Psaumes 97 - UNIMBƆTI NYƆƆBUNDI GBƆŊKU

Ti-Dindaan sá ubɔti, kitiŋ pu nib kɔkɔ ń nīn fàal̀

¹ Ti-Dindaan sá ubɔti, kitiŋ pu nib kɔkɔ ń nīn fàal̀, bin kóò ntimu mun kɔkɔ nnyim māntìi túee poonee ń nīn bí mmɔnni!

² Ditagbandi nì dibɔmbɔndi māntìi tú-u. U-beejal tɔ́kɔ́ deedee nì tin tèen̄ee pu ní.

³ Ŋŋmi līī u-nyɔkɔpu, ní ki wù u-nannanliibi bin māntìi tú-uee.

⁴ U yàntī itaaŋmɔŋmɔ ŋmíntí duulinya pu, kitiŋ kāntí-i ní ki jìkì nì tifaandi.

⁵ Ajoon dùntī kii nsikampimuee kitiŋ kɔkɔ Dindaan nimbiin.

⁶ Yilpu sòoǹ u-deedeeu pu, ní anibul kɔkɔ kāntí u-nyooti.

⁷ Icoo ń cúú bin kɔkɔ tòotī awaayee, bin nyɔ́ŋkí awaa ŋin kaa bí tibanee! Inimbɔti kɔkɔ, gbàam̄maan ti-Dindaan nimbiin.

⁸ Siiyɔn yab gbìl̄ ní an mɔ́ɔkiǹ-bi. Ti-Dindaan, a-bɔsooŋyi puee, Juuda timmu bíi fàal̀.

⁹ Di sá yii sii ti-Dindaan, Yilpu fɔ́ŋŋŋ Nimbɔtiu un kpòotī kitiŋ kɔkɔee, sii di tɔ́kɔ́ inimbɔti kɔkɔ pu.

¹⁰ Nimbi bin néeń ti-Dindaanee, nín̄ námaan ikpiti. Ti-Dindaan wúǹ u-deedeedambi maŋfal pu, u fìil̄-bi ki nyāntí binikpitib ŋaan.

¹¹ Ŋwalifi ŋmíntí deedeedambi, ní bin pɔbil bí diba nì Unimbɔtee fàal̀.

¹² Deedeedambi, ti-Dindaan puee, nín̄ fàal̀maan, ní kí nīn nyɔ́ŋkí u-circir yindi.