Psaumes 102 - UNIMBƆTI NYƆƆBUNDI GBƆŊKU

Dinimbinaamandi nì dimákal

¹ Ufalaadaan un kaa ti cáá mpɔn ní ki tíminsí ti-Dindaan nimbiinee wimmeem.

² Ti-Dindaan, pīlifì m-wimmeem, yàntī m-biilii ń bàń-si.

³ Á taa fàtī a-boon kí tīī-mi dinimbinaamandi wiiŋŋu dal. Kpòon̄ a-tafal kí pīlifiǹ-mi. Daliŋkin m yaa yíiń-see, á kíí-mi malaa.

⁴ M-maŋfal wiiŋyi bíi jītí kii nnyiimee, m-kpabiŋ bíi wù kii amɔsiŋkoonee.

⁵ M-pɔbil bíi kōō kii kumoou kun bi gāāyee, m súntí kí jī m-jinti gba.

⁶ Aniim ŋin m fátée puee, m dúntìi kíǹ akpab ŋma ní.

⁷ Man nì kuteeun tulinjool di kíǹ ki náań, m bí kii kitulinjakpatibooi kin bí adigbuŋkatinee ní.

⁸ Ŋgeem kaa ti bí-mi, m kpántì kii unoon un tɔ́kɔ́ kudii yilpu u-babee ní.

⁹ M-nannanliibi sìí-mi ní baabadal, bi bèel̄-mi ní ki cáá m-yindi ki tòó binib mbusu.

¹⁰ Ŋfantam di kpántì m-jinti, nyinnyim ní m cáa ŋmàlintí m-nyɔkaatin.

¹¹ A-ŋuul nì a-bum poonee, a dúkutì-mi ki tɔ́ ki fá ndandati.

¹² M-maŋfal wiiŋyi bíi jītí ki cá kii mboonee, ní m bíi kōō kii kumoouee.

¹³ Ama sii ti-Dindaanee, a làá nīn kā dibeel ní kí nīn cá jaanjaan, ní bi làá nīn téetí a-pu abin abin.

¹⁴ A làá yīkì kí dàkà Siiyɔn a-ŋanti, di sá yii ŋyunti bàn̄ á sɔ̄ ki-saai, tiŋman, ŋyunti lafun bàn̄.

¹⁵ Timbi a-tɔntɔnliibi néeń ki-taŋkpeeŋi, ki-tam gba cútí-ti isaa.

¹⁶ Atimbun làá fàŋkì sii ti-Dindaan yindi, ní kitiŋ pu bɔtiibi kɔkɔ ń fàŋkì a-nyooti.

¹⁷ Di sá yii ti-Dindaan làá fàtīí mā Siiyɔn tiŋki, u làá dāá lēē u-ba kí dàkà u-nyooti poon.

¹⁸ U làá dāá pīlifiǹ bin bi fúkúl̀ee, ní kaa làá dāá gbāfì bi-wimmeem.

¹⁹ Bí ŋmà tin bí nee kí síiń bin làá dāá páanní boonee, ní dinibul din bi fātìi náańee ń dāá nyɔ̄ŋkì ti-Dindaan.

²⁰ U gbóonní doooo yilpu u-circir kɔŋkooŋŋun ki kpēē, ti-Dindaan gbóonní doooo yilpu ki kpēē kitiŋ

²¹ kí pīlifì bisarkadambi timinsii, ní kí gbìntī bin an sá yii bi lēē kí kpɔ̀ee kí líí.

²² Niinee bi làá dāá sòoǹ ti-Dindaan yindi pu Siiyɔn tiŋkin, ní kí dāá sòoǹ u-nyɔŋkii pu Jeerusaleem tiŋkin,

²³ ŋyunti ŋun anibul nì abee yaa láa kpáfì kí jāam̀ ti-Dindaanee.

²⁴ M dáá bí nsanni ki cá ní u bātì m-pɔŋŋu pu. U bātì m-maŋfal wiiŋyi pu.

²⁵ An pu ní m téeń mpɔn yii: «M-Nimbɔtiu, sii un bí kí nīn cá jaanjaanee, taa yòon̄-mi m-maŋfal wiiŋyi kansikin.»

²⁶ Dooooyee ní a náań kitiŋ, a dū a-ŋalii ní ki náań yilpu.

²⁷ Tíǹ gbanti kɔkɔ làá wāŋkì, ama sii làá nīn pée bí ní. Kitiŋ nì yilpu làá sátí kii tiwampeeŋkaalee, a làá kpántí-bi kii bi nín kpántí dibɔkutil puee ní, ní bí pɔ̄ mpaan.

²⁸ Ama siiyee, aa kpántí, ní a-maŋfal wiiŋyi kaa kúntí mun.

²⁹ Timbi a-tɔntɔnliibi biyaamu làá nīn cáá ŋkɔŋkoon, ní mu-naantiibi ń nīn bí a-nimbiin.