Yoob 14 - UNIMBƆTI NYƆƆBUNDI GBƆŊKU

Unil maŋfal wiiŋyi kaa fɔ̀kɔ̀ ní ki gbí isaa

¹ Unimpu saaleen di màl̄ unil. U-maŋfal wiiŋyi kaa pée fɔ̀kɔ̀ ní ki cáá agìń.

² Unil bí kii nsupumpukumee ní, u wīintí ní kí yɔ́ĺ. U bí kii mboon nín bí puee ní, kaa yúntí.

³ Mimmee Unimbɔti, an niliu gbanti ní a kpèéee? Man ní a cáǹ ibɔsoonaaa?

⁴ Ŋma di ŋūǹ kí lēē circir wanti tin kaa bí circiree poon? Báà ubɔ kpá!

⁵ Di sá yii sii di kàan̄ unil maŋfal wiiŋyi ki tīī-u, sii di síiǹ iŋmal in nyɔkɔm u máaǹ kí ŋée, sii di síiǹ u-maŋfal gbeennyɔkɔ kin waa ŋūǹ kí jītée.

⁶ Páatí a-nimbikpeeŋu u-pu kí yàntī-u soooo, ú ŋmā kí kúntí u-maŋfal wiiŋyi ŋgbansɔŋfin, kii upaadaan nín kúntí u-tundi ŋwiin puee.

*

⁷ Busubu búǹ cáá dimákal: bi yaa gāā-bu, bu ŋūǹ kí fàtīí túkú, bu làá nīn pée cɔ́tí ní kaa gbèentí.

⁸ Báà bu-nyaaŋyi yaa púĺ kitiŋin ní bu-yil yaa ŋá kii di kpíì kitiŋinee,

⁹ bu yaa gbìl̄ nnyim puee, see bú fàtīí fìkitī ní kí tɔ̄ mpamu kii kisubikee.

¹⁰ Ama unil úǹ yaa kpíìyee, waa ti cáá mpɔn. Unil fooku yaa nyáń u-nee, u gíti bí tilatin?

¹¹ Dimɔɔl ŋūǹ kí fóotí, ibun ń kpā,

¹² ama unil un dōoǹ u-ŋaliŋu puee kaa ti yíkí. Kí cáá sāā ŋyunti ŋun kutagbɔŋu dáá bí nee, waa làá fìntī, u pée kpá kí yīkì u-geemin.

*

¹³ A yaa bàà dū-mi ki bál̀ ditaŋkpiilin, kí bàkā m-pu niin kí cáá sāā ŋyunti ŋun ní a-ŋuul làá sɔ̀ŋkèe, ní kí síiń-mi iwiin in nyɔkɔm m làá ŋá niin ní á nín téetí m-puee.

¹⁴ Ama unil un kpíìyee gíti ŋūǹ kí gítiń dimaŋfalinaaa? M bàà làá jī kimɔtii m-tumpɔɔl nee yuntiŋu poon, kí nīn cí ŋyunti ŋun ní ubɔ làá dāá fōō-mee.

¹⁵ Niinee a yaa yíiń-mee ní ḿ kíí-si, a bàà làá nyàab̀ kí ká man a-wannaaŋkaati.

¹⁶ Aa bàà làá gíti dū m-yìntitam kí yíiń tiba. Too, kɔŋkɔnnee, sii di bí ki kàaǹ m nín dàatī m-taaŋi puee.

¹⁷ A bàà làá dū m-yìntitam kí báĺ kilɔbikin, ní kí bìin̄ m-kpitii pu kii bi nín ŋàl̀ kudii puee.

*

¹⁸ Ama dijool cìŋkī ní kí yàaǹ, ní ditaŋkpal ń nìkī mpaan ŋun pu di nìn bée.

¹⁹ Nnyim ŋūǹ kí líntí kí dóó ataŋkpee. Utaa nì kí ŋmɔ́ kí càkatī kitiŋ. Míǹ mbaantiim ní a nàantí unil mákal.

²⁰ A dù-u kí yā kitiŋ ní ú búntí kaa ti gítiń. A bíiĺ u-nimbiin ní kí jà-u.

²¹ Bi yaa bíi tìì u-jipɔmbi jilmaaa, úǹ kaa ti pée nyí tiba, bi yaa tí sīntì-bi taapuɔɔɔ, waa tí nyí.

²² Waa ti nyí tiba ki kútì u-wuŋgbaŋŋu nín bíi jīǹ falaa uŋyee pu, u-naabuŋu baba pu ní u ŋūǹ kí yāliŋkì.