Psaumes 80 - UNIMBƆTI NYƆƆBUNDI GBƆŊKU

Sii un kpàá Isirayeel yabee, pīlifì!

¹ Asaafi di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ kubeeu ní ki gà-ŋu.

² Sii un kpàá Isirayeel yabee, pīlifì. Sii un kpòotī Jooseefi naantiibi kii kupicaŋkpuŋuee, sii un bí keerubimbi kansikinee, lēē a-ba kí dàkà.

³ Eefiraayiim nì Beenjameen nì Manasee naakɔti nimbiinee, nyàatī a-pɔŋŋu kí dāan̄ kí fīī-ti.

⁴ Unimbɔti, fàtīí gíiǹní-ti, bútí ti-pu nnimbiin ní tí ká difiil.

⁵ Ti-Dindaan, Unimbɔti Mpɔŋkɔdaan, kí cáá sāā ŋyunti ŋulɔŋu ní a-nibul wimmeem làá nīn kɔ̄ntí-si diŋuul ní?

⁶ Nnyinnyim di kpántì bi-jinti, a ŋmāntì nnyinnyim tikpil ki tīī-bi bi nyùn̄.

⁷ A yāntì ti-puee, bin māntìi tú-tee bíi jáà, ní ti-nannanliibi bí ki lāā-ti.

⁸ Unimbɔti Mpɔŋkɔdaan, fàtīí gíiǹní-ti, bútí ti-pu nnimbiin ní tí ká difiil.

⁹ A cóotìń fiinyi subu Eejipiti tiŋkin, ní ki jìn̄ atimbun ki dū-bu ki cóoǹ.

¹⁰ A ŋātì ki tāntì kitiŋ ki tīī-bu, ní bu báaǹ inyaan ki kpátì ki gbí kitiŋ nee kɔkɔ.

¹¹ Bu-booŋŋu bīī ajoon pu, ní bu-paŋŋi bīī seedir sukpaŋkpaaŋyi pu.

¹² Bu tɔ́ bu-paŋŋi ki tin bàn̄ Meediiteeranee tiŋkuu, ní bu-pambiyaamu tin bàn̄ Eefiraati mɔɔl.

¹³ Ba pu ní a yāntì digundi din māntìi tú-buee bátì bátì ki lítì, ní bisanjitiliibi kɔkɔ kìtī bu-biliŋ?

¹⁴ Kubambaŋŋun gbeetiu ŋàfī-bu, ní ipeel ŋmóò-bu.

¹⁵ Unimbɔti Mpɔŋkɔdaan, fàtīí gítiń! Gbóoń doooo yilpu kí kpèè tin bíi jītée. Dāá fīī bufiinyisubu gbanti,

¹⁶ busubu bun ní sii a-ba cóoǹee, - a-jipɔɔn un ní a tīī mpɔnee.

¹⁷ Bi sēē-bu ŋŋmi ki gāā-bu ki lúkú. Tāā kí bīikì ní bí kpú kí céetí.

¹⁸ Dū a-ŋal kí páań unil un bí a-ŋaŋgiil púee pu, kinibiki kin ní a tīī mpɔnee pu.

¹⁹ Niinee taa ti làá sútí kí wàatī-si. Yàntī tí nīn bí dimaŋfalin ní kí nīn nyɔ́ŋkí-si.

²⁰ Ti-Dindaan, Unimbɔti Mpɔŋkɔdaan, fàtīí gíiǹní-ti. Bútí ti-pu nnimbiin ní tí ká difiil.