Psaumes 83 - UNIMBƆTI NYƆƆBUNDI GBƆŊKUBinannanliibi māntìi tú Unimbɔti nibul 1 Asaafi di ŋmàn̄ nlan nee. 2 Unimbɔti, taa pée ŋùŋfì báà fiii, taa nín̄ kā ki ŋmí kaa bíi ŋáań tiba. 3 Kpèè a-nannanliibi cáá bi-ba ki yāŋkí an kɔkɔ pu, bin ná-see bíi gántí ayil. 4 Bi bíi bɔ́ntí kí ŋá a-nibul tikpitil, bi kpáfì kinyɔkɔ kí ŋá bin pu aa mɔ̄ee tikpitil. 5 Bi bíi lì yii: «Dāam̄maan tí kúntí bi-timbundi, bí taa ti téetí dalba dalba Isirayeel pu!» 6 Bi sòon̄ ki ŋá kinyɔɔbaantii, bi ŋá mpèé kí já nì si. 7 An sá Eedoom yab nì Isimaayeel yab, Moowaab yab nì Agaar naantiibi, 8 Geebaal yab nì Amɔn yab nì Amaleeki yab, Fiiliistii yab ní kí kūtì bin kóò Tiir tiŋkinee. 9 Ki kpáaǹ Asuur yab kútì bi-pu, kí tūtuǹ Looti yab. 10 Ŋá-bi kii a nín nìn ŋá Madiyan yab puee, kii a nín nìn ŋá Siseela nì Jabiini Kiisɔn buŋŋun puee. 11 A nìn nāaǹ-bi Eeni-Dɔɔr, ní bi wūtì ki tīī kitiŋ ntiŋkpam. 12 Ŋá bi-bɔtibiliŋ kii a nín nìn ŋá Ooreeb nì Seeb puee, ní kí ŋá bi-kpilib kii a nín nìn ŋá Seeba nì Saalmuuna puee. 13 Binib gbanti di nìn lī yii: «Tí fōōmaan Unimbɔti nakpaapɔɔku.» 14 M-Nimbɔtiu, yàntī bí kpántí ntam min kunaakpaabuŋŋu yòontée, àá tifeel tin kubuŋu yòontí ki féeńee. 15 Kii ŋŋmi nín wù kupɔɔu puee, kii aŋmilimbil nín fòol̄ ajoon pu puee, 16 dū a-buŋku kí jà-bi, dū a-buŋkpaaŋku kí fàaǹ-bi. 17 Ti-Dindaan, yàntī icoo ń cúú-bi, án nín làá ŋá pu ní bí nyàab̀-see! 18 Yàntī icoo nì dinyoondi ń nīn táá-bi ki cá talku, bí fá bi-jilimau kí kpú! 19 Yàntī bí béé yii sii ní bi yíì ti-Dindaan, sii un baba sá Yilpu Fɔ́ŋŋŋ Nimbɔtiu kitiŋ kɔkɔ puee! |
BIBLE EN N'TCHAM (Bassar) © Alliance Biblique du Togo, 2013.
Bible Society of Togo