Psaumes 5 - UNIMBƆTI NYƆƆBUNDI GBƆŊKU

Ti-Dindaan, wúń m-pu

¹ Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu ki búǹ awul ní.

² M-Dindaan, pīlifì tin m bíi sòoǹ nì see, kpèè m-yaliŋkii.

³ M-Nimbɔtiu un sá m-bɔtiuee, m yaa kūuntí ki yíì-see, á pīlifiǹ-mi. M-Dindaan, sii ní m mèé.

⁴ Ti-Dindaan, kutaafaauee, a gbìl̀ m-neen pu. M kítí m-ba á ŋmā kí fōō-mi, ní m kíǹ ki kā ki cí.

⁵ Di sá yii a sá Unimbɔti un ná ikpitee ní, ukpitiŋal kaa kóò a-pu.

⁶ Bilambidambi kaa ŋūǹ kí sútí kí pìl̄-si, a ná bin kɔkɔ ŋáań digaŋgam tuuŋŋee ní.

⁷ Ti-Dindaan, a nàantí binyimɔndambi, ní kaa gèetíǹ binikpɔliibi nì biŋmatinliibi.

⁸ Ama a-neendi din a cáá m-puee wīikí tikpil, an pu ní m ŋūǹ kí kɔ́ a-diikun. M ŋūǹ kí gbàan̄ nì dibasintil poon a-circir kɔŋkooŋŋu nyɔkɔpu kí jāam̀-si.

⁹ Ti-Dindaan, a-deedeeu puee, nín̄ kpòotī-mi, kun puee m cáá binannanliibi tikpil. Tàntī a-saŋŋu kí bíĺ m-nimbiin.

¹⁰ Ibaamɔn kaa nyēē m-nannanliibi nyɔmmun báà fiii, tin pée kā bi-pɔbiliŋ poon bi dàkafēe di sá bí bīil̀ bi-jutiibi. Tibɔti tin bí bi-neenee cáǹ binib dikaakulin, ní bi-nyunculiŋ nín tábití ki sòoǹ tiŋyee sá diŋmatindi.

¹¹ Unimbɔti, sòoǹ kí kpɔ̀ bi-bɔti kí dáaĺ bi-tafal! Yàntī bíǹ bi-ba nín bɔ́ntì puee ń nàan̄-bi! Jà-bi kí nyāntí a-nimbiin bi-kpitii pu, kun puee bi jáà nì si.

¹² Ama bin kɔkɔ sáǹ ki kɔ́-see làá nīn fàal̀, bi làá nīn pée gà ilan nì dipɔɔpindi ní. A làá nīn cí bin néeń-see ní bí nīn bí mmɔnni a-pu.

¹³ Di sá yii sii ti-Dindaan di bìintí deedeedambi pu, ní u-ŋanti māntìi tú-bi kii digbampɔɔlee.