Yoob 37 - UNIMBƆTI NYƆƆBUNDI GBƆŊKU

*

¹ M yaa gbìl̄ mimmee ní m-pɔbil ń bīil̀ ní ki kíǹ ki máfí.

² Pīlifìmaan ditaadundi din sá Unimbɔti neelee, pīlifìmaan didundi din nyēē u-nyɔkɔnee.

³ U yàntī utaa ŋmóò ki pùntī kutagbɔŋu, kí yòon̄ kitiŋ nyɔkɔ kiba kí cáá sāā kin kíǹee.

⁴ Míǹ boonee, bi gbìl̄ nneen ŋubɔ pu, di sá yii Unimbɔti fáá dibintiŋkpaandi. Ŋyunti gbantee ní Unimbɔti yāntì utaa ŋmɔ́ ní bi gbìl̄ u-neen pu.

⁵ Unimbɔti yaa sòoǹee, an bí kii ditaadundee ní ní an cáá maamaaci á gbìl̄. U tūǹ atuŋkpaan ŋin ní taa ŋūǹ kí gbìl̄ taapuee.

*

⁶ Unimbɔti tìì ntaayim mara mí lítí kitiŋ pu, ní kí yàntī utaakpaan ń nì cùuu.

⁷ U yàntī unil tuuŋŋi kɔkɔ ń gbèen̄, án nín làá ŋá pu unil un u náańee ń béé u-tuuŋŋee.

⁸ Ki kpáaǹ tiwaŋkuti sáń ki bāal̀ ní ki kíǹ ki dɔ̄ ti-naabakatin.

⁹ Kubuŋkpaaŋŋu nyēeń ŋgiil pú ní tiwool ń nyānní ŋgan pú.

¹⁰ Unimbɔti yaa fōotèe, nnyim kìl̀ ní, ní mi-yilpu ń pɔ̄ɔkì kaŋkaŋ kii tikútee.

*

¹¹ Unimbɔti dù nsɔnsɔm kí ŋá atagbanni, ní kí dū utaa nín ŋmóò puee kí gbéeǹ-ŋi ní kí tɔ̄-ŋi ijaan kɔkɔ pu.

¹² Míǹ ní u yàntī ŋi tú ki yìiǹ an kɔkɔ pu, kí ŋá kí nóó nì u nín là puee tin kɔkɔ u kpáafì-ŋi ŋí tɔ̄ kitiŋ nee puee.

¹³ An yaa sá kí dáaĺ unil tafalaaa, an yaa sá kí dàkà u-nitaaa, ŋíǹ ní Unimbɔti tūǹ.

*

¹⁴ Yoob, kpòon̄ a-tafal kí pīlifì tíǹ gbanti kɔkɔ tiŋan. Gbèen̄ kí kpèè Unimbɔti maamaacib!

¹⁵ A nyí Unimbɔti nín tìì atagban marab bin ki yàntī utaa ŋmóò làka lakeeee?

¹⁶ A nyí an nín ŋá pu kutagbɔŋu dàn̄ yilpueeee? Un nyí ki cíl̀ee di gbìl̀ an maamaaciu taapu.

¹⁷ Ŋyunti ŋun ŋgiil pú buŋku jītí an tùm̀ kpaŋkpamee, tiwan tin a pēēyee fòol̄ ní kí píĺ a-pu sìii.

¹⁸ Sii di nìn tútúǹ Unimbɔti ní u kpátì kutagbɔŋu, ki yāntì ku pɔ́ɔkì kaŋkaŋ kii digitil din bi dūntì tikúti ki nyūntèeee?

*

¹⁹ Yàntī tí béé tin ti máaǹ kí tùkù Unimbɔtee. Ti bí dibɔmbɔndin kaa cáá tiba kí lì.

²⁰ M yaa bíi sòoǹee, m máaǹ kí bàan̄-uaaa? Bi làá tùkù-u yii ubɔ sòon̄aaa?

²¹ Dicilpuee, taa ti wāĺ tiŋan: atagban dūu bīiǹ ŋwìiń pu. Niinee ní kubuŋu ń yīkì ní kí ŋàtī kutagbɔŋu.

²² Ŋgan púee, ŋwalifi ŋubɔ nyánní ki jìl̀ kii sindaariyee, ŋwalifi ŋun kaa cáá jutee māntìi tú Unimbɔti.

²³ U sá Unimbɔti Mpɔŋkɔdaan ní, taa ŋūǹ kí sútí kí pìl̄-u. Mpɔn poonee, u sá ukpaan ní deedee poonee, u tí sá ukpaan. Waa wɔ́b̀ un di bí deedee tiŋman puee.

²⁴ An pu ní binib máaǹ kí fàŋkì-u, ama waa dū bin yíì bi-ba biciŋfitiibee ki yíiń tiba.