Zacharie 9 - UNIMBƆTI NYƆƆBUNDI GBƆŊKU

ISIRAYEEL YAB NÌ ATIMBUN ŊIN KÍǸEE YAB Anibul ŋin māntìi tú Isirayeelee bɔsooŋyi nì ŋi-fiil

¹ Ti-Dindaan nyɔɔbundi. Ti-Dindaan bɔti bàn̄ Adiraaki tiŋki, ní ki gbēeǹ Damaasi tiŋkin. Di sá yii ti-Dindaan nimbil kaa cɔ́ Isirayeel tiŋki ŋmaniŋma pu, ama ki kpáaǹ binib kɔkɔ pu ní.

² Dinyɔɔbundee sòoǹ nì Amati yab bin pìlīǹ Damaasee, nì Tiir nì Siidɔn timmu yab bin cáá iciinee.

³ Tiir yab máń digundi ki māntìi tú bi-tiŋki. Bi kóoǹ animbil an dɔ̄ ki kpúkú kii dibulee, ní ki kóoǹ sindaariya an dɔ̄ ki kpúkú kii didandi pu kpatee.

⁴ Ama ti-Dindaan làá dāá já kí fōō-kì, ní kí téé ki-gundi ki lúkú tiŋkun, ní ŋŋmi ń dāá wà-kì.

⁵ Asikeelɔn yab yaa láa ká mimmee, tifaandi làá dāá cúú-bi, ní Gaasaa yab ń dāá nīn jìkì tifaandi, ki kpáaǹ Eekrɔn yab, di sá yii baa ti làá ká un làá jòoń-bee. Gaasaa tiŋki kaa dāa gíti cáá ubɔti, ubɔ kaa dāa gíti kóò Asikeelɔn tiŋkin.

⁶ Nyaaŋmaliŋku nib di làá dāá nìn kóò Asidoodi. Man ni-Dindaan di lī yii: «M làá dāá kúntí Fiiliistii yab lambil.

⁷ M làá dāá nyāntí tinan tin cáá fatikuee bi-nyɔmmun, kí lēē tiwaatootinan bi-nyiŋŋin. Bi-kansikin bin làá dāá kíń kí nīn bí dimaŋfalinee làá dāá yíiń-mi bi-Nimbɔtiu kii Juuda maaliŋun yabee. Eekrɔn yab làá dāá kɔ́ m-nibul kansikin kii Jeebusi yab nín nìn ŋá puee.

⁸ M làá dāá màntīí tū m-tiŋki kí nīn cí-kì, kí mɔ̄tì ki-pu binannanliibi bin cá ki gítiń ki là kí jáǹ-kèe cee. Upɔndaan ubɔ kaa làá ti dāan̄ kí wɔ́b́ m-nibul, kun puee man m-ba di cí-bi.»

Ŋgbansɔŋfi bɔtiu

⁹ Siiyɔn tiŋki, nín̄ fàal̀! Jeerusaleem, nín̄ kūuntí nì dipɔɔpindi! Kpèè, a-bɔtiu dòoń a-cee. U sá deedeedaan ní ki sá ujajil. U sīntì u-ba taapu, ní ki kā kimaŋ pu, u kāń dimampɔmbil, kimansalii biki pu.

¹⁰ U làá dāá kúntí janjatɔrɔkub Eefiraayiim tiŋkin ní kí dāá kúntí kujaau taamui Jeerusaleem tiŋkin. U làá dāá kɔ̄fì kujaau tɔfii. U làá dāá cáań ŋgbansɔŋfi atimbun kansikin. U-beel làá dāá kíĺ Ŋyaam mɔɔl kí tin cáá sāā Meediiteeranee tiŋkuu, ní kí yòon̄ Eefiraati mɔɔl kí tin cáá sāā kitiŋ gbeennyɔkɔ.

Ti-Dindaan làá líí bisarkadambi

¹¹ Dipoondi din bí man nì ni kansikin ti dū saraabi fatikuu ki bóob́ee puee, m làá nyāntí ni-sarkadambi bin kā dilɔkɔgindi din kaa cáá nnyimee poon kí líí.

¹² Bisarkadambi bin cáá dimákalee, fàtīí gítímaan ni-tiŋki kin bi máń digundi ki māntìi túee. Díǹ gba, m tùkù-ni yii: M làá ŋá-ni tiŋan mili pu kí téeǹ falaa un ní ni jíńee pu.

¹³ Juuda tiŋki ní m làá dūú píĺ kii butɔbuee ní Eefiraayiim tiŋki ń nīn sá ipiin. Siiyɔn, m làá tɔ̄ a-jipɔmbi bí cùú já nì Greesi yab. M làá dū-bi kí kpántí ubaatandaan tàataajiki.

¹⁴ Ti-Dindaan làá nyā kí páanní u-nibul yilpu, ní kí tɔ̄ u-piiŋŋu kii utaa nín ŋmóò puee. Ti-Dindaan Unimbɔti làá búń ŋyin, u làá nīn kāń kubuŋu kun nyánní ŋgiil púee kí dāan̄.

¹⁵ Ti-Dindaan Mpɔŋkɔdaan làá dāá wúń u-nib pu. Bi làá dāá wīī kí nà kujaataafuŋ taŋkpeeŋi. Bi làá dāá yàntī bi-nannanliibi fatikuu ń còol̀ kii ndamamee, kii saraabi fatikuu nín còol̀ kisambikin puee, àá kii fatiku un bi cáa yàantí nsaraafan yiŋyi puee.

¹⁶ Ti-Dindaan bi-Nimbɔtiu làá dāá fīī-bi ŋwiin gbanti dal kii upikpaal nín fìil̄ u-picaŋkpuŋku puee. Bi làá dāá nīn jìl̀ pàlpal bi-tiŋkin kii ataŋkpamɔnti ŋin jìl̀ ki náká kibeefuulii puee.

¹⁷ Bi làá dāá nīn bí mmɔnneeee! Bi làá dāá nīn cáá kunyaaŋŋu! Bilee làá dāá yàntī binaacimpɔmbi ń yábití, ní ndapɔm ń dāá yàntī bisapɔmbi mun ń yábití.