Psaumes 16 - UNIMBƆTI NYƆƆBUNDI GBƆŊKU

Fookii nì dimákal

¹ Daafiidi di ŋmàn̄ nlan nee. Wúń m-pu Unimbɔti, di sá yii sii ní m sáǹ ki kɔ́.

² M bíi tùkù m-Dindaan yii: «Sii di sá man Dindaan.» Tiwammɔntiil tin kɔkɔ m cááyee nyánní a-cee ní.

³ Deedeedambi bin bí Isirayeel tiŋkinee, bíǹ di sá bikpaambi tiŋman, ní bi-bɔti mɔ̄ǹ-mi tikpil.

⁴ Ama bin bìǹ ki nyàab̀ awaa jòońdee, bi nyàab̀ agìń ní ki kútí bi-ba pu. Man kaa làá dū fatiku kí fá awaa gbanti, m kpá kí pútí ŋi-yiŋŋi gba.

⁵ Ti-Dindaan, sii di sá m-fakal, sii di tìì-mi tin kɔkɔ lóò-mee, m-foolbooŋwu kā a-ŋaan ní.

⁶ A nín ŋmāntì pu ki tīī-mee fáatì-mi, tiŋman dijandi din a tīī-mee ŋān̄ tikpil.

⁷ M nyɔ́ŋkí ti-Dindaan un di sáŋkí-mee, kunyeeuee, m-landɔkɔjaatiŋu kpáafí-mi.

⁸ M-nimbikpeeŋu pée cɔ́ ti-Dindaan pu ní, kun puee u bí m-ŋaŋgiiliŋu pú ní tiba kaa ŋūǹ kí cìŋkì-mi.

⁹ An pu ní m-pɔbil pīiǹ ní m fàal̀, m bí ŋgbansɔŋfin.

¹⁰ Di sá yii aa làá dū-mi kí fá ŋkúm ń yòon̄-maaa, kaa làá tí yàntī man, a-deedee tɔntɔnliu ń kɔ́ ditaŋkpiilin.

¹¹ Sii di dàkà-mi dimaŋfal sàmbiki, m yaa bí a-nimbiinee, m-pɔbil sɔ̀m̀ ní. A yaa bí ki kɔ́ĺ-mee, m cáá mmɔn ŋun kaa kúntée ní.