Yoob 32 - UNIMBƆTI NYƆƆBUNDI GBƆŊKU

TIN EELIIWUU SÒON̄EE ( 32–37 )

¹ Yoob nìn gbíntìi cɔ́ yii u sá deedeedaan, an puee Eeliifaasi nì Biilidaadi nì Soofaar nìn gbēeǹ kaa ti bíi kíikí-u.

² Ama Eeliiwuu úǹ nìn gíí diŋuul. Eeliiwuu gbanti nìn sá Buusi naakookun, Ram dicaŋkun yɔu un bi yíì Barakeelee jipɔɔn ní. Kun pu u nìn gíí diŋuulee di sá yii Yoob nìn bíi pɔ̀ u-ba Unimbɔti nimbiin.

³ U nìn gíí Yoob bɔɔbi bitee mun pu diŋuul, kun puee baa nìn béè bi nín máaǹ kí kíí Yoob puee ki yāntì Unimbɔti fōō dibɔkpil.

⁴ Eeliiwuu nìn cúú u-ba kí taa sòoǹ nì Yoob, di sá yii bin kɔkɔ kíǹee nìn kpíǹ-u.

⁵ Ama Eeliiwuu nín ká yii bininjab bitee kaa ti cáá tiba kí kííyee, ní u fōō mbum.

Eeliiwuu bíi lì kun pu ní an sá ú sòoǹee

⁶ Ubuusija Barakeel jipɔɔn Eeliiwuu sòon̄ yii: M dáá pɔ̀ɔǹ ní nimbi cíkitì. An pu ní m fāŋkì kaa bàà là kí dū tin ma mun nyée kí bíĺ ni-nimbiin.

⁷ M lī m-ban yii: «Binicikitikaabi di máaǹ kí sòoǹ, bin yúntèe di máaǹ kí dàkà iciin!»

⁸ Ibaamɔn poonee, Unimbɔti Mpɔŋkɔdaan Fam di tìì unil dinyil.

⁹ An kaa sá a yaa púĺee ŋmaniŋma ní a kpántí uciŋfiti, an kaa sá titikpiti ŋmaniŋma di yàntī unil ń béé tin bí deedeeyee.

¹⁰ An pu ní m bíi gbàam̄-ni yii ní pīlifiǹ-mi: ma mun là kí sòoǹ tin m nyée.

*

¹¹ M pílifì soooo kí bàà gbìl̄ tin ni cáá kí sòoǹee, ni nín bíi nyàab̀ anyɔɔbun kí sòoǹee, m kpōoǹ m-tafal ní ki pílifì.

¹² M baasii pílifì ní soooo, ama ni-kansikin báà ubɔ kaa ŋúń ki kíí Yoob, tin u sòon̄ee, ubɔ kaa ŋúń ki kíí ki líì-u.

¹³ Ní taa lì yii: «Ti ká iciin: Unimbɔti baba di ŋūǹ kí sòoǹ kí líí-u.»

¹⁴ An kaa sá man ní Yoob bíi sòoǹ nì, ama maa làá kíí-u kii nimbi nín kíí-u puee.

*

¹⁵ Yoob, anyɔɔbun lóò a-bɔɔbi bita nee, baa ti cáá tiba kí sòoǹ nì si.

¹⁶ M kāl̀ ki cíitì. Bi nín kaa ti cáá tiba kí sòoǹ ki ŋmíl̀ee puee, maa làá nīn yú kí taa sòoǹ nì si.

¹⁷ Ma mun yuntiŋu bāań ḿ sòoǹ dee! m làá dū tin ma mun nyée kí bíĺ a-nimbiin.

¹⁸ M cáá tibɔti tikpil ki làá sòoǹ, ŋfam min bí m-nee téekí-mi ḿ sòoǹ.

¹⁹ An nùuǹ m-poon sàbsab kii ndaamee, a lì kii ndaam lɔti tin làá pōōyee.

²⁰ M làá sòoǹ ní kí tɔ̄ m-ba, m làá wàan̄ m-nyɔkɔ kí kíí.

²¹ Maa làá sòoǹ kí pɔ̀ gandi, kaa tí làá pàkà ubɔ fám.

²² Maa nyí bi nín pàkà unil pu fámee, m yaa bàà ŋáań míǹ, m-náanliu bàà yōoǹ-mi dooooyee.