Psaumes 118 - UNIMBƆTI NYƆƆBUNDI GBƆŊKU

M làá nīn bí dimaŋfalin kí māafì tin ti-Dindaan ŋée

¹ Nyɔ̄ŋkìmaan ti-Dindaan, di sá yii u ŋān̄, ní u-neeŋkpaandi bí kí nīn cá jaanjaan.

² Isirayeel yab ń lì yii: «U-neeŋkpaandi bí kí nīn cá jaanjaan!»

³ Aarɔn naantiibi ń lì yii: «U-neeŋkpaandi bí kí nīn cá jaanjaan!»

⁴ Bin bin fàŋkí ti-Dindaanee ń lì yii: «U-neeŋkpaandi bí kí nīn cá jaanjaan!»

⁵ M-nimbinaamandi poonee, m kúuǹ ki yíiń ti-Dindaan, ti-Dindaan kíí-mi ní ki yāntì m tɔ́ m-ba.

⁶ Ti-Dindaan bí m-cee, an puee maa fàŋkí tiba, ba ní unil làá ŋmā kí ŋá-mi?

⁷ Ti-Dindaan bí m-cee ní ki tútúǹ-mi, m-nimbil làá ká bin ná-mee lítitam.

⁸ An ŋān̄ á sāǹ kí kɔ́ ti-Dindaan ki jítiǹ á nīn máká unil pu!

⁹ An ŋān̄ á sāǹ kí kɔ́ ti-Dindaan ki jítiǹ á nīn máká kitiŋ pu nikpaambi pu!

¹⁰ Atimbun kɔkɔ nib nìn māntìi tú-mi, ama ti-Dindaan yindi puee, m nāaǹ-bi.

¹¹ Ŋi nìn māntìi tú-mi an kɔkɔ pu, ama ti-Dindaan yindi puee, m nāaǹ-bi.

¹² Ŋi nìn māntìi tú-mi kii inaŋgbansiiyee. Bi kpíì malaa kii ikuŋkum ŋmiŋuee, ti-Dindaan yindi puee, m nāaǹ-bi.

¹³ Bi téé-mi mpɔn ḿ bàà lítí, ama ní ti-Dindaan jòoń-mi.

¹⁴ Ti-Dindaan di sá m-pɔŋŋu nì m-nyɔŋkii laŋŋu, úǹ di fīī-mi.

¹⁵ Ifaal nì dijajil laŋŋu nyēeń deedeedambi tantib poon yii: «Ti-Dindaan ŋaŋgiil tūǹ atuŋkpaan!

¹⁶ Ti-Dindaan yōoǹ u-ŋaŋgiil yilpu, ti-Dindaan ŋaŋgiil tūǹ atuŋkpaan.»

¹⁷ Maa làá kpú, m làá nīn bí dimaŋfalin kí māafì tin ti-Dindaan ŋée.

¹⁸ Tiŋman ti-Dindaan dáaĺ m-tafal, ama waa dū-mi ki ŋá ŋkúm ŋaan.

¹⁹ Pìitīmaan-mi deedee punyɔmmu, ḿ dī kí kɔ́ kí nyɔ̄ŋkì ti-Dindaan.

²⁰ Ti-Dindaan punyɔkɔki sèé: deedeedambi ń dī kí kɔ́!

²¹ M làá nyɔ̄ŋkì-si, di sá yii a kíí-mi, ní ki fīī-mi.

²² Ditaŋkpal din bidimaliibi nìn dūu fée di kpántì ditaŋkpal din ŋúb́ kudii pɔŋŋuee.

²³ An nyánní ti-Dindaan cee ní, an gbí mmaam ti-cee!

²⁴ Ŋwiin ŋun ti-Dindaan ŋée sɔ̀. Ŋu-puee, tí nīn fàal̀ kí nīn bí dipɔɔpindin.

²⁵ Áù ti-Dindaan, fīī-ti! Áù ti-Dindaan, tīī-ti dijajil!

²⁶ - Ti-Dindaan ń bìin̄ un dòoń u-yindi puee boon. Doooo ti-Dindaan diikun ní ti mèé ki bìintí ni-pu.

²⁷ - Ti-Dindaan di sá Unimbɔti ní ki ŋmíntí-ti! - Nín̄ ŋúb́maan asupan ki nóó tɔb kí tin bà nsaraafan yiŋyi.

²⁸ Sii di sá m-Nimbɔtiu, ní m làá nyɔ̄ŋkì-si. M-Nimbɔtiu, m làá yòon̄ a-yindi yilpu.

²⁹ Nyɔ̄ŋkìmaan ti-Dindaan, di sá yii u ŋān̄ ní u-neendi bí kí nīn cá jaanjaan.