Sophonie 3 - UNIMBƆTI NYƆƆBUNDI GBƆŊKU

Isirayeel yab kaa pílifì isaŋki

¹ Mbusu kɔ́ pɔɔgaati tiŋki, kitiŋ kin kɔ́ tijɔkɔndi ki wɔ́b́ binibee.

² Kàa pílifì ti-Dindaan nyɔkɔ, kaa fōō u-saŋkii, kaa dū ki-mákal ki páaǹ ki-Dindaan pu, kaa sútì ki pìl̄ ki-Nimbɔtiu.

³ Ki-yidambi bí kii gbikintib bin sūǹee ní. Ki-bɔsoonliibi bí kii agbiŋgbil ŋin cá kukpɔŋu kujoou, ama ní kutaa nì ku-wuntilee, ŋaa ti cáá tiba kí ŋmɔ́ee ní.

⁴ Ki-bɔnaatiliibi kaa bí tiban, bi sá binib bin kíiĺ bi-jutiibee. Ki-saraaŋaliibi kɔ́ǹ tin bí circiree tijɔkɔndi, ní kaa fātìi tɔ́ mara.

⁵ Nì míǹ kɔkɔee, ti-Dindaan bí kitiŋin, waa ŋáań tin kaa bí deedeeyee. Kutaafaau kamaayee, u sòoǹ tibɔti, ntaafaabɔmbɔmee, u ŋáań tin ŋān̄ee. Ama nì míǹ kɔkɔee, binikpitib pée gbíntìi tūǹ atuŋkpiti kaa cáá icoo.

⁶ Ti-Dindaan bí yii: «M kúntì atimbun ki wīī ŋi-guŋkpaaŋŋi ki yāntì ŋi-saŋyi kūń ubɔ kaa ti dì. M bíil̀ ŋi-tiŋki, uniseen kaa ti kóò ki-ni.

⁷ M lī m-ban yii: <Kɔŋkɔnnee kitiŋ nee nib làá nīn tɔ́-mi, bi làá fōō m-bɔkpaafikaati. Maa làá ti ŋá kii m nín bí yii m làá ŋá-kì puee, kaa làá ti kúntí-kì.> Ama ní ki-nib yáb́ ki túń atuŋkpiti.

⁸ An puee ti-Dindaan nín lī puee sɔ̀. Ní cīitímaan-mi! Ní cīití ŋwiin ŋun m làá dāan̄ kí kɔ̄kɔl̀-nee. Di sá yii m lēē ki síiǹ yii m làá kóoǹ anibul nì abee kí kpāfì ní kí kpáatí m-ŋuul kí sìtī ŋi-pu. M-ŋuul ŋmiŋuee làá wà kí céetí kitiŋ kɔkɔ.»

Unimbɔti kpántì u-nibul bimbim

⁹ «Tiŋman, m làá ŋá m-nibul nyunculiŋ circir, ní bí ŋmā kí nīn yíì man bi-Dindaan yindi, ní kí kpāfì ubaanti kí nīn tūǹ m-tundi.

¹⁰ Bin jáaḿ-mi ki yàl̄ ki bíń Eetiiyoopii mɔɔgbandee làá dāá cáań-mi saraabi.»

Isirayeel yab bin kíǹee

¹¹ «Ŋwiin gbantee, m-nibul, icoo kaa làá ti cúú-si atuŋkpiti ŋin kɔkɔ a ŋá-mee pu. Di sá yii ŋyunti gbantee, m làá dāá nyāntí ni-kansikin timɔn dambi nì bin yòontí bi-ba yilpuee. Niinee, a làá dāá gbèen̄ kí taa ti yòon̄ a-ba yilpu m-circir jool pu.

¹² M làá dāá kíń binib bin sīntiǹ bi-ba taapuee nì bisoodambi a-ni. Bi làá dāá nyàab̀ ḿ wúń bi-pu.

¹³ Isirayeel yab bin làá dāá kíńee kaa ti làá dāá ŋá ikpiti, kaa ti làá dāá mɔ̄ntì inyimɔn, kaa ti làá dāá kīil̀ bi-jutiibi. Bi làá dāá kpàà bi-waŋkuti nì ŋgbansɔŋfi kí ŋùŋfì ní ubɔ dāa kpá kí fàaǹ-bi.»

Bi làá fàtīí mā Jeerusaleem tiŋki

¹⁴ Siiyɔn tiŋki, nín̄ kūuntí nì dipɔɔpindi, Isirayeel yab, nín̄ fàal̀maan. Jeerusaleem, nín̄ fàal̀ nì a-pɔbil kɔkɔ!

¹⁵ Ti-Dindaan kākatì ditafadaaldi din bàà dàn̄ a-puee ki wāatì-si, u kākatì a-nannanliibi ki wāatì-si. Ti-Dindaan Isirayeel bɔtiu bí a-cee. Aa ti máaǹ kí fàŋkì mbusu ubɔ.

¹⁶ Ŋwiin gbantee, bi làá dāá tùkù Jeerusaleem yii: «Siiyɔn tiŋki, taa fàŋkì, a-wunti ń taa yɔ̀tī.

¹⁷ Di sá yii ti-Dindaan a-Nimbɔtiu bí a-cee, úǹ di sá ubaatandaan un tìì-si dijajilee. A-pu ní u bí dipɔɔpindin, ní u-neendi tìì-si dimaŋfapɔndi, u fàal̀ ní ki bí dipɔɔpindin a-pu,

¹⁸ kii jiŋaal wiiŋŋuee.» Ti-Dindaan bí yii: «Jeerusaleem, m làá dāá kàkatī nnaabu kí wàatī-si, án nín làá ŋá pu icoo ń taa ti cúú-see.

¹⁹ Ŋyunti gbantee, m làá dāá dáaĺ bin kɔkɔ sāaǹ-nee tafal. M làá dāá fīī apibil ŋin dúlifée, kí kóoǹ ŋin wáŋkèe kí kpāfì. M làá dāá tīī-ni tinyool ní ni-yindi ń gbìtī ntimu mun kɔkɔ poon bi nìn kɔ́ǹ-ni icooyee.

²⁰ Ŋyunti gbantee, m làá dāá gíiǹní-ni. Án dāa sá ŋyunti ŋun ní m làá dāá kóoǹ-ni kí kpāfèe. M làá dāá tīī-ni tinyool ní ni-yindi ń dāá gbìtī ilaan kɔkɔ anibul ŋin kɔkɔ bí kitiŋ puee kansikin. Di sá yii ni-nimbilaaliyin ní m làá dāá gíiǹní-ni diŋuŋfilin.» Man ni-Dindaan di lī míǹ.