Psaumes 81 - UNIMBƆTI NYƆƆBUNDI GBƆŊKU

M-nibul kaa pílifì m-nyɔkɔ

¹ Asaafi di ŋmàn̄ nlan nee ki tīī bilaŋgaaliibi kpiliu. Bi gà-ŋu nì Gaati yab beeku ní.

² Fáámaan iwiliili kí tīī Unimbɔti un sá ti-pɔŋŋuee, kúum̀maan nì dipɔɔpindi kí nyɔ̄ŋkì Jaakɔb Nimbɔtiu.

³ Tóoḿmaan nlan, bɔ̀ɔ̀maan ŋgaŋgamu, bɔ̀ɔ̀maan kubeeu nì saŋgu án nīn mɔ̄.

⁴ Búḿmaan ŋyin uŋmapɔɔn jiŋaaliu wiiŋŋu, nì uŋmal yaa jɔ́m̀ee jiŋaaliu wiiŋŋu.

⁵ Di sá yii dibɔkpaal ní an sá ki tīī Isirayeel yab, Jaakɔb Nimbɔtiu nín yóoǹ bí nīn ŋáań puee dee.

⁶ U yóoǹ Jooseefi naantiibi mara, ŋyunti ŋun u nyáń kí já nì Eejipiti tiŋkee. - M gbìl̄ nneen ŋun maa nyée sòon̄ nì mi yii:

⁷ M túutì-si ditúndi din a túee, m fōō-si diwaŋgul din nyìm̀ ki kā a-ŋaanee.

⁸ Ŋyunti ŋun a nìn bí dinimbinaamandinee, a nìn kúuǹ ki yíiń-mi ní m fīī-si. Ditaadundi poon ní m nìn kíí-si. M nìn cɔ́ŋkì-si Meeriiba nyim caŋin.

⁹ M-nibul, pīlifiǹ-mi, m làá kpāafì-si. Isirayeel, a yaa bàà làá pīlifiǹ-mi!

¹⁰ Aa máaǹ kí nīn cáá unimbɔticaan ubɔ a-cee! Á máaǹ kí gbàan̄ unimbɔticaan ubɔ taapu kí jāam̀-u!

¹¹ Di sá yii man di sá a-Dindaan a-Nimbɔtiu un di nyántìń-si Eejipiti tiŋkinee. Wàan̄ a-nyɔkɔ bàaa ní ḿ gbéeǹ-kì.

¹² Ama m-nibul kaa nìn pílifì m-nyɔkɔ, Isirayeel kaa nìn là m-bɔti.

¹³ Niinee ní m dū-bi ki líiǹ bi-pɔɔgbifiŋŋu bí nīn ŋáań bi nín là puee.

¹⁴ M-nibul yaa bàà nìn pílifíǹ-mi, Isirayeel yab yaa bàà nìn nóó m-saŋŋu,

¹⁵ án kaa bàà làá sūŋkì ní ḿ sìntī bi-nannanliibi taapu, ní kí bàà já nì bi-pulincɔntiibi.

¹⁶ Man ni-Dindaan nannanliibi bàà làá gbàan̄ m-nimbiin kí nīn kíǹ ki tɔ́-mi, ní an nīn kíǹ ki bí-bi míǹ ki cá jaanjaan.

¹⁷ M làá dū tijimmɔntiil kí kpíiǹ Isirayeel yab, ní kí tīī-bi ditaŋkpalin siiti bí ŋmɔ́ kí díkí.