Osée 5 - UNIMBƆTI NYƆƆBUNDI GBƆŊKU

Bikpootiliibi bin ŋáań ikpitee

¹ «Bisaraaŋaliibi, pīlifìmaan tin bí nee, Isirayeel beel yab kpootiliibi, ní pīlifìmaan. Ubɔti dicaŋkun yab, kpòom̄maan ni-tafal kí pīlifì. An bàà sá nimbi nín sòoǹ binib bɔti nì mbaamɔn. Ama ní ni kpántì kutaliŋŋu ki tīī m-nibul Miisipa tiŋkin, ní ki kpántì kulaaŋŋu kun bi píĺ Tabɔɔr jool puee.

² Bi gbìn̄ kubookpaaŋŋu Siitiim tantakalin. M bíi bɔ́ntí bi-kɔkɔ tafadaaldi.

³ «Mamee, m nyí Eefiraayiim naakookun yab tiŋan, Isirayeel beel yab mun kaa lìkī m-nimbiin. Eefiraayiim yab kɔ́ alaakpaatuun poon, ní ki yāntì Isirayeel beel yab kɔkɔ kɔ́ tijɔkɔndin.»

⁴ Isirayeel beel yab tuŋkpitiŋ kaa pūǹ-bi nsan bí ŋmā kí fàtīí gítí bi-Nimbɔtiu cee. Di sá yii alaakpaatuun fam miba bí bi-ni, ní baa nyí ti-Dindaan.

⁵ Isirayeel beel yab lambil di lèekī bi-pu mmɔ́ɔn. Isirayeel beel yab nì Eefiraayiim naakookun yab kpitii pu ní bi gbéetì ki lítì. Bi nì Juuda beelin yab mun kpáfì ki gbéetì.

⁶ Bi làá dāá cáań bi-piii nì bi-naai kí ŋá saraa kí nyàab̀ ti-Dindaan, ama baa làá dāá ká-u. Di sá yii u dū-bi ki fá.

⁷ Bi nyáń ti-Dindaan boon ki màl̄ mbiyaamu mun kaa sá u-yɔmuee. Too, an kaa ti làá bà uŋmal, án làá nàan̄ bi nì bi-tiŋki.

Juuda beel yab nì Isirayeel beel yab jaaku

⁸ Búḿmaan ŋyin Giibeeya jool pu, búḿmaan dikantándi Raama tiŋkin! Kpāafìmaan Beeti-Aween yab! Beenjameen naakookun yab, bi bíi jáà nì ni ni-boon pú.

⁹ Ŋwiin ŋun m làá dāá dáaĺ Eefiraayiim naakooku tafalee, kì làá dāá kpántí kuteeu ní. Tin m bíi sòoǹ Isirayeel naakɔti pu nee sá tibɔŋman ní.

¹⁰ Juuda beel kpootiliibi náań nì bin cóotí bi-sati kpaanyɔmmu taŋkpeeŋi ki nìkèe ní. An pu ní m làá kpáatí m-ŋuul kii nnyimee kí sìtī bi-pu.

¹¹ «Bi sāaǹ Eefiraayiim yab, ibɔsoon nàn̄-bi, di sá yii bi sáń ki pá tin kaa bí tibanee boon.

¹² Too, m làá dāá kpántí kii dinalee ní Eefiraayiim yab cee, ní kí kpántí kii taagbunjaanjaanee Juuda beel yab cee.

¹³ Ŋyunti ŋun Eefiraayiim yab ká yii bi būǹ ní Juuda beel yab ká bi-bunsooŋyee, ní Eefiraayiim yab nín cá Asuur tiŋkin ní ki tú binib bí cùú ká ubɔtikpaan. Ama u mun kaa ŋūǹ kí cáaǹ-naaa, kaa tí cáá ni-bunsooŋyi nyɔkɔŋu.

¹⁴ Di sá yii m làá nīn sá kii gbikintee ní Eefiraayiim yab cee, ní kí nīn sá kii digbikintipɔmbilee Juuda beel yab cee. Mama m-ba di làá tɔ̀ntī-ni, ní kí kpáaǹ-ni kí búntí, ní ubɔ mun dāa kpá kí fīī-ni m-ŋaan.»

Unimbɔti fātì u-boon ki tīī u-nibul

¹⁵ «M làá búntí, m làá nīn gítí m-dumpu kí dāá sāā ŋyunti ŋun bi làá béé bi-bɔkpil kí nyàab̀-mee. Bi-nimbinaamandi poonee, bi làá dāá nyàab̀-mi.»