Yoob 29 - UNIMBƆTI NYƆƆBUNDI GBƆŊKU

Yoob nín kíí pu ki lúŋkèe

¹ Niinee Yoob fātìi kíĺ ki bíi sòoǹ ní ki bí yii:

² M yaa bàà ŋūǹ kí fàtīí gítí kii m nín nìn bí puee, ŋyunti ŋun m nìn bí Unimbɔti cí-mee,

³ ŋyunti ŋun ní u-walifiŋu nìn ŋmíntí m-yil yilpuee! U-walifiŋu nìn tútúǹ-mi ḿ còom̀ kí jītí dibɔmbɔndin.

⁴ Ŋyunti gbantee, m nìn dáá cáá mpɔn, Unimbɔti nìn píí-mi kubɔɔtiiu ní ki nìn wúń m-dicaŋku pu.

⁵ Unimbɔti Mpɔŋkɔdaan nìn dáá bí m-cee, ní m-jipɔmbi nìn sí ki māntìi tú-mi.

⁶ Ŋyunti gbantee, m nìn dēē digbilin ní, ŋkpam nìn còol̀ ditaŋkpal din pu bi ŋmāam̀ ŋkpamee.

*

⁷ M yaa nìn nyáń kitiŋ punyɔkɔpu ki cūtìi kāl̀ kí sòoǹ tibɔti,

⁸ ní binipɔmbi ká-mee, bi nìn pàatī ní, bitikpilib nìn yíkí ní kí yūĺ.

⁹ Abɔtibil yaa nìn bíi sòoǹee, bi ŋmīlifí ní kí dū bi-ŋalii kí bìin̄ bi-nyɔmmu pu.

¹⁰ Bikpilib nìn ŋmīlifí ní bi-nyɔmmu ń kpú.

*

¹¹ Un yaa nìn gbìl̄ m sòon̄ee pàkà-mi ní. Un yaa nìn ká-mee nìn lèekī m-pu seera ní.

¹² Usoodaan yaa nìn fáá mbiilee, m nìn jòó-u ní, ní ki nìn jòó ditaŋkpiibil din kaa nìn cáá ubɔ ń tūtuǹ-uee.

¹³ Un nìn kúùyee nìn mèé ki bìintí m-pu ní. M nìn tìì bikpiipoobi dipɔɔpindi.

¹⁴ M nìn dū tin bí deedeeyee ki pēeǹ kii dibɔkutilee ní. M-bɔkutikpaandi di nìn sá ḿ sòoǹ tibɔti nì ibaamɔn.

¹⁵ M nìn sá animbil ní ki tīī ujɔfu, ní ki sá ataa ki tīī ufaliŋfaan.

¹⁶ M nìn sá ubaati ní ki tīī unandaan, ní ki nìn mɔ́tí unicaan pu ibɔsoon poon.

¹⁷ M nìn gbáà ki wìil̄ bikpitiŋaliibi nyɔɔkpaweeŋyi, ní kí fōō un u cúú ki làá tɔ̀ntēe kí nyāntí u-nyiŋŋin.

*

¹⁸ M nìn lī yii: «M làá kàl̄ kitiŋ pu kí yúntí, ní kí kpú man m-ba diikun.

¹⁹ M bí kii busubu bun nyaaŋyi dēē nnyiminee ní, kunyeeu malindi sɔ̀ŋkī m-supampɔmbiliŋ.

²⁰ M làá fàtīí ká m-nyooti mpɔmin, ní m-tɔbu ń fàtīí pɔ̀ntī m-ni.»

*

²¹ Binib nìn cīití-mi ní ki pílifí tin m sòoǹee, bi nìn ŋmīlifí ní díkí diki kí pīlifì m-saŋkii.

²² M yaa nìn sòon̄ ki dóòyee, ubɔ kaa nìn kpākantí, m-nyɔɔbuŋŋi nìn mɔ̄ bi-cee kii ntaanyim nín jòotī puee ní.

²³ Binib nìn cīití-mi kii bi nín cīití utaa puee ní, a lì kii bi nín cīití umɔfiintaa puee.

²⁴ M yaa bíi lāā-bi méemeeyee, an nìn ŋáań-bi bitii ní, di sá bi nìn nyàab̀ kí ká m-nimbiin kulaŋŋaŋfitiiu daaŋku.

²⁵ Man di nìn sá bi-kpootiliu ní ki dàkà-bi nsan, m nìn bí bi-kansikin kii ubɔti un u-janjaliibi māntìi túee ní, m nìn ŋmēentí-bi kii bi nín ŋmēentí bin kā dikpoolee puee ní.