Osée 6 - UNIMBƆTI NYƆƆBUNDI GBƆŊKU

¹ Niinee ní ni lī yii: «Dāam̄maan, tí gítímaan ti-Dindaan cee. Úǹ di ŋá-ti tiweendi, úǹ di làá cáaǹ-ti. Úǹ di gbáń-ti, úǹ di làá tí póob́ ti-buuŋyi.

² Nì iwiin ili boonee, u làá tīī-ti dimaŋfal, iwiin ita poonee, u làá yáatí-ti kí yóoń ní tí nīn bí dimaŋfalin u-nimbiin.

³ Tí béé yii ti-Dindaan di sá Unimbɔti. Tí nyàab̀ kí béé-u. U-dāantam sá mbaamɔn kii ku nín yaa mɔ́ ku wúntí puee ní. U làá dāan̄ ti-cee kii utaayee ní, kii utaajoolkaa nín nì ki sɔ̀ŋkī kitiŋ puee ní.»

⁴ Ama ní ti-Dindaan kíí yii: «Ḿ ŋá-si mana ní, Eefiraayiim? A là ḿ ŋá-si mana ní, Juuda? Dineendi din ni cáá m-puee bí kii ditaafaapɔ̀ńdee ní, a lì kii ditaafaamalindee, an kaa pée súŋkí ní kí wāŋkì.

⁵ An pu ní m dī m-bɔnaatiliibi pu ki jáń nì ni, m dū anyɔɔbun ŋin nyáń m-nyɔkɔnee pu ki pɔ̄fì-ni. M-bɔsooŋyi tòoń kii ŋwalifee ní.

⁶ Kun fáatiǹ-mee di sá dineendi, kaa sá saraabi. Kí nīn nyí man Unimbɔtee jítiǹ bisaraawɔkaabi.»

Ntimbiil tuuŋŋi Isirayeel tiŋkin

⁷ «Ama kii Adamee, ni nyáń m-poondi boon, naa yúl̀ nì mi deedee.

⁸ Giilaadi sá binikpitib tiŋki ní, fatiku daanti gbí ki-poon.

⁹ Kii digaŋgam dambi nín bāal̀ nsan caŋin ki cí binib kí kpɔ̀ puee, míǹ ní bisaraaŋaliibi kitil diba kù binib Siikeem saŋŋu pu. Ntimbiil tuuŋŋi ŋin bi tūǹee dee!

¹⁰ M ká ntimbiil tuuŋŋi Isirayeel beel tiŋkin. Niin ní Eefiraayiim naakookun yab ŋáań alaakpaatuun ní ki yāntì Isirayeel yab kɔ́ tijɔkɔndin.

¹¹ «Nimbi Juuda beel yab mun, m bíi bɔ́ntí ni-bɔsooŋyi yuntiŋu kí cīití-ni.» «Ŋyunti ŋun m làá dāá gíiǹní m-nibul din bi nìn cúú kuyuŋuee,