Psaumes 10 - UNIMBƆTI NYƆƆBUNDI GBƆŊKU

Un bi wɔ́b́ee wimmeem

¹ Ti-Dindaan, ba pu ní a dátiǹ-ti míǹ? Ba pu ní dinimbinaamandi yuntiŋunee a bāal̀ ní?

² Bikpitiŋaliibi cáá dilambil ní ki wɔ́b̀ unandaan. Yàntī bi-talinti tin bi píĺee ń fàtīí sàtì-bi.

³ Ukpitiŋal bí ki gà u-bindi u-landɔkɔkpitii pu. Unil un jīǹ u-jutiibi puee tòó ti-Dindaan mbusu ki bèel̄-u.

⁴ Ukpitiŋal nín yòontí u-ba yilpu puee, waa dū Unimbɔti ki yíiń tiba. U nín dàkafī puee di sá yii: «Unimbɔti kaa cáá mpɔn ŋubɔ.»

⁵ Tin kɔkɔ u yaa pée ŋáańee bútí-u ní. Unimbɔti bɔsooŋyi kaa lì-u tiba. U-nannanliibi kaa bí tiban u-cee.

⁶ U dàkafī u-pɔbilin ki lì yii: «Tiba kaa làá ŋá-mi, dinimbinaamandi diba kpá kí kɔ́-mi.»

⁷ U-nyɔkɔ poon gbí mbusu nì nnyimɔn nì tipɔmbɔti ŋma ní, u yáb̀ kí sòoǹ atuŋkpiti nì mbusu bɔti.

⁸ U nākantí ntiŋwaamu caŋin ki kù maanyiiba dibalin. U-nimbiliŋ pée cɔ́ uwɔfi pu ní.

⁹ U náká u-balilaŋki ki cí kii gbikintee. U náká niin ki nyàab̀ unandaan kí cúú. U yaa cúú unandaanee ní ú dū-u kí ŋá u-laaŋkun.

¹⁰ U-pɔŋŋu yaa nyāŋkì unandaanee puee, ní úǹ ń lítí,

¹¹ ní ú lì u-ban yii: «Unimbɔti tafal kaa bí tin m ŋá nee pu, u bīiǹ u-nimbiin, waa pée wāĺ tiba nì tiba.»

¹² Ti-Dindaan, yīkìm̄, Unimbɔti, yàntī falaa ń bà bikpitiŋaliibi gbanti. Taa súntí binandambi pu.

¹³ Ba pu ní ukpitiŋal bèel̄ sii Unimbɔti ki lì u-pɔbilin yii: «Aa làá yíiń-mi ibeeyiin» ní?

¹⁴ A wāĺ tin kɔkɔ bíi jītée, ki nyí binib bin bí digìńdi nì falaa poonee ní ki bɔ́ntì kí tɔ̀ bi-pɔntooŋyi. Un kaa cáá ubɔ ń tūtuǹ-uee dù u-ba ní kí ŋá a-ŋaan. Sii di sá ditaŋkpiibil jòońliu.

¹⁵ Nàan̄ unikpiti pɔŋŋu, kí dáaĺ u-tafal u-kpitii pu, ní ú wāŋkì a-nimbiin!

¹⁶ Ti-Dindaan sá ubɔti ní jaanjaan, bin kaa jáaḿ-uee làá wāŋkì u-tiŋki pu.

¹⁷ Ti-Dindaan, a pílifí unandaan wimmeem ní ki tìì-u kunyannyaau. A kpòontí a-tafal

¹⁸ ki pílifí ditaŋkpiibil nì un bi sàantée biilii ki pɔ̀-bi, án nín làá ŋá pu nisaaleen ń taa ti nín̄ sá tuutuutuu ki tīī u-nijutee.