Psaumes 12 - UNIMBƆTI NYƆƆBUNDI GBƆŊKU

Unimbɔti, tūtuǹ a-nibul

¹ Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu ki bɔ̀ɔ́ tibati tin cáá iŋmii iniiyee ní.

² Ti-Dindaan, jòoń-ti! Di sá yii deedeedambi kaa ti bí, baa ti ŋūǹ ki ká bin pu bi ŋūǹ kí nīn mákée.

³ Bi bí ki mɔ́ntí tɔb, bi cáá biibii nì nyɔɔmálmal ki ŋmàtíǹ tɔb.

⁴ Ti-Dindaan ń pìin̄ nnyɔmu mun sòoǹ biibiiyee nì alimbil ŋin sòoǹ tilambibɔti

⁵ ki lì yii: «Nì ti-limbiliŋ nee, kun ti yaa lèe, see tí ká, ti nín cáá nnyɔmu nee, ubɔ kaa ti ŋūǹ kí tùkù-ti kun ti máaǹ kí ŋée.»

⁶ Ama ní ti-Dindaan bí yii: «Bi bí ki sàantí unandaan, ní ufalaadaan tíminsí. An puee m làá dāan̄ kí fīī bin baa dū ki yíiń binibee.»

⁷ Ti-Dindaan pooŋyi sá in pu ti ŋūǹ kí nīn mákée ní, di sá yii i sá ibaamɔn kii tikúti tin bi tɔ́ kipaayin ŋfunyɔm miluli tì nyáń kaa ti cáá tijɔkɔndee ní.

⁸ Ti-Dindaan, ŋúb́ unandaan, ní kí cīití-ti binikpitib nee cee.

⁹ Di sá binikpitib bí an kɔkɔ pu, ikpiti ní binib kíǹ ki cáa ŋmìtī kii ŋkpamee.