Psaumes 82 - UNIMBƆTI NYƆƆBUNDI GBƆŊKU

Unimbɔti sòoǹ binib bɔti nì ibaamɔn

¹ Asaafi di ŋmàn̄ nlan nee. Unimbɔti yáatìi yúl̀ yilpu kpafilin, inimbɔti kansikin, ki sòon̄ binib bɔti yii:

² «Kí cáá sāā ŋyunti ŋulɔŋu ní ni làá nīn pɔ̀ gandi, kí nīn tìì dibɔkpil dambi ibaamɔn ní?

³ Sòom̀maan uwɔfi nì ditaŋkpiibil bɔti deedee, kí sòoǹ unandaan nì ufalaadaan bɔti nì ibaamɔn.

⁴ Fīīmaan uwɔfi nì usoodaan, fīīmaan-bi kí nyāntí binikpitib ŋaan.

⁵ «Baa nyí kaa gbìl̀ tibɔti taapu mun. Bi còom̄ dibɔmbɔndin ní. An di yì-tì ní kitiŋ nyeel cīŋkì.

⁶ Man nìn lī yii ni sá inimbɔti ní, yii ni-kɔkɔ sá Yilpu Fɔ́ŋŋŋ Nimbɔtiu jipɔmbi ní.

⁷ Ama ni làá kpú kii binifantantiibee ní, ni làá kúntí kii abɔtibilee ní.»

⁸ Yīkìm̄, Unimbɔti! Sòoǹ duulinya bɔti, di sá yii sii di yì atimbun kɔkɔ.