Psaumes 6 - UNIMBƆTI NYƆƆBUNDI GBƆŊKU

Ti-Dindaan, taa sòoǹ kí kpɔ̀ m-bɔti

¹ Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu ki bɔ̀ɔ́ tibati tin cáá iŋmii iniiyee ní.

² Ti-Dindaan, a gíí m-pu diŋuul, ama á taa sòoǹ kí kpɔ̀ m-bɔti, a fōō m-pu mbum, ama á taa dáaĺ m-tafal.

³ M-Dindaan, sɔ̄ m-saai, di sá yii maa ti cáá mpɔn. Cáaǹ-mi m-Dindaan, di sá yii m yɔ̀l̄.

⁴ M-wunti kɔkɔ bíi jìkì. Mimmee m-Dindaan, kí cáá sāā ŋyunti ŋulɔŋu ní?

⁵ Gítiń kí fīī-mi kí líí, m-Dindaan. A-neeŋkpaandi puee, fīī-mi.

⁶ Di sá yii ditaŋkpiilinee, ubɔ kaa ti téetí sii Unimbɔti pu. Ŋma di ŋūǹ kí nyɔ̄ŋkì-si niin? Báà ubɔ!

⁷ M yáliŋkì ki tin kpáàa gīī. M-siim yàntī kunyeeu kamaa m-dooŋu sù, m-nyinnyim sɔ̀ŋkī m-yikuŋkul.

⁸ Maa ti wāĺ tiŋan, m-nannanliibi nín yāntì m súń puee ŋmɔ́ ki bíil̀ m-nimbiliŋ.

⁹ Sútímaan kí wàatī-mi, nimbi bikpitiŋaliibee kɔkɔ, di sá yii ti-Dindaan gbìl̀ m-siim.

¹⁰ Ti-Dindaan pílifì m-gbaamii, ti-Dindaan fōō m-wimmeem.

¹¹ Icoo làá cúú m-nannanliibi kɔkɔ ní tifaandi ń gbí bi-pɔbiliŋ. Kii dinimbil nín kábití puee, míǹ ní bi làá sāǹ kí wàatī-mi nì icoo!