Yoob 30 - UNIMBƆTI NYƆƆBUNDI GBƆŊKU

Díǹ falaau

¹ Ama díǹ nee, man ní binib bèel̄, binib bin man kpíǹee, binib bin baabi kaa nìn sàafì kí nīn bí m-booi kansikinee.

² Ba ní an nib gbanti nìn ŋūǹ kí ŋá kí tīī-mi, di sá yii baa nìn gíti cáá mpɔn ŋubɔ?

³ Ŋkùm nì falaa nìn yāntì binib gbanti kaa nìn gíti cáá mpɔn, ní ki nìn nyàab̀ tiba kí jī kitimpiliŋ kin wāā tiba kaa bí ki-pu nan ní.

⁴ Bi nìn lòol̄ nsugboomu faati, ní ki nìn ŋmóò isunyaan.

⁵ Báà ŋma nìn dū-bi ki fá, ní bi nìn jì-bi ki tátí kii digaŋgam dambee,

⁶ Bi kɔŋkooŋyi di nìn sá ibun in fóotèe poon nì ifal in dɔ̄ kitiŋee nì itaŋkpalɔkɔn.

⁷ Bi nìn dɔ̄ timool pu ki nyīī tɔb pu, bi nìn gbìl̀ bi sūǹ nsugboomun kii ipeelee.

⁸ Binib bin kaa bí tiban ubɔ kaa nyí bi-yiŋŋee, bi dū idɔ ki jìn̄-bi ki nyántì kitiŋ pu.

*

⁹ Ama kɔŋkɔnnee, man ní bi kíǹ ki cáa gà ilan, man di kpántì mmaam wanti ní bi cáa gbáà faawii.

¹⁰ Bi núutì-mi ní ki sáń-mi, bi tíiĺ ki làbitī-mi an kaa páb́-bi.

¹¹ Kun puee Unimbɔti gbáń ki kpātì m-tɔŋmiiŋu ki nāaǹ-mi, bi yaa wál̀-mee, bi ŋáań bi nín là puee ní.

¹² Dinikitil nee bíi jáà nì mi m-ŋaŋgiil pú, bi gāā-mi kinaakpaatakai ki nyàab̀ ḿ lítí. Bi bíi jáà nì mi ki là ḿ wāŋkì.

¹³ Bi gāā ki kíntì-mi ki pée nyàab̀ kí nàan̄-mi, bi-kansikin ubɔ kaa nyàab̀ ditutundi.

¹⁴ Bi sāā ki cíl̀ digundi din cí-mee ki bìl̄ ki kɔ́ m-pu, bi dì adigbuŋkati pu ki dòoń m-cee.

*

¹⁵ Dinyoondi kùl̄ ki kāl̀ m-pu, ki ŋātì m-nyooti kii kubuŋuee. M-jajil mákal wáŋkì kii ditagbandee.

¹⁶ Kɔŋkɔnnee falaa di māntìi tú-mi, diŋuŋfil kaa ti pée bí-mi báà fiii.

¹⁷ M-kpabiŋ kɔkɔ wù ní kunyeeu, an kaa pūǹ-mi nsan ḿ gèeǹ gba.

¹⁸ Unimbɔti cúú m-wampeeŋkaati mpɔn ki dáaĺ ki síkí m-sil.

¹⁹ U téé-mi ki tɔ́ tikpatin, m kpántì kii ntam nì ŋfantamee ní.

*

²⁰ M-Nimbɔtiu, m bíi kūuntí ki yíì-si, ama ní aa bíi kíikí-mi. M yú a-nimbiin, ama ní aa fātìi tɔ́ gba yii unil sí.

²¹ A kpántì tuutuutuu ní ki tīī-mi, a cáá a-pɔŋŋu kɔkɔ ki sàantí-mi.

²² A yāntì kubuŋu yōoǹ-mi ki cáa tɔ́ ki fá, ní ki yāntì kubuŋkpaaŋŋu cáá-mi ki yāŋkí an kɔkɔ pu.

²³ M pée nyí a nín cáá-mi ki cáǹ ŋkúminee, laakin ní binifoobi kɔkɔ cée.

²⁴ Ama an yaa bíi nàantí unil, waa tàntī u-ŋal kí nyàab̀ dijòońdaaa? Dinimbinaamandi poonee, unil kaa gbáà ibiil bí fīī-uaaa?

²⁵ Maa súń bin nìn bí dinimbinaamandi poonee puɔɔɔ? Bifalaadambi bɔti nìn kóò-mi inimɔɔn ní!

²⁶ M nìn kā ki cí nnaam, ama nnaabu ní m dāa ká. M nìn kā ki cí ŋwalifi ní dibɔmbɔndi dɔ́miń.

*

²⁷ M-pɔbil bíil̀ ki bíi gbáà mpɔn, falaa wiiŋyi ŋmaniŋma poon ní m bí.

²⁸ M bɔ̄ntì, ama an kaa sá ŋwìiń di gbáń-mi ní m bɔ̄ntì! M sīlifí samaa kansikin ní ki gbáà ibiil bí jòoń-mi.

²⁹ M-biilii yāntì m kpántì sinsiŋkub bɔɔ, ní ki kpántì itulinjaa naalib.

³⁰ M-wuŋgbaŋŋu bɔ̄ntì ki kíǹ ki nákatíi lítí. Nnaanyeem yāntì m-wunti píĺ kpaŋkpam.

³¹ M-beeku kíǹ ki gà ikpiisilan ŋma ní, ní m-wuliiki búǹ ki cēentí bin gà ilan ki sūǹee.