Psaumes 51 - UNIMBƆTI NYƆƆBUNDI GBƆŊKU

M-Nimbɔtiu, dū m-kpitii kí pɔ̄-mi

¹ Daafiidi di ŋmàn̄ nlan nee ki tīī bilaŋgaaliibi kpiliu.

² Daafiidi dōoǹ nì Urii nimpuu Batiseeba ní Unimbɔti bɔnaatiliu Naatan cūtì u-cee ki sòon̄ nì u. Ŋyunti gbanti ní u gāā nlan nee.

³ Unimbɔti, a-neeŋkpaandi puee, á sɔ̄ m-saai. Sii un poon mɔ̄ tikpilee, pítí m-yìntitam.

⁴ Fíntí-mi kí nyāntí m-kpitiin ḿ nyā dándan, ní kí pítí m-yìntitam kí ŋá-mi circir.

⁵ Di sá yii m nyí m nín yīntiǹ-see, m-kpitii dɔ̄ m-nimbiin ní baabadal.

⁶ Sii baba nì a-baba ní m yīntiǹ, di sá yii m ŋá tin kaa ŋān̄ a-ceeyee. Míǹ puee báà a yaa sòon̄ m-bɔtaaa, a cáá nsan, a yaa sòon̄ ki kūū m-bɔtaaa, a cáá mbaamɔn.

⁷ Tiŋman, ikpitin ní bi màl̄-mi, m-na nín cáá m-poolee, m sá unikpiti ní.

⁸ Tiŋman, min kamaa a dū ibaamɔn ki bál̀ dibɔmbɔndinee, tibɔbalkaal gbanti poon ní a dàkà-mi iciin.

⁹ Dū kifaapibiki kin bi yíì isɔpee kí yàaǹ m-kpitii pu ḿ nīn bí circir, fàl̀-mi, ní ḿ nīn kíǹ ki pīiǹ káŋkaŋ.

¹⁰ Yàntī ḿ gbìl̄ mmɔn nì dipɔɔpindi m-ni, ní akpab ŋin a nàn̄ dúsi dusee ń yīkì kí nīn ŋōō.

¹¹ Fàtī a-boon kí tīī m-kpitii, pítí m-yìntitam kɔkɔ.

¹² Unimbɔti, náań dipɔbil din bí circiree kí tīī-mi, dū ŋfam min pɔ̀ɔǹee kí ŋá m-ni.

¹³ Taa dū-mi kí fá, kí taa fàtīí fōō a-circir Fam m-cee.

¹⁴ Fàtīí tīī-mi mmɔn ŋun bí a-fiil poonee, ní nlammɔntiim fam ń nīn tíkí-mi.

¹⁵ M làá dàkà bikpitiŋaliibi a-saŋŋu, ní ikpitidambi ń fàtīí gítiń a-cee.

¹⁶ M-Nimbɔtiu, Unimbɔti m-fiiliu, fīī-mi nnikpaakoon bɔkpilin ní ḿ gāā ilan mpɔn kí sòoǹ a-deedeeu pu.

¹⁷ Ti-Dindaan, tábití m-nyunculiŋ ní ḿ dū m-nyɔkɔ kí gāā ilan kí nyɔ̄ŋkì-si.

¹⁸ Di sá yii a yaa là saraabi, m bàà ŋáań kí tīī-si. Bisaraawɔkaabi gba kaa fáatiǹ-si.

¹⁹ Saraa un di fáatiǹ Unimbɔtee di sá dipɔbil din sīntiǹ di-ba taapuee. Unimbɔti, aa fàtī a-boon kí tīī dipɔbil din sīntiǹ di-ba kɔkɔee.

²⁰ Án nīn mɔ̄ǹ-si á ŋá Siiyɔn tiŋki tiŋan, fàtīí mā digundi kí tū Jeerusaleem.

²¹ Niinee a làá fōō deedee saraabi, nì bisaraawɔkaabi kɔkɔ. Ŋyunti gbantee ti làá dū inajaa kí ŋá saraa nsaraafan pu.