Psaumes 77 - UNIMBƆTI NYƆƆBUNDI GBƆŊKU

Agìń poonee, m téetí a-tuŋkpaaŋŋi pu

¹ Asaafi di ŋmàn̄ nlan nee ki tīī bilaŋgaaliibi kpiliu Yeedutun.

² Unimbɔti ní m kūuntí mpɔn ki yíì, Unimbɔti ní m yíì ní u làá pīlifiǹ-mi.

³ M yaa bí dinimbinaamandi poonee, ti-Dindaan ní m nyàab̀. Kunyeeuee, m yòontí m-ŋalii ki túl̀ u-watil pú kaa gì, ní kaa kíikí bí ŋméeǹ-mi.

⁴ M yaa téetì Unimbɔti puee ní m yáliŋkí, m yaa bíi dàkafēe ní m-fam tìfī.

⁵ Ti-Dindaan, aa kíikí ḿ ŋúb́ ní kaa nín gèen̄, inaatuu kɔ́-mi ní maa ti nyí tin m làá sòoǹee.

⁶ M dàkafī iyunti in jítèe pu, abin ŋin jítì boon boonee pu.

⁷ M téetí m-laŋŋu pu kunyeeu, m dàkafī m-pɔbilin ní ki bàlifī m-ba yii:

⁸ «Ti-Dindaan làá dū-ti kí fá talku níii? Waa ti làá pée dàkà-ti u-laŋŋaŋfitiikuɔɔɔ?

⁹ U-neeŋkpaandi din u cááyee wáŋkì jaanjaan níii? Waa ti làá sòoǹ kí nīn cá jaanjaan níii?

¹⁰ Unimbɔti kalin súntì kí sɔ̄ ti-saai níii? Diŋuul kalin fōō u-poommɔŋŋu paaŋŋu níii?»

¹¹ Ní m bí ki lì yii: «Tin wù-mee di sá yii Yilpu fɔ́ŋŋŋ Nimbɔtiu kaa ti tútúǹ-ti nì u-ŋaŋgiil.»

¹² Ti-Dindaan, m téetí a-tuuŋŋi pu. Tiŋman, m téetí a-maamaaci tuuŋŋi ŋin a nìn ŋáaǹee pu.

¹³ M dàkafī tin ní a ŋée kɔkɔ pu, m dàkafī a-tuŋkpaaŋŋi pu.

¹⁴ Unimbɔti, a-tuuŋŋi bí circir ní, unimbɔti ulɔu di sá ukpaan kii sii Unimbɔti?

¹⁵ A sá Unimbɔti un ŋáań maamaacibee ní, a dàkā anibul ŋin kíǹee a-pɔŋŋu.

¹⁶ A dū a-ŋal pɔŋŋu ki dá a-nibul ki líì, Jaakɔb nì Jooseefi naantiibi.

¹⁷ Unimbɔti, inyiŋfi wál̀-si, inyiŋfi wál̀-si ní ki fāŋkì, ní tiŋku taapu taapu mun cīŋkì.

¹⁸ Atagban yāntì ŋi-nyim còol̄, kutagbɔŋu yāntì bi gbìl̄ ku-neen pu, ní a-piiŋyi ŋàan̄ an kɔkɔ pu.

¹⁹ A-taadundi nìn gà kuwoou ki màntī, utaa nìn ŋmóò ki ŋmíntí duulinya, ní kitiŋ fāŋkì ki cīŋkì.

²⁰ Tiŋkun ní a cátì a-saŋŋu, ní ki cōom̀ ki jítì nnyim min nyóòyee poon, ní ubɔ kaa ká a-tabɔbiliŋ.

²¹ A nìn dī Mooyiisi nì Aarɔn pu ki kpōotì a-nibul kupicaŋkpuŋuee.