Psaumes 148 - UNIMBƆTI NYƆƆBUNDI GBƆŊKU

Nyɔ̄ŋkìmaan ti-Dindaan yilpu nì taapu

¹ Aleeluya, nyɔ̄ŋkìmaan ti-Dindaan! Nyɔ̄ŋkìmaan ti-Dindaan doooo yilpu, nyɔ̄ŋkìmaan-u yilpu yilpu.

² Nimbi u-tuuŋyi kɔkɔ, nyɔ̄ŋkìmaan-u, nimbi u-janjakitil kɔkɔ, nyɔ̄ŋkìmaan-u.

³ Ŋwìiń nì uŋmal, nyɔ̄ŋkìmaan-u, nimbi iŋmalbijaa in jìl̀ee, nyɔ̄ŋkìmaan-u.

⁴ Nimbi yilpu yilpu fɔ́ŋŋŋ, nyɔ̄ŋkìmaan-u, nimbi inyiŋfi in bí yilpu yilpuee, nyɔ̄ŋkìmaan-u.

⁵ Bi-kɔkɔ ń nyɔ̄ŋkì ti-Dindaan yindi, di sá yii u nìn tīī mara ní tiwan gbanti kɔkɔ náań.

⁶ U dū-tì ki kāaǹ ti-paaŋyi kí nīn cáa cá jaanjaan, u síiǹ-tì mara un kaa bí kí kpántée.

⁷ Nyɔ̄ŋkìmaan ti-Dindaan, doooo taapu, tiŋkub nì tiŋku poon peebilinti,

⁸ nì ŋŋmi nì ditaanyiŋkumbil nì dipɔ̀ńdi nì kubuŋu nì kubuŋkpaaŋŋu kun bí u-nyɔɔbundi taapuee.

⁹ Nyɔ̄ŋkìmaan-u, ajoon nì ŋgbantamu, nì isufi in lòoǹ abilee nì seedir dɔi kɔkɔ,

¹⁰ nì ipeel nì tiwaŋkuti kɔkɔ, nì inoon nì tin fù ti-pool puee.

¹¹ Nyɔ̄ŋkìmaan-u, kitiŋ pu bɔtiibi, nì anibul kɔkɔ, nì abɔtibil nì kitiŋ pu kpootiliibi kɔkɔ,

¹² nì binaacimpɔmbi nì bisapɔmbi mun, nì bitikpilib nì mbiyaamu.

¹³ Bí nyɔ̄ŋkì ti-Dindaan yindi, di sá yii úǹ baba yindi di sá diyiŋkpaandi, u-nyooti tɔ́kɔ́ kitiŋ nì yilpu pu.

¹⁴ U yāntì u-nibul yil kíǹ ki gáań. An sá dinyandi ní ki tīī bin kɔkɔ néeń-uee, Isirayeel yab, dinibul din pìlīǹ-uee. Aleeluya, nyɔ̄ŋkìmaan ti-Dindaan!