋ mə nə mɔ̀ꞌ ghɔ ŋaa tɔ ghɔ nə, kɨ faꞌ taa ŋwaa ghɔ,

⁷ gə nə vɨsɨ. Zwitə ŋkɨə faŋ Nwi nə kɔ̀ tɨ́ nsiŋ nə, kee lùu zwitə maa məfee me. Zwitə kɔ́ bee kii yɨ̀sə wutə lwaŋ taa ŋwaa-nsiŋ, nə ŋkawnə, nə məjiatə ŋwaa.

⁸ Kɨ tɔ kə dɨɨ maa məbiŋ nu tɨta ŋwaa-nsiŋ ntee me, tɨꞌnə me buꞌ mə faŋ mə lùu wuu ŋii mfiŋ buꞌ nu Kristo kɔ́ nə me. Bàw a bee kii bìŋ ŋɨꞌ buꞌ nu ntɔŋ yijəə yɔ́ nɨzi, faŋ Nwi kɔ̀ wutə tɨ́ nsiŋ nə.

⁹ Ŋwə nə bwèysə nsiŋ, shoꞌ nsiŋ maa vɨɨ ley vi, kee kɨ tii nsiŋ buꞌ vənu vəjəəvə vaŋ-nsiŋ me. Ŋwə nə tìi nsiŋ luu buꞌ faŋ nshɨ-tɔ wi nə kɔ̀ꞌnə taa fwi ŋwə shù fɨ maa vənzi və mbi, laa ŋwə ndɔ kee gəŋ saŋ-nsiŋ, faŋ ŋwə ndɔ tɔŋ Yeso Kristo tɨ́ nsiŋ nə.

¹⁰ Lùu ndwə, ŋkə fùu ntee, faŋ wuu məbweysə ŋwaa-nsiŋ, Yeso Kristo nə fùu mbi, ndìsə yiku, nùŋsə məbwey vəlwaŋ faŋ ŋwə gòꞌsə yighee muꞌ tɨ́ vɨɨ mbɨə faŋ vəŋ zɔ ntɔŋ yijəə yɔ́.

¹¹ Nwi nùŋsə mə laa mə kɨ fɨꞌtə ntɔŋ yijəə yɔ́, baa lùu wuu ntɔŋ Kristo, deesə nu ki tɨ́ vɨɨ.

¹² Lùu ŋiꞌ nu ŋkɨə faŋ mə ye ŋɨꞌ shɔ ndwə nə. Luu nə, tɔ kaŋ kee dɨdɨɨ me, buꞌ laa mə kɔꞌ kɨɨ nə wə ntɨə faŋ mə nùŋ fwi nyaa maa ŋwə nə, baa kɨ̀ɨ yinsəŋ laa wutə ki kùꞌnə maa məshiinə nu ŋkɨə faŋ Nwi nə nùŋsə shee, gə ziꞌ maa shi ŋkɨə faŋ ŋwə ndɔ kɔ tɨ́ mə.

¹³ Jia yigisə yinsəŋ njyə faŋ mə nə dèesə ghɔ shɔ nə, kɨ deesə sheꞌ nɨniŋ, nùŋ fwi yə maa Yeso Kristo, dùꞌ taa ŋkawnə njyə faŋ ŋwə kaw nsiŋ shɔ nə.

¹⁴ Nuŋsə vənu vəjəəvə vɔ́ faŋ Nwi kɔ̀ tɨ́ ghɔ nə. Zwitə Ley Nwi faŋ ŋkə lùu taa fwisə nsiŋ, taa gaŋtə ghɔ.

Faŋ vɨɨ mɔ́ꞌ nə mèꞌ Pɔɔl, Onesifɔrɔs gaŋtə ŋwə

¹⁵ A kɨɨ laa vɨɨ vənshə fɨ nsi Asia mèꞌ mə. Vɨɨ mɔ́ꞌ fɨ taa ŋwaa vəŋ luu Figelɔs nə Hermojenis.

¹⁶ Bàw tɨta Nwi gaŋtə ŋiꞌ ŋii Onesifɔrɔs, buꞌ laa ŋwə nəə zwisə fwi nyaa ghee ghee, tɔ ki kee dɨ̀ɨ buꞌ mə, faŋ mə lùu mfiŋ nə me.

¹⁷ Ŋwə yaa ziꞌ shɨ Rom, kə̀ə mə nə wutə, yè mə.

¹⁸ Bàw tɨta Yeso yɨsə tɨta Nwi kee gəŋ si maa shi vəndwə və mbi. Nshɨ-tɔ wə kɔꞌ kɨɨ nə vəfaꞌ vəkwalə mbɨə faŋ ŋwə nə gàŋtə nsiŋ shɨ Efesɔs.