Proverbes 5 - UNIMBƆTI NYƆƆBUNDI GBƆŊKU

Nín̄ nyí nì a-ba nì unimpu un nyēē u-cal boonee

¹ M-biki, pīlifì iciin in m dàkà-see tiŋan, kpòon̄ a-tafal kí pīlifì isaŋki in m-nyil tììyee.

² Mimmee a làá kpāafì nlandɔkɔmɔnti ní kí nīn sòoǹ nì dinyil.

³ Di sá yii ubɔ nimpuu nyɔkɔ mɔ̄ kii tisiilee ní ki mèeǹ kii ŋkpamee.

⁴ Ama án dāa kúntée u-nyɔkɔ túŋkí ní kátí kati kii kisutuntuŋee, ní ki jītí pámpam kii kitàataajiki kin jītí ajan liitil púee.

⁵ An nimpuuee bimbim cáǹ ŋkúmin ní, ditaŋkpiilin ní u còom̄ ki cá.

⁶ Waa nóó nsan ŋun cáǹ-u dimaŋfalinee, u yīntì nsan ní kaa kpáàa nyí.

⁷ An puee pīlifiǹ-mi, m-biki. Taa dū m-saŋkii kí fá.

⁸ Taa cù an nimpuuee cee, kí taa pée sútí kí pìl̄ u-diiku punyɔkɔpu gba.

⁹ Án yaa kaa sá míǹ, u làá bīil̀ a-jilmau, ní kí yàntī uninja un kaa sūǹ isaayee ń nàan̄-si.

¹⁰ Ní binicambi ń dāá jī a-gaajawanti, ní a-tundi paati ń dāá kɔ́ binifantantiibi ŋaan.

¹¹ Ŋyunti ŋun a tóob́ ŋkúm a-wunti dóò ki pēefèe, ní a kíǹ ki yáliŋkí.

¹² Niinee ní a dāa lì yii: «An ŋá mana ní maa pílifì tibɔti tin bi kpáafì-mee? An ŋá mana ní maa kíí bí wòoǹ-mi ní?

¹³ Ba pu ní maa pílifì m-dàkaliibi nyɔkɔ, kaa fātìi tɔ́ bin nìn bíi dàkà-mee bɔti?

¹⁴ An bàà pée kíǹ fiii dee ḿ bàà kɔ́ dinimbinaamandi din kaa cáá jutee poon samaa kɔkɔ kansikin!»

Nín̄ néeń a-taafaanimpuu

¹⁵ A-nimpuu sá kii a-nyimbɔbil nyim nì min nyēeń a-lɔkɔunee ní. Nín̄ nyù nnyim gbanti!

¹⁶ Taa yàntī a-nyimbuliŋu ń pùub̀ kí nyā mmɔŋki àá a-bùmbiyaamu ń pùub̀ kí nyā didandi pu.

¹⁷ A-nimpuu ń nīn sá sii baba wanti, á taa yàntī sii nì binicambi ń kpāfì kí nīn yì-u.

¹⁸ Yàntī a-nyimbuliŋu, a-taafaanimpuu pɔbil ń nīn sɔ̀m̀, yàntī u-bɔti ń nīn mɔ̄ǹ-si.

¹⁹ A-nimpuu cáá dineendi kii upeemanee, ki ŋān̄ kii ucaŋkpalimee. U-biiŋi ń nīn pée tìì-si mmɔn. Ŋyunti kamaayee u-neendi ń nīn pée gbéè-si kii ndaamee.

²⁰ M-biki, ba pu ní a-nimbil máǹ ubɔ nimpuu pu ní ki ŋúb́ unimpu un aa nyée biiŋi ki ŋmáliŋkí ní?

²¹ Di sá yii ti-Dindaan nyí unil kamaa bimbim, ní ki wāĺ tin kɔkɔ u ŋáańee.

²² Ikpiti kɔ̄ntí ukpitiŋal sarka, u-kpitii sàtī-u kii kutaliŋŋuee ní.

²³ U làá kpú u nín kaa ŋūǹ kí ŋúb́ u-ba puee. U-gbaandi nín wīikí puee di làá yàntī ú wāŋkì.