Psaumes 91 - UNIMBƆTI NYƆƆBUNDI GBƆŊKU

Yilpu fɔ́ŋŋŋ Nimbɔtiu di sá kibalilaŋ

¹ Unil un sáǹ ki kɔ́ Yilpu Fɔ́ŋŋŋ Nimbɔtiuee, Mpɔŋkɔdaan booŋŋu taapu ní udaan ŋùŋfī.

² M tùkù ti-Dindaan yii: «Sii di sá m-balilaŋki nì m-taŋkpanaakooku, ki sá m-Nimbɔtiu un pu ní m mákée!»

³ - Ti-Dindaan di làá fīī-si kí nyāntí ukpan taliŋkun nì bìlbil kúm ŋaan.

⁴ U làá dū u-kuti kí bīiǹ a-pu, ní á sāǹ kí kɔ́ u-feeŋyi taapu. U-baamɔŋyi sá digbampɔɔl nì tijanjawan ní.

⁵ Aa làá fàŋkì dinyoondi din bí kunyeeueeyaaa, kaa làá fàŋkì ipiin in ŋàaǹ ŋwiimpueeyaaa,

⁶ kaa làá fàŋkì bìlbil kúm min yìiǹ dibɔmbɔndineeyaaa, kaa làá fàŋkì kuweeŋkpiiu kun bìlim̄ kuwiŋkaŋu puee mun.

⁷ Báà binib kutuku yaa lítì ki kpíì a-caŋin, ní binib kutukub saalaa yaa lítì a-ŋaŋgiil pú, tiba kpá ki làá ŋá-si.

⁸ Nì a-nimbibulii ní a làá ká Unimbɔti nín làá pà binikpitib tipaal tiŋyee.

⁹ - Tiŋman, sii ti-Dindaan ní m sáǹ ki kɔ́. A yaa yāntì Yilpu Fɔ́ŋŋŋ Nimbɔtiu kpántì a-balilaŋkee,

¹⁰ tikpitil tiba kaa làá bàń-si, nnaabu ŋubɔ kaa làá sútí kí pìlīǹ-si.

¹¹ Di sá yii ti-Dindaan làá tīī u-tuuŋyi mara í nīn cí-si laakin kamaa a làá cùee.

¹² I làá nīn tíkí-si i-ŋaaŋyin, án nín làá ŋá pu a-taal ń taa gbéetí ditaŋkpalee.

¹³ A làá tāā gbikinti nì ukoowaati pu kí còom̀, ki làá yáká digbikintipɔmbil nì ukoobu ditaal.

¹⁴ Ti-Dindaan bí yii: «U nín dū u-ba ki nákáǹ-mee puee, m làá fīī-u. U nín nyí-mee puee, m làá wúń u-pu.

¹⁵ U yaa kúuǹ ki yíiń-mee, m làá kíí-u. Man m-ba làá nīn bí u-cee dinimbinaamandi poon, m làá fīī-u ní kí tīī-u tinyool.

¹⁶ M làá tīī-u mmaŋfafɔkɔn, ní kí dàkà-u yii man di sá u-fiiliu.»