Psaumes 2 - UNIMBƆTI NYƆƆBUNDI GBƆŊKU

Ubɔti un Unimbɔti lēēyee pɔŋŋu

¹ Ba ŋá ní atimbun kpilib bíi bɔ́ntí kí já nì Unimbɔti nì ubɔti un u lēēyee míǹ? Bi nín bíi bɔ́ntí puee sá fám ní.

² Kitiŋ pu bɔtiibi bíi bōob̀ dikɔ̀ndi, biyidambi bíi sòoǹ kí kpāfì kinyɔkɔ kí já nì Unimbɔti nì ubɔti un u lēēyee.

³ Bi bí ki lì yii: «Yàntīmaan tí tìfī ikusaka in bi dūu bóob́-tee, kí lēē bi-baaŋi kí fá!»

⁴ Ama ti-Dindaan un kā yilpu u-beejal puee bí ki lāā-bi, ti-Dindaan bí ki bèel̄-bi.

⁵ Niinee ní u sòon̄ nì bi u-ŋuul poon, ní ki fōō bi-pu mbum ní bi-wunti bíi jìkì.

⁶ Unimbɔti lī yii: «Siiyɔn m-circir jool pu ní m kāaǹ ubɔti un m lēēyee.»

⁷ M làá lì tin ti-Dindaan sòon̄ee, u tùkū-mi yii: «Sii ubɔti, a sá m-jipɔɔn ní. Díǹ nee man di màl̄-si.

⁸ A yaa bālifì-mi, m làá dū atimbun ŋin kɔkɔ bí kitiŋ puee kí tīī-si á nīn kíǹ ki yì, ní kitiŋ kɔkɔwoooo ń kpántí a-yaka.

⁹ Mpɔn ŋun a làá nīn cáa kpòotī-bee dāa pɔ̄ɔ̄ kii tikútee ní, ní á dāá nà-bi dúsi dusi kii diboolee.»

¹⁰ Kɔŋkɔnnee bibɔtiibi, nín̄ sámaan binib bin cáá iciinee! Kitiŋ pu kpootiliibi, ní yàntīmaan bí sāŋkì-ni.

¹¹ Ní jāam̀maan ti-Dindaan nì kufaaŋŋu poon, nín̄ fàal̀maan nì dijinjikil.

¹² Ní gbàam̄maan u-nimbiin, an yaa kaa sá míǹ u làá gíí diŋuul, ní kí nàan̄-ni dicilpu niin! Ama bin kɔkɔ sáǹ ki kɔ́-uee bí mmɔnneeee!