Yoob 13 - UNIMBƆTI NYƆƆBUNDI GBƆŊKU

M làá mɔ̄tì m-ba pu Unimbɔti nimbiin

¹ Tiŋman, m-nimbigbɔŋu ká tíǹ gbanti kɔkɔ, m-tafal gbìl̄ ní ki gbìl̄ taapu.

² Tin kɔkɔ ni nyée, ma mun nyí-tì, naa jítiǹ-mi!

³ Ama Unimbɔti Mpɔŋkɔdaan ní m là kí sòoǹ nì, úǹ cee ní m làá mɔ̄tì m-ba pu.

⁴ Nimbee, ni cáá inyimɔn ki bìintí ibaamɔn pu, ni-kɔkɔ sá inyimɔn nyɔkɔdambi ní.

⁵ Ni yaa bàà ŋūǹ kí nīn ŋmí! Bi bàà yíì-ni biciŋfitiibi ní.

⁶ Pīlifìmaan tin m cáá kí sòoǹ kí mɔ̄tì m-ba puee, kpòom̄maan ni-tafaliŋ kí pīlifì m-yaliŋkii.

⁷ Ni dàkafī yii Unimbɔti ní ni mɔ́ntáaa? Ni làá dū inyimɔn ní kí mɔ̄tì u-puɔɔɔ?

⁸ Ni là kí lì yii ni bí Unimbɔti jandi pú deeyaa! Ni ŋūǹ kí mɔ̄tì Unimbɔti puɔɔɔ?

⁹ Unimbɔti yaa cɔ́ŋkì-ni, ni làá nyāaa? Àá ni là kí mɔ̄ntì-u kii bi nín mɔ́ntí unil puee ní?

¹⁰ Ni yaa lēē kí taa nīn bí deedee dibalinee, see ú dāá pée wòoǹ-ni.

¹¹ U nín sá ukpaan puee kaa fàantí-naaa? U nín cáá tifaandi puee kaa làá fàtīí lítí ni-puɔɔɔ?

¹² Ni-dàkatam kaa cáá kunyampoou kii ŋfantamee ní, anyɔɔbun ŋin ni cáa mɔ́tí ni-ba puee pɔ̀fì kii kuyɔkɔuee ní.

¹³ Ŋmīĺmaan kí yàntī ḿ sòoǹ, ní tin làá bàń m-puee ń bàń!

¹⁴ M bɔ́ntì ki cí tin kɔkɔ làá bàń m-puee, báà an yaa sá ŋkúm.

¹⁵ Báà Unimbɔti yaa là ú kpɔ̀-mi, maa ti pée cáá dimákal diba dee. Ama m làá mɔ̄tì m-saŋkindi pu u-nimbiin.

¹⁶ M yaa ŋúń ki ŋá mimmee, m làá ká difiil, di sá yii unikpiti ubɔ kaa ŋūǹ kí yūĺ Unimbɔti nimbiin.

¹⁷ Pīlifìmaan tiŋan tin m cáá kí sòoǹee, yàntīmaan tin m làá cántí taapu nee ń kɔ́ ni-tafaliŋin.

¹⁸ M bíi bɔ́ntí kí yíiń ibeeyiin, ní m nyí tiŋan pu yii man ní bi làá pɔ̀.

¹⁹ Ŋma bí ki làá kɔ̄kɔl̀-mi? M-bɔti yaa tí kpíìyaaa, m kíí kí ŋmīĺ kí kpú.

*

²⁰ M-Nimbɔtiu, kàkatī tiwan tili kí wàatī-mi, niinee maa ti làá dū m-ba kí báĺ-si.

²¹ Nyìkitī a-ŋal ŋun nyìkī m-pu nee, gbèen̄ kí taa ti kɔ́ǹ-mi dinyoondi.

²² Míǹ boonee, a yaa yíiń-mi m làá kíí-si, àá m làá sòoǹ ní á kíí-mi.

²³ M ŋá-si ikpiti ki yīntiǹ-si ŋfunyɔm miŋa pu ní? Yàntī ḿ béé m-kpitii nì m-yìntitam.

²⁴ Ba pu ní a fàtī a-boon ki tìì-mi ní? Ba pu ní a ŋáań-mi kii m sá a-nannanliuee ní?

²⁵ Ba ní a fàantí ní? Kufaau kun kubuŋu yòontée? Ba ní a jì ní? Kumɔkuliŋuaaa?

²⁶ A sòon̄ m-bɔti min pɔ̄ɔ̄yee ki ŋmàn̄ ki ŋá kugbɔŋun, a bíi pà-mi m-naacimpɔntin kpitii paati.

²⁷ A bá-mi abaa, ní a-nimbikpeeŋu pée cɔ́ tin kɔkɔ m ŋáańee pu, áli gba a fíkití ki kpèé m-tabɔbiliŋ kɔkɔ!

²⁸ M-wunti bíi sù kii ndɔ nín sù puee, a lì kii akoosibil nín ŋmóò tiwampeeŋkaal puee.