Psaumes 110 - UNIMBƆTI NYƆƆBUNDI GBƆŊKU

Ubɔti nì usaraaŋakpil

¹ Daafiidi di ŋmàn̄ nlan nee. Ti-Dindaan nín sòon̄ pu ki tùkū m-Dindaanee sèé: «Dāá kàl̄ m-ŋaŋgiil pú kí nīn cí ŋyunti ŋun m làá dū a-nannanliibi kí bíĺ a-taaŋi taapu á tāāyee.»

² Doooo Siiyɔn jool pu ní ti-Dindaan wāaǹ a-beel pɔŋŋu! Jī a-nannanliibi bin māntìi tú-see pu dibeel.

³ Anibul dòoń nì tininjati ŋwiin ŋun a kóoǹ a-janjakitil ki kpáfèe. Unimbɔti jool puee, a-nipɔmbi dòoń a-cee, kii dimalindi nín tòó pu ntaafaabɔmbɔmin puee ní.

⁴ Ti-Dindaan di pūtì ki pōoǹ, u kpá kí kɔ́ntí u-nyɔkɔ yii: «A sá usaraaŋakpil ní kí nīn cá talku, kii Meelkiiseedeeki nín nìn sá puee.»

⁵ Ti-Dindaan bí a-ŋaŋgiil pú. U-ŋuul wiiŋŋu dalee, u làá nà bibɔtiibi ní.

⁶ U làá sòoǹ atimbun bɔti, ní anikpil ń nīn dɔ̄ an kɔkɔ fìlfil, u làá nà bikpootiliibi kitiŋ kɔkɔ pu.

⁷ Ubɔti làá nyɔ̀ mbunni nyim nsanni, míǹ boonee ní kí gántí u-yil.