Yoob 7 - UNIMBƆTI NYƆƆBUNDI GBƆŊKU

Yoob bíi yáliŋkí Unimbɔti pu

¹ Unil bítam kitiŋ nee pu bí kii sooja tundee ní, a lì kii upaadaan maŋfal wiiŋyee.

² Kii uyumbu nín fèefī ki nyàab̀ mboon puee, kii upaadaan nín cí kí fōō u-paati puee,

³ míǹ ní an bí-mi. Iŋmal iŋmal sɔ̀ m-maŋfal kaa ti bí tiban. M-paatii di sá iyaliŋki nyati.

⁴ M tin pée lì yii m dòontée, m kíĺ ki bíi bàlifī m-ba yii: «Ŋyunti ŋulɔŋu ní kutaa làá wúntí dee?» Kunyeeu nee fɔ̀kɔ̀, ní m dɔ̄ ki lábití m-ba áli kutaa ń dāá wúntí.

⁵ Ijiliŋkpaam nì ipɔkɔ gbí m-wunti kɔkɔ pu, m-wuŋgbaŋŋu lɔ̄tì lɔ̄tì ki kíǹ ki nyēē nnyim.

⁶ M-maŋfal wiiŋyi bíi sáń malaa malaa ki jítiǹ usatalul gulfajantiliikee. M-maŋfal wiiŋyi bíi kúntí dee, dimákal kaa ti bí.

*

⁷ Unimbɔti, téetí yii m-maŋfal sá kufoou ní, m-nimbibul pée gíti kpá kí ká nnaam.

⁸ Sii un di nìn kpèé-mee, aa ti làá wāl̀-mi. A làá dāá nyàab̀-mi, ama m dāa gíti kpá.

⁹ Kii ditagbandi nín búntí pu kí wāŋkèe, míǹ ní unil un nín sìntī ditaŋkpiilinee kaa ti gítiń.

¹⁰ Udaan yaa búntèe, waa ti gítiń u-dumpu, ní laakin u nìn kóòyee, bi kpáàa pée súntì u-pu kpalaa.

¹¹ An pu ní maa ti làá ŋmā kí nīn ŋmí. M làá sòoǹ m-nimbinaamandi nee poon, m làá yāliŋkì, kun puee m-nyɔkɔ túŋkì.

¹² M sá tiŋku àá kupeebiliŋŋu kun bí nnyimineeee? Kin ba pu ní a cí-mi míǹ?

¹³ M yaa lī yii m làá dòon̄ m-lambaŋki pu kí ŋùŋfì, aayee, m làá dòon̄ m-dooŋu pu m-pɔbil ń sɔ̀ŋkèe,

¹⁴ ní a cáá tidamintiil ki fàantí-mi. Kun kun a lèekī ki dàkà-mee kɔ̄ntí-mi dinyoondi.

¹⁵ A yaa bàà nyīī m-sil ki kūū-mi gba, m bàà là! M yaan kpíì gba, an sɔ́ǹ m nín bí ki sá akpab ŋma nee.

¹⁶ M gīiǹ m-ba, maa làá nīn bí ki cá jaanjaan. Maa ti bí tiban, yàntī-mi soooo.

*

¹⁷ Ba ní unil sá ní a dàkafī u-pu ní? Ba pu ní aa pée mɔ̄ u-pu míǹ?

¹⁸ A-nimbikpeeŋu pée cɔ́ u-pu ní kutaafaau kamaa, ní ki cɔ́ŋkí-u ŋyunti kamaa.

¹⁹ Ŋyunti ŋulɔŋu ní a làá gbèen̄ kí taa ti kpèè-mi ní? A làá pée yàntī kubuŋu ń fáá m-pu dalbaaa?

²⁰ Báà m yaa yīntì, ba ní an ŋáań-si ní, sii un cɔ́ŋkí inifunaanee? Ba pu ní a màkantí-mi kii ukpan nín màkà upeel puee ní? M kalin kpántì diwaŋgul ki tīī-si níii?

²¹ Ba pu ní aa là kí dū m-yìntitam kí pɔ̄-mi, kí fàtī a-boon kí tīī m-kpitii ní? Man di cá kí dòon̄ ntaminee, a làá dāá nyàab̀-mi, ama m dāa gíti kpá.