Psaumes 9 - UNIMBƆTI NYƆƆBUNDI GBƆŊKU

M làá nyɔ̄ŋkì m-Dindaan nì m-pɔbil kɔkɔ

¹ Daafiidi di ŋmàn̄ nlan nee ki tīī bilaŋgaaliibi kpiliu.

² M làá nyɔ̄ŋkì sii m-Dindaan nì m-pɔbil kɔkɔ, m làá sòoǹ a-maamaaci tuuŋŋi ŋin a ŋée kɔkɔ pu.

³ Kun ní a ŋée puee, m làá nīn gà ifaal nì dipɔɔpindi laŋyi. Yilpu fɔ́ŋŋŋ Nimbɔtiu, m làá gāā ilan kí nyɔ̄ŋkì-si.

⁴ M-nannanliibi fātì bi-boon, bi gbéetì ki lítì ki kpíì a-nimbiin.

⁵ Di sá yii a sòon̄ m-bɔti ki pɔ̀n̄-mi. A kāl̀ a-beejal pu ki sòon̄ tibɔti nì ibaamɔn.

⁶ A sòon̄ ki kūū atimbun ŋin kaa nyí-see bɔti, ní ki nāaǹ binikpitib. A kúntì-bi múb kí nīn cá jaanjaan.

⁷ Taa ti wāĺ ti-nannanliibi, kun puee baa ti pée bí ní. A nāaǹ bi-timmu ní bi súntì bi-pu kpataaa.

⁸ Ama ti-Dindaan úǹ kā u-beejal pu ní jaanjaan, u bɔ́ntì u-beejal kí sòoǹ duulinya bɔti.

⁹ Úǹ di kpòotī duulinya nì ibaamɔn, ní ki sòoǹ binib bɔti deedee.

¹⁰ Ti-Dindaan sá kibalilaŋ ní ki tīī un bi wɔ́b́ee, ní ki sá kutaŋkpanaakoou dinimbinaamandi yuntiŋu poon.

¹¹ Bin nyí-si mbaamɔminee ń nīn máká a-pu! Di sá yii sii ti-Dindaan kaa fàtī a-boon kí tīī bin nyàab̀-see!

¹² Gāāmaan ilan kí nyɔ̄ŋkì ti-Dindaan un sá ubɔti Siiyɔn tiŋkinee. Sòom̀maan u-tunnyaaŋŋi pu kí tùkù atimbun kɔkɔ nib.

¹³ Unimbɔti dátí binikpɔliibi tafal, ní kaa súntí bin bi kūūyee pu. Waa súntí bifalaadambi biilii pu.

¹⁴ M-Dindaan, sɔ̄ m-saai! Kpèè m-nannanliibi nín bí ki sàantí-mi puee! Fīī-mi kí nyāntí ditaŋkpiilin,

¹⁵ án nín làá ŋá pu ḿ sīĺ Jeerusaleem nib nimbiin kí tùkù-bi tin ní a ŋá ki tīī-mi ní m bí ki nyɔ́ŋkí-see. M làá nīn fàal̀ kun puee a fīī-mi.

¹⁶ Binib bin kaa nyí-see gbìn̄ mbòó ki bíl̀ bi-nannanliibi ní bíǹ bi-ba jéetì ŋu-poon, kutaliŋŋu kun bi píĺee sàl̄ bíǹ bi-ba.

¹⁷ Ti-Dindaan dàkā un ní u sée ki sòon̄ binib bɔti nì ibaamɔn. U dù unikpiti taliŋku ní kí fàtīí gíiǹ kí sàl̄-u.

¹⁸ Bikpitiŋaliibee kɔkɔ nì bin kɔkɔ súntí Unimbɔti pu kaa jáaḿ-uee làá sìntī ditaŋkpiilin.

¹⁹ Ama Unimbɔti kpá kí súntí ufalaadaan pu, unandaan mun mákal kpá kí jēetí nnyimin jaanjaan.

²⁰ Ti-Dindaan, yīkìm̄! Taa yàntī nisaaleen ń pɔ̄ɔkiǹ-si. Cáań binib bin kaa nyí-see a-nimbiin kí sòoǹ bi-bɔti.

²¹ Ti-Dindaan, yàntī dinyoondi ń kɔ́-bi, yàntī bí béé yii bi sá nisaaleen ní ki kúù.