Psaumes 99 - UNIMBƆTI NYƆƆBUNDI GBƆŊKU

Ti-Dindaan sá ubɔti, úǹ baba di sá Unimbɔtibaamɔn

¹ Ti-Dindaan di sá ubɔti, anibul ń nīn jìkì nì tifaandi! U kā u-beejal din tɔ́kɔ́ keerubimbi puee, kitiŋ ń cìŋkì!

² Ti-Dindaan sá ukpaan Siiyɔn tiŋkin, - ní ki tɔ́kɔ́ anibul kɔkɔ pu.

³ Bí nyɔ̄ŋkì a-yiŋkpaandi din cáá tifaandee! - Dì sá circir yindi ní!

⁴ Kun tìì ubɔti mpɔnee di sá ú nīn néeń ibaamɔn. Sii di yóoǹ marab bin tèen̄ee. Sii di ŋá tin bí deedee nì tin tèen̄ee Isirayeel tiŋkin.

⁵ Ní nyɔ̄ŋkìmaan ti-Dindaan ti-Nimbɔtiu, ní gbàam̄maan u-beejal taapu! - U sá circirdaan ní.

⁶ Mooyiisi nì Aarɔn bin nìn sá u-saraaŋaliibi kansikin bibee, nì Samiyeel un nìn sá bin yíì u-yindee kansikin ubɔee, nìn yíì ti-Dindaan ní u nìn kíikí-bi.

⁷ Unimbɔti nìn sòoǹ nì bi ditagbancancaal poon. Bi nìn ŋúb́ u-bɔkpaaŋi, nì marab bin u nìn tīī-bee.

⁸ Ti-Dindaan Unimbɔti, sii a-ba di nìn kíikí-bi. A nìn sá Unimbɔti un jīǹ bi-pu kimɔtiiyee, ama a nìn dátí bi-tafal bi-yìntitam pu.

⁹ Nyɔ̄ŋkìmaan ti-Dindaan ti-Nimbɔtiu. Gbàam̄maan kí túĺ u-circir jool. - Di sá yii ti-Dindaan ti-Nimbɔtiu sá circirdaan ní.