2 Pita 3 - Vengo (Babungo)

Faŋ Yeso ndɔ baa bəŋ jwì yinsəŋ

¹ Vɨɨmba vaŋ faŋ mə kàw, lùu vəŋwaꞌlə lwesə vəbɔɔ, faŋ mə nyɔ̀ꞌ tɨ́ viŋ. Taa vəŋwaꞌlə vɔ́ vəbɔɔ nə, mə kɨ lumə vənu tɨ́ viŋ faŋ viŋ duꞌtə viŋ kɨ̀ɨ nə mbə, tɨ́ kaꞌ viŋ yenə fɨ mbweysə, kɨ kii tɔ ley maa nu Nwi.

² Mə nyɔ̀ꞌ vənu vɔ́ laa, viŋ kɨ lumə təgi tɔ́, faŋ nshiisə-ŋii sɔghɔ nə nàysə fɨshi, baa nə laa viŋ kɨ lumə ntɨ njyə faŋ tɨta Yeso faŋ lùu wuu məbweysə ŋwaa-nsiŋ, nə nàysə tɨ́ viŋ, laa viŋ kɨ yɨ. Ŋwə nə nàysə vənu vɔ́ tɨ́ viŋ, mbə shɔɔ fɨ ghɔ vɨɨ ntɔŋ vi, vəŋ naysə tɨ́ viŋ.

³ Viŋ kɔꞌ kɨɨ jəə jəə laa vɨɨ məshɨꞌ vɨɨ Nwi ndɔ fuu, kɨ shɨꞌ viŋ shɨshɨꞌ maa yighee shə. Vɨɨ vɔ́ ndɔ kɨ yɨsə sheꞌ vənu faŋ too vəŋ kàw, kɨ shɨꞌ viŋ shɨshɨꞌ,

⁴ gì laa, «Yeso Kristo nə bee kɔ̀ꞌnə laa yi ndɔ baa bəŋ jwì lee? Ŋwə sii bə?» baa nə laa, «Vənu vənshə luu sheꞌ faŋ mbə nə dùꞌ shù fɨ faŋ mbi nə tèy, shù fɨ faŋ vətɨɨ vaŋ-nsiŋ yaa kùkə nə. Tuu nu kee yikwiinə me.»

⁵ Vɨɨ vɔ́ faŋ vəŋ gisə nɨniŋ nə, vəŋ manə nu kəmuꞌ, laa yizɔ nə nsi yimɔ́ꞌ nə luu shɔ ŋkee fɨshi. Maa yighee yɔ́ Nwi nə gì laa nsi yɔ́ fuu fɨ maa muu. Nsi yɔ́ kɨ nii fùu fɨ maa muu.

⁶ Nə baa luu ŋkee muu faŋ Nwi nə ndì maa məbɨsə mbi yimwa yɔ́ shɔ, yighee njyə faŋ muu nə fùu, lwàŋ shɨ nsi, zwìlə vɨɨ vənshə.

⁷ Nwi nə baa gì laa yizɔ ghɔ nsi faŋ vɨ ye ndee, ndɔ twàŋ wisə twàŋ nyə yinshə. Yizɔ nə nsi ndɔ goꞌ kɔ̀ tɨ́ yighee njyə faŋ Nwi ndɔ kɨ sɔꞌ nsɔꞌsə vɨɨ, ndìsə vɨɨ bwənə faŋ vəŋ kee zɔnə ŋwə me.

⁸ Vɨɨmba vaŋ faŋ mə kàw, kɨ viŋ manə nu kwalə mɔ́ꞌ me, laa vɨsɨ Nwi, shi kəmuꞌ kee lùu nɨŋkwiŋ fɨ ghɔ ŋuꞌ ŋkaŋ me, ŋuꞌ ŋkaŋ kee lùu nɨŋkwiŋ fɨ ghɔ shi kəmuꞌ me. Nwi ndi sheꞌ yaa fa kəmuꞌ.

⁹ Vɨɨ mɔ́ꞌ bɨꞌtə laa Nwi tày dɨdɨꞌ, baa nə laa ŋwə kee ndɔ yɨ nu ŋkɨə faŋ ŋwə nə kɔ̀ꞌnə laa yi ndɔ yɨ me. Ŋkə kee lùu nɨniŋ me. Ŋiꞌ nu kɔ́ lùu laa, Nwi jìa fwi yi tɨ́ viŋ, kɔ̀ jɨɨ tɨ́ vɨɨ laa vəŋ kwiinə fwisə vəŋ. Nwi kee kàw laa vɨɨ mɔ́ꞌ lee məbwey vəlwaŋ me. Nwi kəə laa vɨɨ vənshə kwiinə fwisə vəŋ.

¹⁰ Viŋ kɔꞌ kɨɨ laa, yighee ndɔ kɨ kuꞌ, faŋ tɨta Yeso ndɔ bəŋ jwì, ŋwə ndɔ gwəkə jwi yaa ndɔꞌ, faŋ ndɔꞌ yaa kɨ jwi faŋ vɨɨ kee yikɨɨ me. Maa yighee yɔ́, vɨ ndɔ zɔ gɨ yikwalə yimɔ́ꞌ laa «kwaŋ», yizɔ kee baa lùu shɔ me. Vətɔ fɨ yizɔ nə fɨ nsi yey taa wi vənshə, mè laylay. Nsi nɨzi, ghɔ vətɔ vənshə faŋ mbə lùu shɔ, me vənshə.

¹¹ Nɨniŋ, bàw viŋ shi kɨ kɨꞌ, faŋ viŋ duꞌtə viŋ kɨ̀ɨ laa vətɔ vənshə ndɔ ndi. Viŋ shi nə nshinə njyə faŋ nyə kùꞌnə tɨ́ vɨɨ Nwi, kɨ zɔnə ŋwə maa vənu vənshə.

¹² Viŋ tə sɨ ghiŋ maa shi ŋkɨə faŋ Nwi ndɔ jwi sɔꞌ mbi, kɨ yɨ laa kaꞌ shi kɔ́ yasə jwì. Lùu shi ŋkɨə faŋ yizɔ ndɔ kɨɨ shɔ ndì. Vətɔ vənshə fɨ yizɔ nə fɨ nsi ndɔ yey taa wi. Tuu kee fa kee ndɔ goꞌ me.

¹³ Luu nə, Nwi kɔ̀ꞌnə nsiŋ laa Nwi ndɔ naysə yizɔ yifinə nə nsi yifi, faŋ vənu vənshə ndɔ luu vəloomə. Lùu nu ŋkɨə faŋ nsiŋ kɨꞌ laa ŋkə ndɔ gay.

Faŋ bàw viŋ lootə yiŋwaa, kɨ kɨꞌ shi ŋkɨə faŋ Yeso ndɔ bəŋ jwi

¹⁴ Nɨniŋ, vɨɨmba vaŋ faŋ mə kàw, viŋ kɨ luu kɨ kɨꞌ vənu vɔ́, viŋ kəə jɨɨ kɨ yɨ vənu vəjəəvə ghee nshə, laa tuu wee-ndoꞌ kee lùu maa viŋ vɨsɨ Nwi me, tɨ́ kaꞌ viŋ Nwi duꞌ nyɔŋ.

¹⁵ Viŋ lumə laa, nu ŋkɨə faŋ Yeso tày shɔ nə, lùu laa viŋ kii jɨɨ, tɨ́ kaꞌ viŋ ndɔ bwey. Weenshu ŋwaa-nsiŋ Pɔɔl, faŋ nsiŋ kàw ŋwə nə, nə nyɔ̀ꞌ tɨ́ viŋ sheꞌ nɨniŋ fɨ maa tɔ ley ki, faŋ ŋkə ndɔ̀ fɨ ghɔ Nwi.

¹⁶ Taa vəŋwaꞌlə vi vənshə faŋ ŋwə nə nyɔ̀ꞌ kɔ̀ŋ vənu vɔ́ tɨ́ viŋ, ŋwə nə nyɔ̀ꞌ sheꞌ nɨniŋ. Luu nə, vənu vəmɔ́ꞌ taa vəŋwaꞌlə vɔ́ lùu vəweꞌ. Vɨɨ mbɨə faŋ vəŋ kee kìi tɔ ley me, faŋ vəŋ kee tɨ̀ŋ vəweꞌ maa nu ŋkɨə faŋ vəŋ biŋ me, vəŋ ndì yigi yɔ́ kwiinə, sheꞌ faŋ vəŋ ndì yigi fɨ taa ŋwaꞌlə Nwi, kwìinə nɨzi. Faŋ vəŋ yɨ nɨniŋ, vəŋ suŋ nsɔꞌ Nwi, nùŋ tɔ vəŋ.

¹⁷ Gə fɨ maa viŋ, vaŋ-nshwi vaŋ faŋ mə kàw, viŋ duꞌtə viŋ kɨɨ nə vənu vɔ́ ndwə. Nɨniŋ, mə naysə tɨ́ viŋ laa, viŋ ndi yighee, laa vɨɨ mbɨə faŋ vəŋ kee zɔnə Nwi me, kee yɨ laa viŋ fiŋ taa ghuu yitoꞌ vəŋ me. Kɨ viŋ kɔ jɨɨ tɨ́ vəŋ laa vəŋ yɨ viŋ meꞌtə shəŋ jəə ŋkɨə faŋ viŋ tɨ̀ŋnə shɔ nə me.

¹⁸ Viŋ tɨŋnə sheꞌ taa shəŋ jəə kɔ́, weꞌ shɔ, tɨ́ kɨ kaꞌ tɨta ŋwaa-nsiŋ Yeso Kristo, faŋ lùu wuu məbweysə ŋwaa-nsiŋ, tu mənɔŋ-bwaŋnə tɔ viŋ. Viŋ baa kɨɨ nə ŋwə jəə. Nsiŋ kɨ bəŋsə ŋwə, faŋ ŋwə kìi feenə wi ghee nshə.