Yoob 39 - UNIMBƆTI NYƆƆBUNDI GBƆŊKU

*

¹ A nyí dibindi poon ŋyunti ŋun kijooŋɔjakai màal̀eeee? A gíti dáá ká icaŋkpalim nín màal̀ pueeee?

² I yaa cáá apooyee, an ŋáań iŋmal iŋa ní í nín màal̀ ní? A nyí ŋyunti ŋun i màal̀eeee?

³ I gbàantí ní ki màal̀ i-biyaamu, ní imatiŋween ń kúntí.

⁴ Mbiyaamu pée tɔ́ mu-ba ní kí wíiǹ kí ká mpɔn, ní míǹ boonee mú yīkì mu-na cee kaa ti gítiń.

*

⁵ Ŋma di yāntì kumooun maŋki tɔ́ ki-ba ní? Ŋma di léetì-kì ŋŋmii ki yāntì ki búntì ní?

⁶ M yāntì kì kóò kuteeu pu. Laakin kì kóòyee sá kitiŋ kin cáá ŋyaamee ní.

⁷ Kíǹ bèel̄ kitiŋin wooku ní kaa gbìl̀ dalba ukpil ubɔ tátí ki-pu.

⁸ Ajoon pu di sá ki-naakpaapɔɔku ní kì yìiǹ niin ki nyàab̀ tin kamaa sɔ̀m̀ee kí ŋmɔ́.

*

⁹ Upɔɔnaa kíikí kí nīn sá a-tɔntɔnliuaaa? U kíikí kí dòon̄ a-naabakakun kunyeeuaaa?

¹⁰ A ŋūǹ kí kpàl̄-u ú kpɔ̀ tikpaalaaa? U kíikí kí páań a-boon ditantakalin kí dáaĺ akoooo?

¹¹ U nín cáá mpɔn tikpil puee pu ní a làá nīn máká u-pu kí yàntī ú tɔ̄ a-tundaaa?

¹² A ŋūǹ kí nīn máká u-pu ú fàtīí gítiń kí cáań a-jincakaati kí páań kukaatuŋu puɔɔɔ?

*

¹³ Taataa feeŋyi yaa gbáà tɔbee, an tìì nsiim min mɔ̄ee ní, ama waa ŋūǹ kí ŋàaǹ kí bà naakpaapiin.

¹⁴ U tòó u-jiŋŋi kí bíĺ kitiŋ ní kí dūú ŋá ntamin an kákatí.

¹⁵ U súntí yii kuwaŋkuluu kubɔ ŋūǹ kí còom̀ ŋi-pu, yii upeel ubɔ ŋūǹ kí tāā-ŋi ŋí wīī.

¹⁶ U ŋáań u-biyaamu ntoom kii waa yì-muee, an kaa ká-u yii u gīī mu-pu fám.

¹⁷ Kun di yì-tèe di sá yii maa tīī-u iciin, maa yākatì dinyil ki kpáaǹ-u.

¹⁸ Ama u yaa yíkìi síl̀ kí sāǹee, utaamu nì utanjakal sá u-cee agbiil ní.

*

¹⁹ Sii di tìì utaamu mpɔnaaa? Sii di dū kugaŋŋu ki páaǹ u-sil puɔɔɔ?

²⁰ Sii di yàntī u yùkufī kii unaakeeee? U yaa fōotèe, an cáá tifaandi ní.

²¹ U cáá u-taaŋi ki fátí kitiŋ, ní kí dū u-ba kí bíĺ dikɔ̀ndin nì mpɔn.

²² Waa dū kufaaŋŋu ki yíiń tiba, ní kaa fàŋkí tiba, kitàataajiki kaa yàntī ú gítí u-boon.

²³ Dibaatandi yaa ŋáań kuwoou u-pu u gbìl̄ee, kikpaŋ nì kitàataajiki yaa ŋmóò làka lakee,

²⁴ an kaa ti ŋáań-u malaa, u cútíí cóotí ní. Bi yaa búń dikantándee, waa ti ŋūǹ kí cúú u-ba.

²⁵ Bi yaa búń dikantándee ní ú fòotī. Ndan ní u gbìl̀ kujaau nuŋu nì bijanjakpilib kuŋkuuntii nì kujaau biilii pu.

*

²⁶ Sii di tùkù ukaabu ú yīkì kí ŋàaǹ kí kpátí u-feeŋyi kí túĺ ŋgiil púɔɔɔ?

²⁷ Sii di tìì ukaalun mara ú yīkìí ŋàaǹ àá ú ŋá u-diiku kí páań dijool yilpuɔɔɔ?

²⁸ U kóò ataŋkpee kansikin, ní ki gèeǹ ditaŋkpal din cɔ́m̀ ubɔ kaa ŋūǹ kí bèe pu.

²⁹ Yilpu niin ní u cɔ́ŋkí ki kpèé kuwaŋkuluu kun u làá cúúyee, u-nimbiliŋ ŋūǹ kí wāl̀-ku ndan.

³⁰ U-biyaamu nyù fatiku ní. Laakin diwaŋkpil yaa bée, niin ní u bí.