Yoob 21 - UNIMBƆTI NYƆƆBUNDI GBƆŊKU

Yoob nín kíí Soofaar puee: Ba pu ní an bútí binikpitib ní?

¹ Niinee ní Yoob kíí yii:

² Ní pīlifìmaan tin m làá sòoǹee tiŋan, míǹ ní ni làá ŋmā kí ŋméeǹ-mi.

³ Ní pɔ̄maan-mi diyimɔɔl ḿ sòoǹ. M yaa sòon̄ ki dóòyee, ni ŋūǹ kí bèel̀-mi.

⁴ Mimmee unil pu ní m bíi yáliŋkáaa? Aayee! Kin ba pu ní ḿ taa ŋmèè kí gīī?

⁵ Kpèèmaan-mi tiŋan, án làá bàkatīǹ-ni ní, ni làá dū ni-ŋalii kí bìin̄ ni-nyɔmmu pu ní kí taa ti sòoǹ.

⁶ Mama m-ba yaa bíi dàkafī tin bāań-mi nee puee, an cútí-mi kufaaŋŋu ní ki ŋáań-mi nyàaa.

*

⁷ Ba pu ní binikpitib gbíntìi bí dimaŋfalin ní? Ba pu ní bíǹ yaa púĺee, bi gbíntìi pɔ̄ɔ̄ ní?

⁸ Bi bí dimaŋfalin ní kí ká bi-biyaamu ń wíiǹ kí ká mpɔn, bi bí gba kí ká bi-naantiibi.

⁹ Bi-dumpuyee, bi bí ŋgbansɔŋfin ní kaa nyí kufaaŋŋu. Unimbɔti bambaaŋŋu kaa fátí-bi jaanjaan.

¹⁰ Bi-najaai yaa jɔ́m̀ isalee, i cāab̀ apoo ní, i màal̀ i-biyaamu kaa làtī jaanjaan.

¹¹ Bi-biyaamu sáń ki gbíiĺ kii kupicaŋkpuŋuee, ní bi-naantiibi tɔ́ bi-ba ki ŋōō.

¹² Bi bɔ̀ɔ́ agaŋgan nì tibati ní ki gà ilan. Bi búǹ kiwulii ní ki gbíiĺ.

¹³ Nnaam poon ní bi bí ní kí kpú nì ŋgbansɔŋfi.

*

¹⁴ Ama bi nìn tùkù Unimbɔti yii: «Yàntī-ti soooo, taa là kí béé a nín là tí nīn bí puee.

¹⁵ Ŋma di sá Unimbɔti Mpɔŋkɔdaan ní tí nīn sá u-yumbui ní? Ti yaa bíi mèé-uee, ba ní ti làá páatí ní?»

¹⁶ Binikpitib gbanti dàkafī yii bi-pɔŋŋu pu ní an bútì-bi, ama maa là kí nīn bí kii bi nín bí puee.

¹⁷ Ni kāntí binikpitib kúù ŋkúntuntukumaaa? Ni pée ká nnaabu jéetì bi-pu, àá Unimbɔti dáaĺ bi-tafal u-ŋuul poon ki káaa?

¹⁸ Baa bí kii kumoou kun kubuŋu yòontée, kaa tí bí kii kukpɔŋkpɔŋu kun kunaakpaabuŋŋu yòontée!

*

¹⁹ Ni lì yii Unimbɔti bɔ́ntì binikpitib gbanti tafadaaldi ki cíitì bi-biyaamu ní. Ama u yaa bàà dáaĺ bíǹ bi-ba tafal, an bàà cíikíǹ-bi!

²⁰ An máaǹ yii binikpitib bi-ba ń ká bi-naabuŋu ní kí dáká Unimbɔti Mpɔŋkɔdaan ŋuul kí kpèè.

²¹ Di sá yii unil maŋfal wiiŋyi yaa kúntèe, u-biyaamu bɔti kaa ti ká-u.

²² Ŋma di ŋūǹ kí dàkà Unimbɔti tin u máaǹ kí ŋée? Unimbɔti u-ba kaa sòoǹ ituun bɔtaaa?

*

²³ Biba bí nnaam poon ní kí kpú, bi bí ŋgbansɔŋfin ní tiba kaa páb́-bi.

²⁴ Bi jíń tijimmɔntiil ki bí màlmal, ní bi-kpabiŋ coom dáá sɔ̀m̀.

²⁵ Ama biba muee, bi-maŋfal poon wiiŋyi pée sá ntuntun ŋma ní. Baa pée ká nnaam ki dáká dalba dalba.

²⁶ Ama bi-kɔkɔ kpíì ní bi síb́-bi, ní akoosibil kpátìi bīiǹ bi-kɔkɔ pu.

²⁷ M nyí tin ni dàkafēe tiŋan nì ni nín cáá m-pu ilandɔkɔkpiti iŋyee.

²⁸ Di sá yii ni lì yii: «Biwɔ́biliibi diiku bí la? Bitɔŋfitiibi kɔŋkooŋŋu bí la?

*

²⁹ Naa bàlifī bin còom̄ nsanee níii? Naa là kí fōō tin bi sòoǹee kí kíí níii?»

³⁰ Nnaabu wiiŋŋuee, tiba kaa ŋáań unikpiti, Unimbɔti ŋuul pée yàntī-u ní soooo.

³¹ Ubɔ kaa bí kí kɔ̄kɔl̀-u, ubɔ kpá kí pà-u u-tuuŋŋi paati.

³² U yaa kpíìyee, bi cáǹ-u kuceeun ní, ní binib cí u-kaakul.

³³ Ntam min bi làá dūú bìin̄ u-puee kaa nyìm̀ u-pu, ní samaa kɔkɔ pá u-dakaau boon. Bin līī u-nyɔkɔpuee kaa bí ŋkaan!

*

³⁴ Mana ní ni dàkafī yii ni làá ŋmā kí dū anyɔɔbun ŋin kaa cáá taapu nee kí ŋméeǹ-mi ní? Ni nín kíikí-mi puee sá tinyimɔmbɔti ŋma ní.