Psaumes 146 - UNIMBƆTI NYƆƆBUNDI GBƆŊKU

Ti-Dindaan di wúǹ biwɔfib pu

¹ Aleeluya, nyɔ̄ŋkìmaan ti-Dindaan! M làá nyɔ̄ŋkì ti-Dindaan nì m-naŋki kɔkɔ!

² M làá nīn nyɔ́ŋkí ti-Dindaan m-maŋfal wiiŋyi kɔkɔ poon, ŋyunti ŋun ní m bí dimaŋfalinee, m làá nīn nyɔ́ŋkí m-Nimbɔtiu ní.

³ Ní taa nín̄ máká abɔtibil, àá unil un kaa cáá mpɔn kí fīīyee pu.

⁴ Bi yaa kpíì ki fātìi gítì ntaminee, tin bi nìn bɔ́ntì kí ŋée mun kúntì dee.

⁵ Un jòońliu sá Jaakɔb Nimbɔtiu ní udaan máká ti-Dindaan u-Nimbɔtiu puee bí mmɔnneeee!

⁶ Ti-Dindaan di náań yilpu nì taapu, nì tiŋku nì tin kɔkɔ bí u-poonee. Úǹ di ŋúb́ ibaamɔn kí nīn cá jaanjaan.

⁷ U sòoǹ ki ŋáŋkí bin bi sàantée bɔti, u tìì bin ŋkùm cááyee tijin. Ti-Dindaan tìì bisarkadambi dibatɔl,

⁸ ti-Dindaan ŋúbití bijɔfub nimbiliŋ, ti-Dindaan yáatí bin bōōyee, ti-Dindaan néeń deedeedambi.

⁹ Ti-Dindaan wúǹ binikɔkaabi pu, u tīkintí ditaŋkpiibil nì ukpiipu, ama u yàntī binikpitib nín bɔ́ntì tiŋyee ŋáań fám.

¹⁰ Ti-Dindaan sá ubɔti ní kí nīn cá jaanjaan. Siiyɔn, u sá a-Nimbɔtiu ní kí nīn cá abin abin. Aleeluya, nyɔ̄ŋkìmaan ti-Dindaan!